અવિમુક્તેશ્વરાનંદ સ્વામીએ આરોપોને ગણાવ્યા ષડયંત્ર

ઉત્તર પ્રદેશના પ્રયાગરાજમાં જ્યોતિષ પીઠના શંકરાચાર્ય સ્વામી અવિમુક્તેશ્વરાનંદ સરસ્વતી વિરુદ્ધ ગંભીર કાયદાકીય કાર્યવાહી શરૂ થઈ છે. ઝૂંસી પોલીસ સ્ટેશનમાં તેમની સામે યૌન શોષણ અને પોક્સો એક્ટ હેઠળ ફરિયાદ દાખલ કરવામાં આવી છે. આ મામલે શંકરાચાર્યની પ્રથમ પ્રતિક્રિયા પણ સામે આવી છે, જેમાં તેમણે આ સમગ્ર ઘટનાને બદનામ કરવાનું અને ગૌરક્ષાના મુદ્દે ચાલી રહેલા આંદોલનને રોકવાનું ષડયંત્ર ગણાવ્યું છે.

કોર્ટના આદેશ બાદ પોલીસની કાર્યવાહી : 

ગઈકાલે ૨૧ ફેબ્રુઆરીના રોજ સ્પેશિયલ પોક્સો કોર્ટે શંકરાચાર્ય અને તેમના શિષ્ય સ્વામી મુકુંદાનંદ ગિરી વિરુદ્ધ ફરિયાદ દાખલ કરવાનો આદેશ આપ્યો હતો. શ્રી કૃષ્ણ જન્મભૂમિ મુક્તિ નિર્માણ ટ્રસ્ટના અધ્યક્ષ આશુતોષ બ્રહ્મચારી મહારાજ દ્વારા આ મામલે અરજી કરવામાં આવી હતી. આરોપ લગાવનારા સગીરોએ અગાઉ કોર્ટમાં વીડિયોગ્રાફી સાથે પોતાના નિવેદનો નોંધાવ્યા હતા, જેના આધારે અદાલતે પોલીસને તપાસના આદેશ આપ્યા છે.

શંકરાચાર્યની આકરી પ્રતિક્રિયા : 

પોતાની વિરુદ્ધ દાખલ થયેલી ફરિયાદ અંગે વાત કરતા શંકરાચાર્યએ જણાવ્યું હતું કે તેમને અંદાજ હતો કે તેમની સામે કાયદાકીય ગૂંચ ઉભી કરવામાં આવશે, પરંતુ આટલા નીચ સ્તરના આક્ષેપો થશે તેવી તેમણે કલ્પના પણ કરી ન હતી. તેમણે આક્ષેપ કર્યો હતો કે ગૌ હત્યાના વિરોધમાં અને ગૌ માતાને રાષ્ટ્રમાતાનો દરજ્જો અપાવવા માટે તેઓ જે ધર્મ યુદ્ધ લડી રહ્યા છે, તેનાથી ડરીને વિરોધીઓ આવી હરકતો કરી રહ્યા છે. તેમણે વધુમાં ઉમેર્યું કે ભલે ગમે તેટલા આરોપ લાગે, પરંતુ તેમનું મનોબળ ડગશે નહીં.

તપાસમાં સહયોગ અને ધરપકડ પર વલણ : 

ધરપકડની સંભાવના અંગે શંકરાચાર્યએ સ્પષ્ટ કર્યું હતું કે તેઓ તપાસમાં સંપૂર્ણ સહયોગ આપવા તૈયાર છે. તેમણે કહ્યું કે તેઓ ક્યારેય કાયદાથી ભાગ્યા નથી અને જો પોલીસ પૂછપરછ કરવા માંગતી હોય તો તેઓ તૈયાર છે. તેમણે આ સમગ્ર પ્રક્રિયાને શાસન અને પોલીસ દ્વારા કરવામાં આવતું અપમાન ગણાવ્યું હતું, છતાં ન્યાયતંત્ર પર વિશ્વાસ વ્યક્ત કરતા કહ્યું હતું કે સત્ય ટૂંક સમયમાં સામે આવશે.

શું છે મુખ્ય વિવાદ ?

આશુતોષ બ્રહ્મચારીએ કોર્ટમાં પુરાવા તરીકે કેટલીક સીડી પણ રજૂ કરી છે અને દાવો કર્યો છે કે તેમને ન્યાય મળ્યો છે. બીજી તરફ શંકરાચાર્યએ આરોપ લગાવનાર વ્યક્તિને હિસ્ટ્રીશીટર ગણાવીને આ મામલાને સંપૂર્ણપણે બનાવટી ગણાવ્યો છે. તેમનું કહેવું છે કે પોક્સો એક્ટના નિયમોનું ઉલ્લંઘન કરીને માત્ર તેમની છબી ખરડવા માટે આ સમાચાર ફેલાવવામાં આવી રહ્યા છે. હવે આ મામલે આગામી દિવસોમાં પોલીસ પૂછપરછ અને પુરાવાઓની તપાસ બાદ ચિત્ર વધુ સ્પષ્ટ થશે.