કેબિનેટનો નિર્ણય: ગુજરાતના આદિવાસી બેલ્ટને ભેટ

કેન્દ્રીય કેબિનેટે દેશના આર્થિક અને માળખાગત વિકાસને વેગ આપવા માટે અનેક મહત્વના નિર્ણયો લીધા છે. વડાપ્રધાન નરેન્દ્ર મોદીની અધ્યક્ષતામાં મળેલી બેઠકમાં ગુજરાતના આદિવાસી વિસ્તારો માટે નેશનલ હાઇવેના અપગ્રેડેશન સહિત સ્ટાર્ટઅપ ઇન્ડિયા 2.0 અને અર્બન ચેલેન્જ ફંડને લીલી ઝંડી આપવામાં આવી છે.

ગુજરાતના NH-56 માટે ₹4,583 કરોડની ફાળવણી : 

ગુજરાતના આદિવાસી બેલ્ટમાં પરિવહન સુવિધા સુધારવા માટે નેશનલ હાઇવે 56 ના બે મુખ્ય સેક્શનને ફોર-લેન બનાવવાની મંજૂરી મળી છે. આ પ્રોજેક્ટ અંતર્ગત છોટાઉદેપુર, નર્મદા, સુરત અને તાપી જિલ્લાના ભાગોને આવરી લેતા ધમાસિયા–બિટાડા અને નસારપોર–મલોથા સેક્શનનું આધુનિકરણ કરવામાં આવશે. આનાથી સ્થાનિક રોજગારી અને કનેક્ટિવિટીમાં મોટો વધારો થશે.

શહેરો અને સ્ટાર્ટઅપ્સ માટે વિશેષ ફંડ : 

અર્બન ચેલેન્જ ફંડ: શહેરોને સ્માર્ટ અને આધુનિક બનાવવા માટે ₹1 લાખ કરોડનું ફંડ જાહેર કરવામાં આવ્યું છે. આ યોજના ખાનગી રોકાણને પ્રોત્સાહન આપી ટ્રાન્સપોર્ટ અને ઇન્ફ્રાસ્ટ્રક્ચરમાં સુધારો કરશે.

સ્ટાર્ટઅપ ઇન્ડિયા 2.0: ટેકનોલોજી અને AI ક્ષેત્રે નવા ઉદ્યોગ સાહસિકોને પ્રોત્સાહન આપવા ₹10,000 કરોડનું નવું ફંડ લોન્ચ કરાયું છે.

દેશના અન્ય મોટા પ્રોજેક્ટ્સ : 

કેબિનેટે નોઇડા મેટ્રોના વિસ્તરણ અને તેલંગાણામાં ઇકોનોમિક કોરિડોરને પણ મંજૂરી આપી છે. આ ઉપરાંત આસામમાં બ્રહ્મપુત્રા નદી નીચે દેશની સૌથી મોટી અંડરવોટર ટનલ બનાવવાની ઐતિહાસિક જાહેરાત કરવામાં આવી છે. રેલ્વે ક્ષેત્રે પણ ₹18,509 કરોડના ખર્ચે 389 કિમી નવી લાઇન નાખવાના પ્રોજેક્ટ્સને મંજૂરી મળી છે, જેનો લાભ મહારાષ્ટ્ર અને હરિયાણા સહિતના રાજ્યોને મળશે.