હાર છતાં RCBના કેપ્ટને રચ્યો નવો ઇતિહાસ

SRH vs RCB IPL 2026: IPL 2026માં સનરાઇઝર્સ હૈદરાબાદ સામે રમાયેલી રોમાંચક મેચ દરમિયાન ડિફેન્ડિંગ ચેમ્પિયન રોયલ ચેલેન્જર્સ બેંગ્લોર (RCB) ના કેપ્ટન રજત પાટીદારે ક્રિકેટ જગતમાં એક મોટી સિદ્ધિ પોતાના નામે કરી છે. રજત પાટીદાર હવે આઈપીએલના ઈતિહાસમાં સૌથી ઓછા બોલનો સામનો કરીને 100 છગ્ગા ફટકારનાર સૌથી ઝડપી ભારતીય બેટ્સમેન બની ગયો છે. હૈદરાબાદ સામે કેપ્ટનની ઇનિંગ રમીને પાટીદારે આ ઐતિહાસિક રેકોર્ડ બનાવ્યો હતો, જોકે તેની આ શાનદાર ઇનિંગ ટીમને જીત અપાવવામાં નિષ્ફળ રહી હતી. પાટીદારે 39 બોલમાં 56 રનની ઇનિંગ રમી હતી, જેમાં છ ચોગ્ગા અને એક ગગનચુંબી છગ્ગાનો સમાવેશ થાય છે.

સૌથી ઝડપી 100 સિક્સર: આન્દ્રે રસેલ ટોચ પર
આઈપીએલમાં સૌથી ઓછા બોલમાં 100 છગ્ગા પૂરા કરવાનો વર્લ્ડ રેકોર્ડ કોલકાતા નાઈટ રાઈડર્સના વિસ્ફોટક ઓલરાઉન્ડર આન્દ્રે રસેલના નામે છે, જેણે માત્ર 657 બોલમાં આ આંકડો પાર કર્યો હતો. આ યાદીમાં 884 બોલ સાથે નિકોલસ પૂરન બીજા ક્રમે છે. રજત પાટીદાર હવે 933 બોલમાં આ સિદ્ધિ હાંસલ કરીને ઓવરઓલ યાદીમાં ત્રીજા સ્થાને અને ભારતીયોમાં પ્રથમ સ્થાને પહોંચી ગયો છે. પાટીદારે આ મામલે ક્રિસ ગેલ (943 બોલ), સુનિલ નારાયણ (950 બોલ) અને શિવમ દુબે (992 બોલ) જેવા દિગ્ગજોને પાછળ છોડી દીધા છે.

લીગ સ્ટેજમાં કિંગ સાબિત થઈ RCB, હવે ટાઇટન્સ સામે ટક્કર
ચાલુ સિઝનમાં પણ રોયલ ચેલેન્જર્સ બેંગ્લોરનું પ્રદર્શન અત્યંત પ્રભાવશાળી રહ્યું છે. પોતાના ટાઇટલને ડિફેન્ડ કરવાના મજબૂત ઇરાદા સાથે મેદાનમાં ઉતરેલી RCB ની ટીમે સમગ્ર ગ્રુપ સ્ટેજમાં પોતાનું વર્ચસ્વ જાળવી રાખ્યું હતું અને પોઇન્ટ્સ ટેબલમાં ટોચનું સ્થાન મેળવ્યું છે. હવે પ્લેઓફના રોમાંચમાં RCB નો સામનો ક્વોલિફાયર 1 માં ગુજરાત ટાઇટન્સ (GT) સામે થશે. આઇપીએલના ઇતિહાસના રસપ્રદ આંકડા દર્શાવે છે કે, ક્વોલિફાયર 1 જીતનારી છેલ્લી 15 ટીમોમાંથી 12 ટીમો ચેમ્પિયન બની છે, જેથી આ મેચ બંને ટીમો માટે ફાઇનલ જેટલી જ મહત્વની રહેશે.

પ્લેઓફના ચોથા સ્થાન માટે 4 ટીમો વચ્ચે રોમાંચક જંગ
લીગ સ્ટેજના માત્ર બે દિવસ બાકી હોવા છતાં, પ્લેઓફમાં પહોંચનારી ચોથી ટીમનું સસ્પેન્સ હજુ અકબંધ છે. ચોથા સ્થાન માટે રાજસ્થાન રોયલ્સ, પંજાબ કિંગ્સ, કોલકાતા નાઈટ રાઈડર્સ (KKR) અને દિલ્હી કેપિટલ્સ વચ્ચે જોરદાર સ્પર્ધા છે. આજે પંજાબ કિંગ્સની ટક્કર લખનૌ સુપર જાયન્ટ્સ સામે છે. જો પંજાબ હારશે તો તેની સફર અહીં જ પૂરી થઈ જશે, પરંતુ જો પંજાબ જીતશે તો તેણે અન્ય મેચોના પરિણામ પર નિર્ભર રહેવું પડશે. બીજી તરફ, જો રાજસ્થાન રોયલ્સ પોતાની છેલ્લી મેચ જીતી જશે, તો બાકીની ત્રણેય ટીમો આપોઆપ બહાર થઈ જશે અને રાજસ્થાન પ્લેઓફની ચોથી લાયક ટીમ બની જશે.