બિહાર: 4 સગીરાઓના મોતે સર્જ્યું રહસ્યમય વાતાવરણ

બિહારના ઔરંગાબાદ જિલ્લાના એક ગામમાં બનેલી અત્યંત ચોંકાવનારી ઘટનાએ સમગ્ર પંથકમાં ચર્ચા જગાવી છે. મોતી બિઘા ગામમાં પાંચ સગીર છોકરીઓએ સામૂહિક રીતે ઝેર પી લીધું હોવાની વાત સામે આવી છે, જેમાં ચાર છોકરીઓના મોત નીપજ્યા છે. આ ઘટનાની જાણ થતા જ આખા ગામમાં ફફડાટ વ્યાપી ગયો છે.

એક જ ચિતા પર ચાર માસૂમોના અગ્નિસંસ્કાર : 

મળતી માહિતી મુજબ, આ છોકરીઓની ઉંમર 10 થી 14 વર્ષની વચ્ચે હતી અને તેઓ પાંચમા ધોરણ સુધી ભણેલી હતી. જ્યારે ગામથી દૂર એક તળાવ પાસેથી તેમના મૃતદેહ મળ્યા, ત્યારે પરિવારે પોલીસને જાણ કર્યા વગર જ ઉતાવળમાં અગ્નિસંસ્કાર કરી દીધા હતા. આશ્ચર્યની વાત એ છે કે આર્થિક તંગી અને મામલો દબાવવાની કોશિશમાં ચારેય છોકરીઓને એક જ ચિતા પર મુકી દેવામાં આવી હતી. પાંચ પૈકીની એક છોકરી હજુ ગુમ હોવાનું કહેવાય છે, જ્યારે અન્ય એક ઈજાગ્રસ્ત હોવાના અહેવાલ છે.

પોલીસ તપાસમાં ગામલોકોનું મૌન : 

હાસપુરા પોલીસ સ્ટેશનને જ્યારે આ ઘટનાની ગંધ આવી ત્યારે અધિકારીઓ તાત્કાલિક સ્થળ પર પહોંચ્યા હતા. જોકે, ત્યાં સુધીમાં પુરાવાઓનો નાશ કરી દેવામાં આવ્યો હતો. પોલીસ તપાસમાં બહાર આવ્યું છે કે ગામમાં એક ગુપ્ત બેઠક યોજાઈ હતી, જેમાં આ ઘટનાને બહાર ન આવવા દેવાનો નિર્ણય લેવાયો હતો. હાલમાં ગામમાં સ્થિતિ એવી છે કે પુરુષો ગાયબ છે અને મહિલાઓ કશું જ બોલવા તૈયાર નથી.

રહસ્ય અકબંધ: આત્મહત્યા કે બીજું કંઈ ?

આ પાંચેય સગીરાઓ પડોશી હતી અને ગરીબ પરિવારોમાંથી આવતી હતી. આટલી નાની ઉંમરે તેમણે આવું આત્મઘાતી પગલું કેમ ભર્યું તે હજુ મોટો પ્રશ્ન છે. પોલીસ હવે ફોરેન્સિક પુરાવા અને ગામમાં તૈનાત બાતમીદારોની મદદથી સત્ય શોધવાનો પ્રયાસ કરી રહી છે. ગામમાં છવાયેલી આ ભયાનક શાંતિ કોઈ મોટા રહસ્ય તરફ ઈશારો કરી રહી છે.