અજિત પવાર અને પરિવારને બેન્ક કૌભાંડમાં ક્લીનચીટ

મહારાષ્ટ્રના રાજકીય વર્તુળોમાંથી એક અત્યંત મહત્વના સમાચાર સામે આવ્યા છે. અંદાજે ₹25,000 કરોડના કથિત મહારાષ્ટ્ર સ્ટેટ કો-ઓપરેટિવ બેન્ક કૌભાંડમાં દિવંગત નેતા અજિત પવાર, તેમના પત્ની સુનેત્રા પવાર અને ભત્રીજા રોહિત પવાર સહિતના તમામ આરોપીઓને મોટી રાહત મળી છે. સ્પેશિયલ કોર્ટે આ મામલે મુંબઈ પોલીસની આર્થિક ગુના શાખા (EOW) દ્વારા રજૂ કરવામાં આવેલા તપાસ બંધ કરવાના અહેવાલ એટલે કે 'ક્લોઝર રિપોર્ટ'ને સત્તાવાર રીતે મંજૂરી આપી દીધી છે.

શું હતો સમગ્ર મામલો ?

આ કેસ સહકારી બેન્કોમાં લોન વિતરણ અને અનિયમિતતાઓને લગતો હતો, જેમાં અનેક દિગ્ગજ નેતાઓના નામ ઉછળ્યા હતા. વર્ષો સુધી ચાલેલી તપાસ બાદ આર્થિક ગુના શાખાએ તારણ કાઢ્યું હતું કે આ મામલે પૂરતા પુરાવા ઉપલબ્ધ નથી. કોર્ટે આ રિપોર્ટને સ્વીકારી લેતા હવે પવાર પરિવાર પર લાગેલા કૌભાંડના આરોપો કાયદાકીય રીતે ધોવાઈ ગયા છે.

ED અને અન્ના હજારેની દલીલો નકારી : 

આ કેસમાં એન્ફોર્સમેન્ટ ડિરેક્ટોરેટ (ED) અને સામાજિક કાર્યકર અન્ના હજારે દ્વારા તપાસ ચાલુ રાખવા માટે વિરોધ અરજીઓ દાખલ કરવામાં આવી હતી. જોકે, સ્પેશિયલ જજ મહેશ કે. જાધવે આ તમામ અરજીઓને ફગાવી દીધી છે. કોર્ટે અવલોકન કર્યું હતું કે અગાઉ પણ આવી જ વિનંતીઓ નકારવામાં આવી હતી.

કાયદાકીય જોગવાઈઓ મુજબ, જો મુખ્ય ગુના (Predicate Offence) માં કોઈ તથ્ય ન મળે અને પોલીસ તપાસ બંધ કરી દે, તો તેમાંથી ઉદભવતો મની લોન્ડરિંગનો કેસ પણ ટકી શકતો નથી. આ સુપ્રીમ કોર્ટના પ્રસ્થાપિત નિયમને આધારે EDની તપાસનો આધાર જ હવે સમાપ્ત થઈ ગયો છે.

દિવંગત અજિત પવાર અને વિમાન દુર્ઘટના : 

આ ચુકાદો એવા સમયે આવ્યો છે જ્યારે મહારાષ્ટ્રના રાજકારણે તેના એક કદાવર નેતા ગુમાવ્યા છે. 28 જાન્યુઆરી, 2026 ના રોજ એક કરુણ વિમાન દુર્ઘટનામાં અજિત પવારનું અવસાન થયું હતું. મુંબઈથી બારામતી જઈ રહેલું તેમનું ચાર્ટર્ડ પ્લેન ઉતરાણ સમયે દુર્ઘટનાગ્રસ્ત થયું હતું. આ ઘટનામાં 66 વર્ષીય પૂર્વ નાયબ મુખ્યમંત્રી સહિત કુલ પાંચ વ્યક્તિઓએ જીવ ગુમાવ્યા હતા. હાલમાં આ વિમાન દુર્ઘટના પાછળના કારણોની તપાસ CID અને ઉડ્ડયન વિભાગ દ્વારા કરવામાં આવી રહી છે.