કેન્દ્રીય નાણામંત્રી નિર્મલા સીતારમણે પોતાનું સતત 9મું બજેટ રજૂ કરતા દેશના આરોગ્ય ક્ષેત્રને નવી ઊંચાઈ પર લઈ જવા માટે અનેક કલ્યાણકારી જોગવાઈઓ કરી છે. આ બજેટમાં ખાસ કરીને કેન્સરના દર્દીઓને રાહત આપવાની સાથે મેડિકલ ઈન્ફ્રાસ્ટ્રક્ચર અને રોજગાર પર વિશેષ ભાર મૂકવામાં આવ્યો છે.
કેન્સર અને ગંભીર રોગોની સારવાર હવે વધુ સસ્તી :&nbsp;
સરકારે કેન્સરના દર્દીઓ માટે મોટી રાહતના સમાચાર આપ્યા છે. હવે 17 જેટલી જીવનરક્ષક કેન્સરની દવાઓ પર લેવામાં આવતી બેઝિક કસ્ટમ ડ્યુટી સંપૂર્ણપણે દૂર કરવામાં આવી છે. આ ઉપરાંત, અન્ય 7 દુર્લભ ગંભીર રોગોની દવાઓ પર પણ આયાત ડ્યુટી માફ કરાતા સામાન્ય માનવી માટે મોંઘી સારવાર સુલભ બનશે.
બાયો-ફાર્મા શક્તિ: ભારત બનશે ગ્લોબલ ફાર્મા હબ :&nbsp;
દેશમાં જ દવાઓનું ઉત્પાદન વધારવા માટે ₹10,000 કરોડના રોકાણ સાથે બાયો-ફાર્મા શક્તિ યોજના શરૂ કરાઈ છે. આ યોજના હેઠળ કેન્સર અને ડાયાબિટીસ જેવી દવાઓનું ભારતમાં ઉત્પાદન વધારવામાં આવશે. દેશમાં 3 નવી રાષ્ટ્રીય સંસ્થાઓ સ્થપાશે અને જૂની 7 સંસ્થાઓને આધુનિક ટેકનોલોજીથી સજ્જ કરવામાં આવશે.
આરોગ્ય ક્ષેત્રે રોજગારનો મહાકુંભ :&nbsp;
આગામી પાંચ વર્ષમાં હેલ્થ સેક્ટરમાં અંદાજે 2.5 લાખ જેટલી નવી નોકરીઓનું સર્જન થશે. જેમાં 1 લાખ સહાયક આરોગ્ય કાર્યકરો અને 1.5 લાખ કેર-ગિવર્સને તૈયાર કરવાનું લક્ષ્ય છે. આનાથી યુવાનોને રોજગારી મળવાની સાથે વૃદ્ધોની સંભાળ લેવાનું માળખું વધુ મજબૂત બનશે.
મેડિકલ ટુરિઝમ અને આયુર્વેદ પર ભાર :&nbsp;
દેશમાં 5 નવા મેડિકલ હબ બનાવવાની જાહેરાત કરવામાં આવી છે, જે મેડિકલ ટુરિઝમને પ્રોત્સાહન આપશે. આયુર્વેદ ક્ષેત્રે દેશમાં 3 નવી 'અખિલ ભારતીય આયુર્વેદ સંસ્થાઓ' સ્થપાશે. જામનગર સ્થિત WHO ગ્લોબલ સેન્ટરની મદદથી આયુર્વેદિક ઉત્પાદનોની નિકાસ વધારવામાં આવશે.
માનસિક સ્વાસ્થ્ય અને કટોકટી સેવાઓ :&nbsp;
ઉત્તર ભારતમાં એક નવી રાષ્ટ્રીય માનસિક સ્વાસ્થ્ય સંસ્થા (NIMHANS-2) ની સ્થાપના કરવામાં આવશે. જિલ્લા હોસ્પિટલોમાં ઈમરજન્સી અને ટ્રોમા કેરની ક્ષમતામાં 50 ટકાનો વધારો કરવાની મહત્વની જોગવાઈ પણ આ બજેટમાં કરવામાં આવી છે.

બજેટ 2026 આરોગ્ય ક્ષેત્ર

નાણામંત્રી નિર્મલા સીતારમણે હેલ્થ સેક્ટર માટે કરી મોટી જાહેરાતો

February 1, 2026 | 15:00 IST