ગ્વાલિયર હોસ્પિટલમાં બાળકોના સિરપમાંથી કીડા મળ્યા

મધ્ય પ્રદેશના ગ્વાલિયરની જિલ્લા હોસ્પિટલમાં બાળકોને આપવામાં આવતા એક સિરપને લઈને ચોંકાવનારી ફરિયાદ સામે આવી છે. હોસ્પિટલમાં દાખલ એક બાળકના વાલીએ બાળકો માટેના એન્ટિબાયોટિક સિરપની બોટલમાંથી કીડા નીકળ્યા હોવાની ફરિયાદ કરતા આરોગ્ય વિભાગમાં ખળભળાટ મચી ગયો છે. આ ઘટના બાળકને દવા આપતી વખતે બની હતી, ત્યારબાદ વાલીઓએ તાત્કાલિક ડૉક્ટરોને જાણ કરી હતી.

સિરપનું વિતરણ બંધ

આ ફરિયાદ મળતાં જ હોસ્પિટલ મેનેજમેન્ટ સક્રિય થયું હતું. સિવિલ સર્જન ડૉ. આર.કે. શર્માએ આ મામલાની ગંભીરતાને ધ્યાનમાં લઈને એઝિથ્રોમાયસિન (Azithromycin) સિરપનું વિતરણ તાત્કાલિક અસરથી બંધ કરવાના નિર્દેશ આપ્યા હતા. દવા વિતરણ કેન્દ્ર પર રાખવામાં આવેલી સિરપની તમામ 290 બોટલોને પરત સ્ટોરમાં જમા કરાવી દેવામાં આવી છે.

હોસ્પિટલના સૂત્રો અનુસાર, કુલ 306 બોટલો હતી, જેમાંથી 16 બોટલોના નમૂના પરીક્ષણ માટે લેવામાં આવ્યા છે. હવે આ નમૂનાઓને તપાસ માટે પ્રયોગશાળામાં ભોપાલ મોકલવામાં આવશે, જેથી સિરપમાં કીડા કઈ રીતે અને કયા સંજોગોમાં ઉત્પન્ન થયા તે સ્પષ્ટ થઈ શકે.

તપાસ બાદ થશે કાર્યવાહી

ડૉ. શર્માએ જણાવ્યું કે હોસ્પિટલમાં બે કંપનીઓના એઝિથ્રોમાયસિન સિરપની સપ્લાય થાય છે અને બંને કંપનીની દવાઓ ભોપાલથી મંગાવવામાં આવે છે. હાલમાં એ તપાસ કરવામાં આવી રહી છે કે ફરિયાદ કઈ કંપનીની દવાને લગતી છે. વહીવટીતંત્રે હાલમાં બાળકો માટે અન્ય કોઈ પણ સિરપનું વિતરણ અટકાવી દીધું છે અને વૈકલ્પિક દવાઓનો બંદોબસ્ત કરવામાં આવી રહ્યો છે.

જિલ્લા આરોગ્ય વિભાગે પણ આ ઘટનાની તપાસના આદેશ આપ્યા છે. દવાના બેચ નંબર અને સપ્લાયરની માહિતી એકત્રિત કરવામાં આવી રહી છે. તપાસ રિપોર્ટ આવ્યા બાદ દોષિત કંપની અથવા સપ્લાયર સામે કડક કાર્યવાહી કરવામાં આવશે. ડ્રગ ઇન્સ્પેક્ટર અનુ શર્માએ જણાવ્યું કે બાકીના સ્ટોકને ફ્રીઝ કરી દેવાયો છે અને રિપોર્ટ આવ્યા બાદ તેના પર નિર્ણય લેવાશે. વિભાગે નાગરિકોને અપીલ કરી છે કે દવાઓમાં કોઈ શંકાસ્પદ વસ્તુ દેખાય તો તુરંત જિલ્લા પ્રશાસન અથવા ડ્રગ ઇન્સ્પેક્ટરને જાણ કરવી.