રુતુરાજની જગ્યાએ ધોની કરશે CSKની કેપ્ટનશીપ?

આઈપીએલની 18મી સીઝનમાં ચેન્નઈ સુપર કિંગ્સ (CSK)ને લગતા મહત્વના સમાચાર પ્રકાશમાં આવ્યા છે. ટીમનો નિયમિત કેપ્ટન ઋતુરાજ ગાયકવાડ ઈજાગ્રસ્ત થતાં આ સીઝનમાંથી બહાર થઈ ગયો છે. તેની ગેરહાજરીમાં એમએસ ધોની આગામી તમામ મેચમાં ટીમનું નેતૃત્વ સંભાળશે. આ જાહેરાત ટીમના મુખ્ય કોચ સ્ટીફન ફ્લેમિંગે કરી હતી.   ગાયકવાડના નેતૃત્વમાં CSKનું પ્રદર્શન નબળું રહ્યું છે. ગત સીઝનમાં ટીમ પ્લેઓફમાં જગ્યા બનાવી શકી ન હતી, અને આ વર્ષે પણ પ્રથમ પાંચમાંથી ચાર મેચમાં હારનો સામનો કરવો પડ્યો છે. હાલમાં CSK 10 ટીમોમાંથી નવમા સ્થાને છે. ગુવાહાટીમાં રાજસ્થાન રોયલ્સ સામેની મેચ દરમિયાન ઝડપી બોલર તુષાર દેશપાંડેનો બોલ ગાયકવાડની કોણીને વાગ્યો હતો. તેણે અડધી સદી ફટકારી હોવા છતાં, ચેન્નઈને હાર સ્વીકારવી પડી હતી. ઈજા બાદ તેણે થોડા દિવસો સુધી પ્રેક્ટિસ નહોતી કરી, અને હવે તે સંપૂર્ણ ટૂર્નામેન્ટમાંથી બહાર થઈ ગયો છે.   ફ્લેમિંગે જણાવ્યું કે રિપ્લેસમેન્ટ માટે ટીમ પાસે ઓછા વિકલ્પો છે. તેમણે કહ્યું, "અમારી પાસે ખેલાડીઓની પસંદગી મર્યાદિત છે, અને હજુ સુધી અમે કોઈ નિર્ણય લીધો નથી. ધોનીએ જવાબદારી લેવાની તૈયારી દર્શાવી હતી, જેના કારણે તેને કેપ્ટન તરીકે પસંદ કરવામાં આવ્યો."   ધોનીની ફિટનેસ વિશે ફ્લેમિંગે થોડા દિવસો પહેલાં જણાવ્યું હતું કે ધોનીના ઘૂંટણની સમસ્યા હજુ યથાવત છે, જેના કારણે તે સતત 10 ઓવર બેટિંગ કે દોડી શકતો નથી. આથી તેની બેટિંગ પોઝિશન મેચની પરિસ્થિતિ અનુસાર નક્કી કરવામાં આવે છે. ધોની આઈપીએલના સૌથી સફળ કેપ્ટન છે. તેમણે 226 મેચમાં નેતૃત્વ કરીને 133 જીત હાંસલ કરી છે, અને તેઓ એકમાત્ર એવા કેપ્ટન છે જેમણે 100થી વધુ મેચ જીતી છે. 2023માં તેમણે CSKને ચેમ્પિયન બનાવ્યું હતું, અને ત્યારબાદ ગાયકવાડને કેપ્ટનશીપ સોંપી હતી.