સુમિત એન્ટિલનો નવો કીર્તિમાન

Sumit Anttil Breaks World Record: ભારતીય પેરા-એથ્લેટિક્સના સુપરસ્ટાર અને બે વખતના પેરાલિમ્પિક ગોલ્ડ મેડલ વિજેતા સુમિત એન્ટિલે ફરી એકવાર રમતજગતની દુનિયામાં નવો ઇતિહાસ રચી દીધો છે. બેંગલુરુ ખાતે આયોજિત 8મી ઇન્ડિયન ઓપન ઇન્ટરનેશનલ પેરા એથ્લેટિક્સ ચેમ્પિયનશિપ 2026 માં સુમિતે પુરુષોની ભાલા ફેંક F64 કેટેગરીમાં 74.82 મીટરનો અત્યંત શાનદાર થ્રો કરીનેને પોતાનો જ જૂનો વિશ્વ રેકોર્ડ ધ્વસ્ત કરી નાખ્યો છે. 27 વર્ષીય આ દિગ્ગજ ખેલાડીએ સ્પર્ધાના બીજા દિવસે પોતાના પાંચમા પ્રયાસમાં આ અદ્ભુત સિદ્ધિ મેળવીને મેદાનમાં હાજર તમામ લોકોને ચોંકાવી દીધા હતા. આ પ્રદર્શન સાથે જ તેમણે સ્પર્ધામાં ગોલ્ડ મેડલ પર પોતાનો કબજો જમાવ્યો છે. આ ઇવેન્ટમાં મહારાષ્ટ્રના સંદીપ સરગરે 62.88 મીટરના થ્રો સાથે સિલ્વર મેડલ અને રાજસ્થાનના સંદીપે 61.83 મીટરના થ્રો સાથે બ્રોન્ઝ મેડલ જીત્યો હતો.

જૂના રેકોર્ડમાં 1.53 મીટરનો મોટો સુધારો
હરિયાણાના સોનીપતના વતની સુમિત એન્ટિલે આ અગાઉ ચીનના હાંગઝોઉમાં આયોજિત એશિયન પેરા ગેમ્સમાં 73.29 મીટરનો થ્રો ફેંકીને વર્લ્ડ રેકોર્ડ પોતાના નામે કર્યો હતો. બેંગલુરુની ધરતી પર સુમિતે પોતાના પ્રદર્શનમાં 1.53 મીટરનો ધરખમ સુધારો કરીને નવો કીર્તિમાન સ્થાપિત કર્યો છે. નવો રેકોર્ડ બનાવ્યા બાદ અત્યંત ઉત્સાહિત દેખાતા સુમિતે જણાવ્યું, "હું છેલ્લા ઘણા સમયથી સતત વિચારી રહ્યો હતો કે હું મારો પોતાનો વિશ્વ રેકોર્ડ કેમ તોડી શકતો નથી. ઘણો સમય વીતી ગયો હતો, પરંતુ આજે હું અહીં માત્ર મારું વ્યક્તિગત શ્રેષ્ઠ પ્રદર્શન કરવાના ઈરાદા સાથે જ મેદાનમાં ઉતર્યો હતો. મને અપાર ખુશી છે કે મેં મારા રેકોર્ડમાં આશરે દોઢ મીટર જેટલો સુધારો કર્યો છે. મને પૂરી આશા છે કે હું અને મારી ટીમ આગામી પેરા એશિયન ગેમ્સમાં દેશ માટે આનાથી પણ વધુ સારું પ્રદર્શન કરી શકીશું."

એક-બે નહીં, પૂરી 7 વખત વિશ્વ રેકોર્ડ તોડ્યો
સુમિત એન્ટિલની રમતની સૌથી મોટી ખાસિયત એ છે કે તેઓ દર વખતે મેદાન પર ઉતરીને પોતાના જ રેકોર્ડને પડકારે છે. અત્યાર સુધીમાં તેમણે કુલ 7 વખત વિશ્વ રેકોર્ડ તોડવાનો ચમત્કાર કર્યો છે.
જૂન 2019 (ઈટાલી): વર્લ્ડ પેરા એથ્લેટિક્સ ચેમ્પિયનશિપમાં 60.45 મીટરના થ્રો સાથે પ્રથમ વખત વર્લ્ડ રેકોર્ડ બનાવ્યો અને સિલ્વર મેડલ જીત્યો.
નવેમ્બર 2019 (દુબઈ): વર્લ્ડ ચેમ્પિયનશિપમાં પોતાના જ રેકોર્ડને સુધારીને 62.88 મીટરનો થ્રો કર્યો.
માર્ચ 2021 (બેંગલુરુ): નેશનલ પેરા એથ્લેટિક્સ ચેમ્પિયનશિપમાં 66.90 મીટર ભાલો ફેંક્યો.
ઓગસ્ટ 2021 (ટોક્યો પેરાલિમ્પિક્સ): ટોક્યોની ફાઇનલમાં તેમણે એક જ ઇવેન્ટમાં ત્રણ-ત્રણ વખત નવો રેકોર્ડ બનાવ્યો. તેમણે અનુક્રમે 66.95 મીટર, 68.08 મીટર અને અંતે 68.55 મીટરનો ઐતિહાસિક થ્રો ફેંકી દેશને સુવર્ણ ચંદ્રક અપાવ્યો.
જુલાઈ 2023 (પેરિસ): વર્લ્ડ પેરા એથ્લેટિક્સ ચેમ્પિયનશિપમાં પહેલીવાર 70 મીટરની મર્યાદા વટાવીને 70.83 મીટર સાથે ગોલ્ડ મેડલ જીત્યો.
2023 (હાંગઝોઉ એશિયન પેરા ગેમ્સ): ચીનની ધરતી પર 73.29 મીટરનો થ્રો ફેંક્યો.
મે 2026 (બેંગલુરુ): ઇન્ડિયન ઓપનમાં 74.82 મીટરનો ભાલો ફેંકી સાતમી વખત નવો ઇતિહાસ રચ્યો.

અકસ્માતમાં પગ ગુમાવ્યો પણ હિંમત નહીં
સુમિતના જીવનની સફર અસંખ્ય યુવાનો માટે પ્રેરણારૂપ છે. વર્ષ 2015 માં એક ભયાનક મોટરસાઇકલ અકસ્માતમાં તેમણે ઘૂંટણની નીચેથી પોતાનો ડાબો પગ ગુમાવવો પડ્યો હતો. આ આઘાતજનક પરિસ્થિતિ છતાં તેમણે હાર ન માની અને રમતગમત પ્રત્યેના પોતાના જુસ્સાને જીવંત રાખ્યો. સખત પરિશ્રમ અને દ્રઢ સંકલ્પના બળે આજે તેઓ વિશ્વના સર્વશ્રેષ્ઠ પેરા-જેવલિન થ્રોઅર બન્યા છે.

શું છે F64 કેટેગરી?
પેરા જેવલિન મૂળભૂત રીતે દિવ્યાંગ ખેલાડીઓ માટેની વિશેષ ભાલા ફેંક સ્પર્ધા છે. તેમાં સમાવિષ્ટ F64 શ્રેણી એવા પેરા-એથ્લેટ્સ માટે છે જેમના નીચલા અંગોમાં ખામી હોય, પગની લંબાઈમાં તફાવત હોય અથવા જેમના ઘૂંટણની નીચેથી પગ કાપી નાખવામાં આવ્યા હોય. આ શ્રેણીના તમામ ખેલાડીઓ મેદાન પર દોડવા અને ભાલો ફેંકવા માટે અત્યંત આધુનિક 'કાર્બન-ફાઇબર કૃત્રિમ પગ' (Prosthetic Legs) નો ઉપયોગ કરે છે.

નીરજ ચોપરા પ્રેરણારૂપ, આગામી લક્ષ્ય '80 મીટર'
સુમિત એન્ટિલ ભારતના સ્ટાર ઓલિમ્પિયન નીરજ ચોપરાને પોતાના પ્રેરણારૂપ માને છે અને તેમની ટેકનિકમાંથી ઘણું શીખે છે. આ ઉપરાંત તેઓ ઓલિમ્પિક મેડલ વિજેતા કુસ્તીબાજ યોગેશ્વર દત્તના પણ મોટા ચાહક છે. રમત પ્રત્યેના તેમના અપ્રતિમ સમર્પણને ધ્યાનમાં રાખીને ભારત સરકાર દ્વારા વર્ષ 2021 માં તેમને સર્વોચ્ચ રમત સન્માન 'મેજર ધ્યાનચંદ ખેલ રત્ન' અને વર્ષ 2022 માં 'પદ્મશ્રી' પુરસ્કારથી નવાજવામાં આવ્યા હતા. છેલ્લા કેટલાક વર્ષોથી આંતરરાષ્ટ્રીય સ્તરે સતત મેડલ જીતી રહેલા સુમિતે 2020 અને 2024 ની સમર પેરાલિમ્પિક્સમાં સતત બે ગોલ્ડ મેડલ જીત્યા છે, તેમજ 2023, 2024 અને 2025 ની વર્લ્ડ પેરા એથ્લેટિક્સ ચેમ્પિયનશિપમાં પણ વિશ્વ વિજેતાનું ટાઇટલ પોતાના નામે રાખ્યું છે. સાતમી વાર વિશ્વ રેકોર્ડ તોડ્યા બાદ હવે સુમિત એન્ટિલનું આગામી લક્ષ્ય જેવલિન થ્રોમાં '80-મીટર' ના જાદુઈ આંકડાને પાર કરવાનું છે. તેમનું વર્તમાન ફોર્મ જોતા દેશવાસીઓને આશા છે કે તેઓ ટૂંક સમયમાં આ અશક્ય લાગતો ટાર્ગેટ પણ હાંસલ કરી લેશે.