બાંગ્લાદેશ ચૂંટણી: BNPની જીત અને ભારતનો દ્રષ્ટિકોણ

બાંગ્લાદેશમાં તાજેતરમાં યોજાયેલી 13મી સંસદીય ચૂંટણીમાં મોટું રાજકીય પરિવર્તન જોવા મળ્યું છે. બાંગ્લાદેશ નેશનાલિસ્ટ પાર્ટી એટલે કે BNP એ આ ચૂંટણીમાં જંગી બહુમતી સાથે જીત મેળવી છે. બીજી તરફ, કટ્ટરપંથી ગણાતી જમાત-એ-ઇસ્લામીને કારમી હારનો સામનો કરવો પડ્યો છે. આ વિજય બાદ ભારતના વડાપ્રધાન નરેન્દ્ર મોદીએ તારિક રહેમાનને અભિનંદન પાઠવ્યા છે અને બાંગ્લાદેશના લોકોએ તેમના નેતૃત્વમાં જે વિશ્વાસ મૂક્યો છે તેની પ્રશંસા કરી છે.

ભારત માટે આ પરિણામો કેમ મહત્વના છે ?

ભારત માટે આ ચૂંટણી પરિણામો રાહતના સમાચાર લઈને આવ્યા છે. તેનું મુખ્ય કારણ એ છે કે ભારત હંમેશા જમાત-એ-ઇસ્લામી જેવી સંસ્થાઓના વધતા પ્રભાવથી ચિંતિત રહ્યું છે, કારણ કે તેમની પાકિસ્તાની એજન્સીઓ સાથેની નિકટતા જાણીતી છે. જોકે ભૂતકાળમાં BNP સાથે ભારતના સંબંધોમાં ઉતાર-ચઢાવ રહ્યા છે, પરંતુ વર્તમાન સંજોગોમાં ભારત તેને એક લોકશાહી અને સ્થિર વિકલ્પ તરીકે જોઈ રહ્યું છે.

બદલાતું રાજકીય સમીકરણ : 

શેખ હસીનાની વિદાય અને ખાલિદા ઝિયાના નિધન બાદ બાંગ્લાદેશનું રાજકારણ સંપૂર્ણપણે બદલાઈ ગયું છે. તારિક રહેમાન જેઓ લાંબા સમય સુધી દેશનિકાલમાં હતા, તેમણે પરત ફરીને પક્ષની કમાન સંભાળી અને મોટી સફળતા અપાવી છે. હવે જ્યારે તેઓ વડાપ્રધાન બનવા જઈ રહ્યા છે, ત્યારે ભારત તેમની સુરક્ષા નીતિઓ, આર્થિક ભાગીદારી અને વિદેશી સંબંધો પર ઝીણવટભરી નજર રાખશે.

પ્રાદેશિક સુરક્ષા અને લઘુમતીઓની સ્થિતિ : 

બાંગ્લાદેશમાં છેલ્લા કેટલાક સમયથી અસ્થિરતાનો માહોલ હતો અને હિન્દુ લઘુમતીઓ પરના હુમલાઓએ ભારતની ચિંતા વધારી હતી. BNP એ આ પ્રકારની હિંસાની ટીકા કરી છે, જે એક હકારાત્મક સંકેત માનવામાં આવે છે. ભારતને આશા છે કે નવી સરકારના આવવાથી ત્યાં શાંતિ સ્થપાશે અને કટ્ટરપંથી શક્તિઓ પર લગામ કસાશે.

પાકિસ્તાન અને ચીનનું પરિબળ : 

મુહમ્મદ યુનુસના નેતૃત્વ વાળી વચગાળાની સરકાર દરમિયાન પાકિસ્તાન સાથેની વધતી નિકટતા ભારત માટે ચિંતાનો વિષય હતી. હવે ભારત એ જોશે કે તારિક રહેમાનની નવી સરકાર ચીન અને પાકિસ્તાન સાથે કેવા પ્રકારનું સંતુલન જાળવે છે. જો BNP પાડોશી પ્રથમની નીતિ અપનાવીને ભારત સાથે સહકાર વધારશે, તો બંને દેશોના સંબંધો નવી ઊંચાઈએ પહોંચી શકે છે.