આયોધ્યામાં ભીષણ વિસ્ફોટ, ત્રણ બાળકો સહિત 5નાં મોત.

ઉત્તર પ્રદેશના આયોધ્યામાં ગઈ કાલે સાંજે પૂરા કલંદર પોલીસ સ્ટેશન વિસ્તારના પગલાભારી ગામમાં એક ભીષણ વિસ્ફોટની ઘટનાથી આખું ગામ હચમચી ગયું હતું. વિસ્ફોટ એટલો જોરદાર હતો કે એક આખું મકાન એક ઝટકામાં જમીનદોસ્ત થઈ ગયું અને તેના કાટમાળમાં દટાઈ જવાથી ત્રણ બાળકો સહિત કુલ 5 લોકોના કરૂણ મોત નિપજ્યા છે. ઘટના બાદ તરત જ શરૂ કરાયેલું રેસ્ક્યુ ઓપરેશન 12 કલાકથી વધુ સમય સુધી ચાલુ રહ્યું હતું.

વિસ્ફોટનું ભયાનક દ્રશ્ય

વિસ્ફોટ બાદ ઘટનાસ્થળ પરનું દ્રશ્ય અત્યંત ભયાનક હતું, જ્યાં શબના ચિથરા ઉડી ગયા હતા અને ચારેબાજુ ચીસો-પોકાર મચી ગઈ હતી. મૃતકોમાં રામકુમાર ગુપ્તા ઉર્ફે પપ્પુનો પણ સમાવેશ થાય છે, જેના મકાનમાં આ વિસ્ફોટ થયો હતો. આસપાસના લોકોના જણાવ્યા મુજબ, ધમાકાનો અવાજ કેટલાક કિલોમીટર દૂર સુધી સંભળાયો હતો અને આસપાસના ઘરોની દીવાલો પણ હચમચી ઉઠી હતી. ઢગલામાં અન્ય લોકો દટાયા હોવાની આશંકાના કારણે મોડી સાંજથી શરૂ થયેલું બચાવ કાર્ય સવાર સુધી ચાલુ રહ્યું હતું.

પ્રાથમિક તપાસમાં કારણ: ઘરેલું ગેસ સિલિન્ડર

ઘટનાની જાણ થતાં જ ભારે પોલીસ કાફલા સાથે ફાયર બ્રિગેડ, બોમ્બ ડિસ્પોઝલ સ્ક્વોડ (BDS) અને ATSની ટીમ પણ ઘટનાસ્થળે પહોંચી ગઈ હતી. પોલીસે સમગ્ર વિસ્તારને સીલ કરી દીધો હતો. પ્રાથમિક તપાસમાં આ ધમાકો કોઈ પટાખા કે વિસ્ફોટક પદાર્થના કારણે થયો હોવાનું સામે આવ્યું નથી. સ્થળ પરથી ફાટેલો કુકર અને ગેસ સિલિન્ડરના અવશેષો મળી આવ્યા છે, જેના આધારે વિસ્ફોટનું કારણ ઘરેલું ગેસ સિલિન્ડર ફાટવું હોવાની શક્યતા છે. જોકે, વિસ્ફોટના ચોક્કસ કારણો જાણવા માટે BDS અને ફોરેન્સિક સાયન્સ લેબોરેટરી (FSL)ની ટીમો દ્વારા સઘન તપાસ કરવામાં આવી રહી છે.