ગુજરાતની જેમ રાજસ્થાનમાં પણ ચોમાસુ ફરી સક્રિય થયું છે જેના કારણે રાજ્યના અનેક જિલ્લાઓમાં ભારે વરસાદ પડી રહ્યો છે. 
હવામાન વિભાગે આજે, શનિવારે 30 જિલ્લાઓ માટે યલો એલર્ટ જાહેર કર્યું છે.&nbsp;ભારે વરસાદને કારણે ચિત્તોડગઢ, સાલુમ્બર અને ઉદયપુર (ગ્રામ્ય)માં શાળાઓ બંધ રાખવાની જાહેરાત કરવામાં આવી છે, જ્યારે આગામી ચાર દિવસ સુધી પણ વરસાદ ચાલુ રહેવાની શક્યતા છે.
ગઈકાલે, શુક્રવારે ઉદયપુર, ડુંગરપુર, રાજસમંદ, ચિત્તોડગઢ અને જયપુર જેવા જિલ્લાઓમાં 1થી 4 ઇંચ સુધીનો વરસાદ નોંધાયો છે. ભારે વરસાદને કારણે અનેક દુર્ઘટનાઓ પણ બની છે:
ચિત્તોડગઢમાં રૂપારેલ નદીના જોરદાર પ્રવાહમાં એક જ પરિવારના પાંચ સભ્યો તણાઈ ગયા હતા. જેમાંથી ત્રણને બચાવી લેવાયા છે, પરંતુ માતા અને પુત્રી હજુ પણ ગુમ છે. પાલીમાં નદીના પ્રવાહમાં બાઈક સાથે તણાઈ ગયેલા એક દંપતીએ ઝાડ અને ઝાડીઓ પકડીને પોતાનો જીવ બચાવ્યો. જ્યારે ઉદયપુરના પનારાવ-કોટડા હાઇવે પર આવેલો એક પુલનો અડધો ભાગ તૂટી પડ્યોના અહેવાલ મળ્યા હતા.&nbsp;
છેલ્લા 24 કલાકમાં રાજસમંદના ખામનોરમાં સૌથી વધુ 104 મીમી વરસાદ નોંધાયો છે. આ ઉપરાંત અન્ય વિસ્તારોમાં પણ ભારે વરસાદ થયો છે જેમાં જયપુર, પાલી, ચિત્તોડગઢ, ઉદયપુર, ભીલવાડા, અજમેર, સિરોહી, ટોંક અને સીકરનો સમાવેશ થાય છે.
હવામાનની આગાહી
હવામાન વિભાગના જણાવ્યા અનુસાર, હાલમાં ચોમાસાની ખાડી બિકાનેર, કોટા, ગુના, દમોહ, સંબલપુર અને પુરીથી બંગાળની ખાડી સુધી વિસ્તરેલી છે. આ ઉપરાંત ઓડિશા-છત્તીસગઢ પર એક લો-પ્રેશર સિસ્ટમ પણ સક્રિય છે. આ સિસ્ટમની અસરને કારણે આગામી ત્રણ-ચાર દિવસ સુધી રાજ્યના વિવિધ ભાગોમાં વરસાદ ચાલુ રહેવાની સંભાવના છે, જેના પગલે સ્થાનિક વહીવટીતંત્રને સાવચેતી રાખવાની સૂચના આપવામાં આવી છે.

રાજસ્થાનનાં 30 જિલ્લામાં યલો એલર્ટ

છેલ્લા 24 કલાકમાં 104 મીમી વરસાદ, શાળાઓ બંધ, જનજીવન પર અસર

August 30, 2025 | 15:56 IST