ઉજ્જૈનમાં વિવાદ

મધ્યપ્રદેશના પવિત્ર શહેર ઉજ્જૈનમાં એક બિન-હિન્દુ યુવક પર હિન્દુ વેશમાં મહાકાલ મંદિર સહિત અન્ય મંદિરોમાં દર્શન કરવા અને હિન્દુ મહિલાના આધાર કાર્ડનો ઉપયોગ કરીને હોટલમાં રોકાવાનો ગંભીર આરોપ લાગ્યો છે. આ યુવકનું નામ ઝફર છે અને તે ચંદીગઢનો રહેવાસી છે. બજરંગ દળના કાર્યકરોએ તેને પકડીને માર માર્યો, જેમાં તેના માથે ગંભીર ઈજા થઈ છે. પોલીસે તેને હોસ્પિટલમાં દાખલ કર્યો છે અને આ મામલાની તપાસ શરૂ કરી છે.

ઘટનાની વિગતો

 મળતી માહિતી મુજબ ઝફર દિલ્હીથી એક હિન્દુ મહિલા સાથે ઉજ્જૈન આવ્યો હતો. તેણે હિન્દુ ભક્ત જેવો વેશ ધારણ કર્યો હતો – ધોતી-કુર્તા પહેર્યા, કપાળ પર અષ્ટગંધ ચંદનનું તિલક લગાવ્યું અને ગળામાં રુદ્રાક્ષની માળા પહેરી હતી. તેણે હિન્દુ મહિલાના આધાર કાર્ડનો ઉપયોગ કરીને નાનખેડા વિસ્તારની એક હોટલમાં રૂમ બુક કર્યો હતો. મહાકાલ મંદિર સહિત અન્ય મુખ્ય મંદિરોમાં દર્શન કર્યા હોવાનો પણ આરોપ છે.

બજરંગ દળની કાર્યવાહી

 બજરંગ દળના કાર્યકરોને માહિતી મળી કે એક બિન-હિન્દુ યુવક હિન્દુ વેશમાં શહેરમાં ફરી રહ્યો છે. તેઓએ દિવસભર તેની શોધખોળ કરી. સાંજે જ્યારે યુવક હોટલ પર પહોંચ્યો ત્યારે તેને પકડી લીધો. પૂછપરછ દરમિયાન તેના એક સાથીએ તેને 'ઝફર' કહીને બોલાવ્યો, જેનાથી મામલો ખુલી ગયો. કાર્યકરોએ તેને માર માર્યો અને માથે લાકડીથી વડે ઘા માર્યા, જેના કારણે તે લોહીલુહાણ થઈ ગયો. બાદમાં તેને તબીબી સારવાર માટે હોસ્પિટલમાં ખસેડવામાં આવ્યો.

પોલીસ તપાસ અને વિવાદ

 નાનખેડા પોલીસે યુવકને હિરાસતમાં લીધો છે અને તેની સાથે રહેલી મહિલાની પણ પૂછપરછ કરી રહી છે. પોલીસ અધિકારીઓએ જણાવ્યું કે આ મામલાની તપાસ ચાલુ છે અને કાયદેસર કાર્યવાહી કરવામાં આવશે. આ ઘટનાએ ઉજ્જૈનમાં વિવાદ ઉભો કર્યો છે અને હિન્દુ સંગઠનો તેને ગંભીર બાબત ગણાવી રહ્યા છે. બીજી તરફ અમુક લોકો આને ધાર્મિક ઉશ્કેરણી તરીકે જોઈ રહ્યા છે.