UPI ફેલ થતાં રેલવે સ્ટેશન પર મુસાફર સાથે શું થયું?

મધ્ય પ્રદેશના જબલપુર રેલવે સ્ટેશન પર બે સમોસાની કિંમત માટે એક મુસાફરને પોતાની સ્માર્ટવોચ ગુમાવવાનો વારો આવ્યો હતો. UPI પેમેન્ટ ફેલ થતા એક નાસ્તાના વેપારીએ મુસાફરને ટ્રેનમાં ચડતા અટકાવ્યો અને તેની સાથે બળજબરી કરી, જેનો વીડિયો વાયરલ થતાં રેલવે પ્રોટેક્શન ફોર્સ (RPF)એ વેપારીની ધરપકડ કરી છે.

આ આશ્ચર્યજનક ઘટના 17 ઓક્ટોબરના રોજ સાંજે લગભગ 5.30 વાગ્યે બની હતી. સોશિયલ મીડિયા પોસ્ટ્સ અનુસાર, એક મુસાફરે પ્લેટફોર્મ પરના વેપારી પાસેથી બે સમોસા લીધા અને UPI દ્વારા પેમેન્ટ કરવાનો પ્રયાસ કર્યો, પરંતુ ટ્રાન્ઝેક્શન નિષ્ફળ ગયું. તે જ સમયે, તેની ટ્રેન ચાલવા લાગી. ટ્રેન પકડવાની ઉતાવળમાં, મુસાફરે સમોસા વેપારી પાસે છોડીને દોડવાનો પ્રયાસ કર્યો.

#Madhyapradesh #Jabalpur રેલવે સ્ટેશન પર 2 સમોસા માટે મુસાફરને સ્માર્ટવોચ ગુમાવવી પડી,

UPI ફેલ થતા વેપારી દોડતા મુસાફરને અટકાવતો હતો, RPFએ વેપારીને ધરપકડ કરી.
#RailwayNews #RPFAction #UPIIncident #ViralVideo #MPNews #BenefitNews pic.twitter.com/SqACVYpBmF

— Benefit News 24 (@BenefitNews24) October 19, 2025

પરંતુ વેપારીને આ મંજૂર નહોતું. વીડિયોમાં સ્પષ્ટ દેખાય છે કે વેપારીએ દોડતા મુસાફરનો કોલર પકડીને તેને આગળ વધતો અટકાવ્યો. વેપારીએ મુસાફર પર સમય બગાડવાનો આરોપ લગાવ્યો અને બળજબરીથી સમોસા ખરીદવા દબાણ કર્યું.

રોકડ ન હોવાથી, મુસાફરે ફરી એકવાર UPI દ્વારા પેમેન્ટ કરવાનો નિષ્ફળ પ્રયાસ કર્યો. ટ્રેનની ગતિ વધવા લાગતાં અને ટ્રેન છૂટી જવાની ભીતિથી ગભરાયેલા મુસાફરે અંતે તેના હાથમાં પહેરેલી સ્માર્ટવોચ ઉતારીને વેપારીને આપી દીધી. ઘડિયાળ લીધા પછી જ વેપારીએ તેને છોડ્યો.

વીડિયોમાં વેપારી ઘડિયાળ લીધા બાદ સમોસા મુસાફરને આપતો જોવા મળે છે. મુસાફર માંડ-માંડ સ્ટેશન છોડી રહેલી ટ્રેનમાં ચડી શક્યો. 

રેલવે ડિવિઝને લીધું પગલું

આ ઘટનાનો વીડિયો X (અગાઉ ટ્વિટર) પર વાયરલ થયા બાદ, જબલપુર રેલવે ડિવિઝન દ્વારા તાત્કાલિક કાર્યવાહી કરવામાં આવી હતી. તેમણે પોસ્ટનો જવાબ આપતાં જણાવ્યું કે વેપારીની RPF દ્વારા ધરપકડ કરવામાં આવી છે અને તેનું લાઇસન્સ પણ રદ કરવામાં આવી રહ્યું છે. જોકે, અધિકારીઓએ વેપારી પાસેથી ઘડિયાળ પાછી મેળવવામાં આવી છે કે કેમ અથવા ભોગ બનનાર મુસાફરની ઓળખ કરીને ઘડિયાળ પરત કરવામાં આવશે કે કેમ, તે અંગે કોઈ માહિતી આપી નથી.