મધ્યપ્રદેશના પવિત્ર શહેર ઉજ્જૈનમાં આવેલ વિશ્વપ્રસિદ્ધ મહાકાલેશ્વર મંદિરમાં દર્શન દરમિયાન ભારે હોબાળો થયો હતો. શયન આરતી વખતે એક મહિલા શ્રદ્ધાળુ અને મંદિરના સુરક્ષા ગાર્ડ વચ્ચે વિવાદ એટલો વધી ગયો કે બંને વચ્ચે શારીરિક ઝપાઝપી થઈ હતી. આ ઘટનાનો વીડિયો સોશિયલ મીડિયા પર વાયરલ થયા બાદ ચકચાર મચી ગઈ છે.
શું છે વિવાદનું કારણ ?
મુંબઈથી આવેલી મહિલા ભક્તનો આરોપ છે કે જ્યારે તે લાઈનમાં ઉભી હતી, ત્યારે સુરક્ષા કર્મચારીઓએ તેની સાથે અભદ્ર વર્તન કર્યું અને ધક્કામુક્કી કરી હતી. મહિલાએ રડતા રડતા સુરક્ષાકર્મીઓ પર હુમલાનો આક્ષેપ લગાવ્યો છે. બીજી તરફ, મંદિર સમિતિનું કહેવું છે કે મહિલાએ દર્શનાર્થીઓનો રસ્તો રોક્યો હતો અને જ્યારે મહિલા ગાર્ડે તેને સમજાવવાનો પ્રયાસ કર્યો ત્યારે શ્રદ્ધાળુએ ગાર્ડનું ગળું પકડી નખ વડે હુમલો કર્યો હતો.
પોલીસ તપાસ અને સીસીટીવી ફૂટેજ :&nbsp;
આ મામલે બંને પક્ષોએ મહાકાલ પોલીસ સ્ટેશનમાં લેખિત ફરિયાદ નોંધાવી છે. પોલીસે ગુનો નોંધીને મંદિર પરિસરમાં લાગેલા સીસીટીવી ફૂટેજની તપાસ શરૂ કરી છે. પોલીસનું કહેવું છે કે ફૂટેજના આધારે સત્ય જાણ્યા બાદ કાયદેસરની કાર્યવાહી કરવામાં આવશે. આ ઘટનાને પગલે મંદિરમાં ભક્તોની સુરક્ષા અને ગાર્ડના વ્યવહારને લઈને ફરી એકવાર ચર્ચાઓ શરૂ થઈ છે.
પ્રસાદ અંગે ફેલાતી અફવાઓ પર સ્પષ્ટતા :&nbsp;
હોબાળાની વચ્ચે સોશિયલ મીડિયા પર શિવ નવરાત્રિના પ્રસાદને લઈને ફેલાઈ રહેલી ગેરસમજો પર મંદિર વહીવટીતંત્રે પૂર્ણવિરામ મૂક્યું છે. પ્રશાસને સ્પષ્ટતા કરી છે કે શિવ નવરાત્રિ દરમિયાન ભગવાન મહાકાલની પૂજા અને પ્રસાદની તમામ વ્યવસ્થા સરકાર દ્વારા કરવામાં આવે છે. ભક્તો પાસેથી કોઈ પણ પ્રકારનો ડ્રાય ફ્રૂટ કે રોકડ પ્રસાદ સ્વીકારવામાં આવતો નથી. આવા ભ્રામક પ્રચારથી દૂર રહેવા મંદિર સમિતિએ અનુરોધ કર્યો છે.
મહાશિવરાત્રી મહોત્સવની તૈયારીઓ :&nbsp;
મહાકાલ મંદિરમાં 6 ફેબ્રુઆરીથી 15 ફેબ્રુઆરી દરમિયાન મહાશિવરાત્રી પર્વની ધામધૂમથી ઉજવણી કરવામાં આવી રહી છે. શિવપંચમીના અવસરે કેસર-ચંદનથી વિશેષ પૂજા સાથે આ ઉત્સવનો પ્રારંભ થયો છે. દસ દિવસ સુધી ચાલતી આ વિધિઓમાં ભક્તોની ભારે ભીડને જોતા સુરક્ષા વ્યવસ્થા વધુ સઘન બનાવવાની સૂચના આપવામાં આવી છે.

મહાકાલ મંદિર સુરક્ષાકર્મી વિવાદ

શયન આરતી દરમિયાન મહિલા શ્રદ્ધાળુ અને ગાર્ડ વચ્ચે શારીરિક ઘર્ષણ, પોલીસે સીસીટીવી તપાસ શરૂ

February 7, 2026 | 17:13 IST