'કોકરોચ જનતા પાર્ટી'નું X હેન્ડલ ભારતમાં બેન

Cockroach Janata Party Twitter Handle Banned: ભારતના ન્યાયતંત્રની એક ટિપ્પણી સામે વિરોધ દર્શાવવા સોશિયલ મીડિયા પર શરૂ થયેલી અનોખી ચળવળ 'કોકરોચ જનતા પાર્ટી' (CJP) હાલ દેશભરમાં ભારે ચર્ચાનો વિષય બની છે. માત્ર ગણતરીના દિવસોમાં જ કરોડો યુવાનોનું ધ્યાન ખેંચનારી આ ડિજિટલ પાર્ટી વિવાદોમાં સપડાઈ છે. લેટેસ્ટ અપડેટ મુજબ, માઇક્રોબ્લોગિંગ પ્લેટફોર્મ X (ટ્વિટર) દ્વારા કોકરોચ જનતા પાર્ટીના સત્તાવાર એકાઉન્ટ પર ભારતમાં પ્રતિબંધ મૂકી દેવામાં આવ્યો છે. આ ડિજિટલ ઝુંબેશ સોશિયલ મીડિયા પર એટલી ઝડપથી વાયરલ થઈ હતી કે તેણે ફોલોઅર્સની રેસમાં દેશના સૌથી મોટા શાસક પક્ષ ભારતીય જનતા પાર્ટીને પણ પાછળ છોડી દીધી છે.

સુપ્રીમ કોર્ટની ટિપ્પણી અને પક્ષની સ્થાપના
આ સમગ્ર વિવાદની શરૂઆત સુપ્રીમ કોર્ટમાં એક કેસની સુનાવણી દરમિયાન થઈ હતી. સુપ્રીમ કોર્ટના ન્યાયાધીશે દેશના કેટલાક બેરોજગાર યુવાનોના વલણની તુલના "કોકરોચ" (વાંદા) સાથે કરી હોવાનો દાવો છે. ન્યાયતંત્રની આ ટિપ્પણીથી સોશિયલ મીડિયા પર યુવાનોમાં ભારે રોષ ફાટી નીકળ્યો હતો. આ અપમાનજનક શબ્દના વિરોધમાં ૩૦ વર્ષીય પોલિટિકલ કોમ્યુનિકેશન સ્ટ્રેટેજિસ્ટ અભિજીત દીપકે ઓનલાઇન અવાજ ઉઠાવ્યો હતો. તેમણે સવાલ કર્યો હતો કે, "જો બધા કોકરોચ ભેગા થઈ જાય તો શું થશે?" આ એક સવાલમાંથી જ ૧૬મી મેના રોજ 'કોકરોચ જનતા પાર્ટી' (CJP) નામના ઓનલાઈન ડિજિટલ અભિયાનનો જન્મ થયો હતો.

ઇન્સ્ટાગ્રામ પર ભાજપને પછાડ્યો
આ ઓનલાઇન ઝુંબેશ શરૂ થતાંની સાથે જ દેશના અસંખ્ય બેરોજગાર યુવાનો અને સોશિયલ મીડિયા યુઝર્સ રાતોરાત આ ચળવળમાં જોડાવા લાગ્યા હતા. માત્ર ચાર જ દિવસમાં આ ડિજિટલ પાર્ટીએ ઇન્સ્ટાગ્રામ પર અભૂતપૂર્વ લોકપ્રિયતા મેળવીને 15 મિલિયન (1.5 કરોડ) ફોલોઅર્સનો આંકડો પાર કરી લીધો હતો. આ આંકડા સાથે CJPએ ભારતીય જનતા પાર્ટીના સત્તાવાર ઇન્સ્ટાગ્રામ એકાઉન્ટ (8.8 મિલિયન ફોલોઅર્સ) ને પણ ઘણું પાછળ છોડી દીધું છે. અહેવાલો અનુસાર, અત્યાર સુધીમાં 6 લાખથી વધુ લોકોએ આ ડિજિટલ ઝુંબેશના સભ્ય તરીકે નોંધણી કરાવી લીધી છે, જેમાં કેટલાક અગ્રણી રાજકારણીઓ અને સેલિબ્રિટીઓ પણ સામેલ છે.

એકાઉન્ટ બેન થતાં નવું હેન્ડલ શરૂ કરાયું
પાર્ટીના સ્થાપક અભિજીત ડિપકે X પર એકાઉન્ટ પ્રતિબંધિત થવાની પુષ્ટિ કરતા જણાવ્યું છે કે, "જેની અપેક્ષા હતી તે જ થયું. માત્ર ચાર દિવસમાં 2 લાખથી વધુ ફોલોઅર્સ થતાં જ ભારતમાં અમારું સત્તાવાર X એકાઉન્ટ બ્લોક કરી દેવાયું છે." આ સાથે જ તેમણે આક્ષેપ કર્યો છે કે હવે તેમના લોકપ્રિય ઇન્સ્ટાગ્રામ હેન્ડલને પણ હેક કરવાના પ્રયાસો થઈ રહ્યા છે. જોકે, ડિજિટલ યુદ્ધ ચાલુ રાખવાની જાહેરાત સાથે અભિજીતે X પર નવું હેન્ડલ એક્ટિવ કરી દીધું છે અને લોકોને આ અવાજને દબાવવા ન દેવા માટે નવા એકાઉન્ટને ફોલો કરવાની અપીલ કરી છે.

કોણ છે સ્થાપક અભિજીત ડિપકે?
કોકરોચ જનતા પાર્ટી દ્વારા ડિજિટલ ક્રાંતિ લાવનાર 30 વર્ષીય અભિજીત ડિપકે ઉચ્ચ શૈક્ષણિક બેકગ્રાઉન્ડ ધરાવે છે. તેમણે મહારાષ્ટ્રના પુણે શહેરમાંથી જર્નાલિઝમ (પત્રકારત્વ) માં સ્નાતકની ડિગ્રી મેળવી છે. ત્યારબાદ તેઓ ઉચ્ચ અભ્યાસ અર્થે અમેરિકા ગયા હતા, જ્યાં તેમણે પ્રતિષ્ઠિત બોસ્ટન યુનિવર્સિટીમાંથી પબ્લિક રિલેશન્સમાં પોસ્ટ ગ્રેજ્યુએશન પૂર્ણ કર્યું છે. વ્યવસાયે પોલિટિકલ કોમ્યુનિકેશન સ્ટ્રેટેજિસ્ટ હોવાથી તેઓ રાજકીય પક્ષો માટે ડિજિટલ વ્યૂહરચના અને સોશિયલ મીડિયા કેમ્પેઈન ડિઝાઇન કરવાનું કામ કરે છે, જેના અનુભવનો ઉપયોગ તેમણે આ વિરોધ પ્રદર્શનમાં કર્યો છે.