જયપુરના સવાઈ માનસિંહ સ્ટેડિયમમાં રમાઈ રહેલી વિજય હજારે ટ્રોફીમાં મુંબઈ અને ઉત્તરાખંડ વચ્ચેની મેચમાં ક્રિકેટ પ્રેમીઓને મોટી નિરાશા સાપડી છે. સિક્કિમ સામે 155 રનની તોફાની ઇનિંગ રમનાર મુંબઈના સ્ટાર બેટ્સમેન રોહિત શર્મા આ મહત્વની મેચમાં ખાતું ખોલાવ્યા વિના જ આઉટ થઈ ગયા હતા. હજારો પ્રેમીઓની સદીની આશા વચ્ચે રોહિત શર્મા ઇનિંગના પહેલા જ બોલે 'ગોલ્ડન ડક'નો શિકાર બન્યા હતા.
ફેવરિટ શોટમાં જ મળી હાર :&nbsp;
ઉત્તરાખંડના બોલર દેવેન્દ્ર સિંહ બોરાએ રોહિત શર્માને જાળમાં ફસાવવા માટે સચોટ પ્લાનિંગ કર્યું હતું. ઇનિંગની પહેલી જ ઓવરમાં બોરાએ શોર્ટ પીચ બોલ ફેંક્યો હતો. રોહિતે આ બોલ પર પોતાનો ટ્રેડમાર્ક 'પુલ શોટ' મારવાનો પ્રયાસ કર્યો હતો, પરંતુ બોલ બેટ પર યોગ્ય રીતે આવ્યો નહીં. ફાઈન લેગ પર ફિલ્ડર જગમોહન નગરકોટીએ શાનદાર કેચ ઝડપીને રોહિતની ઇનિંગનો શૂન્ય રને અંત લાવ્યો હતો.
ખાન ભાઈઓએ સંભાળ્યો મુંબઈનો મોરચો :&nbsp;
રોહિત શર્મા અને ઓપનર અંગકૃષ રઘુવંશીના વહેલા આઉટ થયા બાદ મુંબઈની ટીમ મુશ્કેલીમાં મુકાઈ હતી. જોકે, ત્યારબાદ સરફરાઝ ખાન અને મુશીર ખાનની જોડીએ શાનદાર રમત બતાવી હતી. આ બંને ભાઈઓએ મક્કમ બેટિંગ કરીને મુંબઈનો સ્કોર 100 રનને પાર પહોંચાડ્યો હતો. હાલ બંને ખેલાડીઓ અડધી સદીની નજીક રમી રહ્યા છે અને ટીમને સન્માનજનક સ્કોર તરફ લઈ જઈ રહ્યા છે.
અન્ય મેચોની સ્થિતિ :&nbsp;
વિજય હજારે ટ્રોફીના આ રાઉન્ડમાં એકતરફ રોહિત શર્મા નિષ્ફળ રહ્યા, તો બીજી તરફ વિરાટ કોહલી શાનદાર ફોર્મમાં જોવા મળી રહ્યા છે. બીજી બાજુ, બિહારના સ્ટાર ખેલાડી વૈભવ સૂર્યવંશી ઈજાને કારણે મેચમાંથી બહાર થઈ ગયા છે. હાલમાં તમામની નજર મુંબઈના મધ્યમ ક્રમના બેટ્સમેનો પર ટકેલી છે.
&nbsp;

જયપુરમાં ઉત્તરાખંડ સામે રોહિત શર્મા શૂન્ય રને પેવેલિયન ભેગા, સરફરાઝ અને મુશીરે બાજી સંભાળી

December 26, 2025 | 20:56 IST