નશામાં ધૂત કારચાલકે બાઈક ચાલકને ઢસડ્યો, 2 ગંભીર

મહીસાગર જિલ્લાના હાલોલ-શામળાજી હાઈવે પર હીટ એન્ડ રનની ઘટના સામે આવે છે. નશાની હાલતમાં કાર ચલાવી રહેલા એક શિક્ષક દ્વારા બાઈકને જોરદાર ટક્કર મારવામાં આવી અને ત્યારબાદ કોઈ પણ દયા કે માનવતા દાખવ્યા વિના બાઈક ચાલકને લગભગ 3થી 4 કિલોમીટર સુધી રસ્તા પર ઢસેડવામાં આવ્યો હતો. આ અત્યંત ચોંકાવનારી હીટ એન્ડ રનની ઘટનાનો વીડિયો સોશિયલ મીડિયા પર વાયરલ થતાં સમગ્ર ગુજરાતમાં આ બનાવની નિંદા થઈ રહી છે.

કારે બાઈકને મારી ટક્કર

પ્રાથમિક માહિતી મુજબ, હાઈવે પર પૂરઝડપે દોડી રહેલી એક કારે બાઈકને ટક્કર મારી હતી. ટક્કર એટલી જોરદાર હતી કે, બાઈક અને તેના પર સવાર વ્યક્તિ કારના આગળના ભાગે નીચેના ભાગમાં ફસાઈ ગયા. ભયાનક અકસ્માત સર્જાયા પછી પણ કારચાલકે કાર રોકવાની જગ્યાએ તેને વધુ ઝડપે દોડાવવાનું ચાલુ રાખ્યું. બાઈક અને ચાલકને રસ્તા પર ઢસડાતા જોઈને અન્ય વાહનચાલકો સ્તબ્ધ થઈ ગયા હતા અને કારને રોકવા માટે પીછો કરીને બૂમો પણ પાડી હતી, પરંતુ નશામાં ધૂત કારચાલકે કોઈની વાત સાંભળી ન હતી. અન્ય વાહનચાલકોએ તુરંત જ આ ભયાનક ઘટનાની જાણ બાકોર પોલીસને કરી હતી, અને સાથે જ તેનો વીડિયો પોતાના મોબાઈલમાં કેદ કરી લીધો હતો, જે વાયરલ થતાં પુરાવો બન્યો છે.

આ પણ વાંચો: હીટ એન્ડ રન: નારોલ-વિશાલા બ્રિજ પર 24 વર્ષીય યુવતીનું ઘટના સ્થળે મોત 

પોલીસે 2 લોકોનીની કરી ધરપકડ

પોલીસને જાણ થતાં જ બાકોર પોલીસની ટીમ તાત્કાલિક કાર્યવાહીમાં જોડાઈ અને આખરે કારચાલકને પકડી પાડ્યો હતો. પોલીસ તપાસમાં કારમાં સવાર બન્ને વ્યક્તિઓ નશાની હાલતમાં હોવાનું બહાર આવ્યું છે. કારચાલક મનીષ પટેલ લુણાવાડા તાલુકાનો રહેવાસી છે અને તે વડોદરામાં શિક્ષક તરીકે ફરજ બજાવે છે. તેની સાથે મેહુલ પટેલ નામનો અન્ય એક વ્યક્તિ પણ કારમાં હતો, જે પણ નશાની હાલતમાં મળી આવ્યો હતો. પોલીસે નશાની હાલતમાં કાર ચલાવનાર શિક્ષક મનીષ પટેલ અને તેની સાથેના મેહુલ પટેલની ધરપકડ કરી છે અને કારને ડિટેન કરીને બાકોર પોલીસ સ્ટેશન ખાતે વધુ તપાસ શરૂ કરી છે.

બાઈક પર સવાર 2 લોકો ગંભીર ઈજાગ્રસ્ત

આ અકસ્માતમાં બાઈક પર સવાર 2 લોકો ગંભીર રીતે ઈજાગ્રસ્ત થયા છે. 50 વર્ષીય દિનેશભાઈ સરેલને કપાળ અને આંખની આસપાસ ગંભીર ઈજા પહોંચી છે, જ્યારે 18 વર્ષીય સુનિલ મચ્છર નામના યુવાનને પણ ગંભીર ઈજા થતા તેને ગોધરા સિવિલ હોસ્પિટલમાં ખસેડવામાં આવ્યો છે. દિનેશભાઈને લુણાવાડા સિવિલ હોસ્પિટલમાં દાખલ કરવામાં આવ્યા છે. બાકોર પોલીસે નશામાં ધૂત શિક્ષક સામે કાયદેસરની કાર્યવાહી હાથ ધરીને ગુનો નોંધ્યો છે અને આ અત્યંત સંવેદનશીલ કેસમાં ન્યાય મળે તે દિશામાં તપાસ આગળ વધારી છે. આ ઘટનાએ ફરી એકવાર નશાબંધીના કાયદાના અમલ અને રોડ સેફ્ટીના નિયમોની ગંભીરતા તરફ ધ્યાન દોર્યું છે.