ગુજરાત સહિત સમગ્ર ભારતના જૈન સમુદાયે પોતાની પ્રબળ ખરીદશક્તિનો પ્રભાવશાળી દેખાવ કર્યો છે. જૈન ઇન્ટરનેશનલ ટ્રેડ ઓર્ગેનાઇઝેશન (JITO) દ્વારા BMW, Audi અને Mercedes જેવી લક્ઝરી ઓટોમોબાઇલ બ્રાન્ડ્સ સાથે એક અનોખી ડીલ કરવામાં આવી, જેના દ્વારા 186 હાઇ-એન્ડ કારની ખરીદી પર સમુદાયના સભ્યોને કુલ ₹21&nbsp;કરોડનું જંગી ડિસ્કાઉન્ટ મળ્યું છે. આ માહિતી JITOના વાઇસ પ્રેસિડેન્ટ હિમાંશુ શાહે આપી હતી.
ગુજરાતના જૈનોએ મારી બાજી
JITO, 65,000 સભ્યો ધરાવતી એક નોટ-ફોર-પ્રોફિટ સંસ્થા છે, તેણે આ ડીલ દ્વારા સમુદાયના સભ્યોને સીધો લાભ અપાવ્યો. આ 186 લક્ઝરી કાર, જેની કિંમત ₹60&nbsp;લાખથી ₹1.3&nbsp;કરોડની વચ્ચે હતી, તે ચાલુ વર્ષે જાન્યુઆરીથી જૂન મહિના દરમિયાન માલિકોને સોંપવામાં આવી હતી. શાહે સ્પષ્ટ કર્યું કે JITO માત્ર એક સૂત્રધાર&nbsp;હતું અને તેણે આ ડીલમાંથી કોઈ નફો મેળવ્યો નથી. રસપ્રદ વાત એ છે કે આ ખરીદારીમાં મોટા ભાગની કાર ગુજરાત સ્થિત જૈનો દ્વારા ખરીદવામાં આવી છે.
માર્કેટિંગ ખર્ચ બચાવી કંપનીઓને પણ લાભ
આ પહેલનું નેતૃત્વ કરનાર નીતિન જૈને જણાવ્યું કે આ વિચાર સમુદાયની મજબૂત ખરીદશક્તિનો લાભ લેવા અને સીધો કાર ઉત્પાદકો પાસેથી જંગી ડિસ્કાઉન્ટ મેળવવા માટે આવ્યો હતો. જૈન સમુદાયની ખરીદશક્તિને ધ્યાનમાં રાખીને, બ્રાન્ડ્સનો સીધો સંપર્ક કરવામાં આવ્યો. કાર નિર્માતાઓએ પણ આમાં 'WIN- WIN' પરિસ્થિતિ જોઈ, કારણ કે આ મોટી ડીલથી તેમનો માર્કેટિંગ ખર્ચ દૂર થયો અને તેઓએ ભારે ડિસ્કાઉન્ટ ઓફર કર્યા.
આ ડીલ હેઠળ સરેરાશ દરેક સભ્યએ ₹8&nbsp;લાખથી ₹17 લાખ સુધીની બચત કરી, જેમાંથી એક સભ્ય આ બચતમાંથી પરિવાર માટે બીજી કાર ખરીદી શકે એટલી રકમ હતી.
આ લક્ઝરી કાર ડીલની સફળતાથી ઉત્સાહિત થઈને JITOએ હવે 'ઉત્સવ' નામની એક નવી પહેલ શરૂ કરી છે. આ પહેલ હેઠળ, સંસ્થા હવે જ્વેલરી, કન્ઝ્યુમર ડ્યુરેબલ્સ અને ઇલેક્ટ્રોનિક્સ ક્ષેત્રની મુખ્ય બ્રાન્ડ્સ સાથે પણ સમાન વ્યવસ્થા કરીને પોતાના સભ્યોને લાભ પહોંચાડવાની યોજના ધરાવે છે. આનાથી સ્પષ્ટ થાય છે કે સંયુક્ત ખરીદશક્તિનો ઉપયોગ કરીને મોટો ફાયદો કેવી રીતે મેળવી શકાય છે.

જૈનોએ 186 લક્ઝરી કાર ખરીદી, ₹21 કરોડ બચાવ્યા

JITOના સભ્યોની ખરીદશક્તિનો પ્રભાવશાળી દેખાવ, કંપનીઓ અને ગ્રાહક બંનેને ફાયદો

October 19, 2025 | 21:19 IST