મોહમ્મદ શમીની યોગી આદિત્યનાથ સાથે કરી મુલાકાત, નિવૃત્તિની અફવાઓને નકારી

ભારતીય ક્રિકેટ ટીમના દિગ્ગજ ઝડપી બોલર મોહમ્મદ શમીએ 19 મે, 2025ના રોજ ઉત્તર પ્રદેશના મુખ્યમંત્રી યોગી આદિત્યનાથ સાથે લખનૌમાં તેમના સરકારી નિવાસસ્થાને મુલાકાત લીધી હતી. આ મુલાકાત દરમિયાન, બંને વચ્ચે ચર્ચાઓ થઈ અને મુખ્યમંત્રી યોગી આદિત્યનાથે શમીનું સન્માન પણ કર્યું હતું.

મુખ્યમંત્રી યોગી આદિત્યનાથે સોશિયલ મીડિયા પ્લેટફોર્મ 'X' પર કેટલીક તસવીરો પણ શેર કરી હતી. તેમણે 'X' પર લખ્યું, "આજે મેં ભારતીય ક્રિકેટ ટીમના પ્રખ્યાત બોલર મોહમ્મદ શમી સાથે લખનૌમાં તેમના સત્તાવાર નિવાસસ્થાને સૌજન્ય મુલાકાત કરી."

મોહમ્મદ શમી એવા સમયે યુપીના CM યોગી આદિત્યનાથને મળ્યા છે જ્યારે છેલ્લા કેટલાક દિવસોમાં ટેસ્ટ ક્રિકેટમાંથી નિવૃત્તિના સમાચારોએ જોર પકડ્યું હતું. જોકે, ભારતીય ક્રિકેટર મોહમ્મદ શમીએ ટેસ્ટ ક્રિકેટમાંથી નિવૃત્તિની અફવાઓ પર નારાજગી વ્યક્ત કરી હતી. તેમણે પોતાની ઇન્સ્ટાગ્રામ સ્ટોરી દ્વારા નિવૃત્તિની અફવાઓનું ખંડન કર્યું, લખ્યું કે આવા લોકો જ ભવિષ્યને બરબાદ કરે છે.

ખરેખર, તાજેતરમાં જ ભારતીય ક્રિકેટ સ્ટાર બેટ્સમેન વિરાટ કોહલીએ ટેસ્ટ ક્રિકેટમાંથી નિવૃત્તિની જાહેરાત કરી હતી. તેમણે આ માહિતી સોશિયલ મીડિયા પર પોતાના ઈન્સ્ટાગ્રામ એકાઉન્ટ દ્વારા આપી હતી. વિરાટ કોહલીના થોડા દિવસ પહેલા જ રોહિત શર્માએ પણ ક્રિકેટના આ સૌથી લાંબા ફોર્મેટને અલવિદા કહી દીધું હતું. આ પછી, શમીના નિવૃત્તિની અફવાઓ ફેલાઈ હતી, જેને તેણે નકારી કાઢી હતી.

મોહમ્મદ શમી હાલમાં ભારતના સૌથી મહત્વપૂર્ણ ખેલાડીઓમાંનો એક છે. તેમણે અત્યાર સુધીમાં ભારત માટે 64 ટેસ્ટ, 108 વન ડે અને 25 ટી-20 મેચ રમી છે. તેમણે ટેસ્ટમાં 229 વિકેટ, વન ડેમાં 206 વિકેટ અને ટી 20માં 27 વિકેટ લીધી છે. તેઓ ચેમ્પિયન્સ ટ્રોફી 2025ની વિજેતા ટીમનો પણ ભાગ હતા. તેમણે ભારતને આ ટુર્નામેન્ટ જીતવામાં મહત્વપૂર્ણ ભૂમિકા ભજવી હતી.

શમી વર્તમાન IPL 2025 માં સનરાઇઝર્સ હૈદરાબાદ તરફથી રમી રહ્યો છે, પરંતુ આ સિઝનમાં તેમનું પ્રદર્શન અપેક્ષાઓ મુજબ રહ્યું નથી. IPL પછી, ભારતીય ક્રિકેટ ટીમના ખેલાડીઓ જૂનમાં 5 મેચની ટેસ્ટ શ્રેણી માટે ઇંગ્લેન્ડના લાંબા પ્રવાસ પર જશે.