સિલ્વર માટે 3 શૂટ-ઓફ, ગોલ્ડ માટે 2… ઈશાની ફાઇનલમાં જબરદસ્ત ડ્રામા

Asian Games 2026: ભારતની શૂટર ઈશા સિંહે Asian Games 2026માં મહિલાઓની 25 મીટર પિસ્તોલ ઇવેન્ટમાં સિલ્વર મેડલ જીતીને ભારતીય શૂટિંગમાં વધુ એક મહત્વપૂર્ણ સિદ્ધિ નોંધાવી છે. રોમાંચક ફાઇનલમાં ઈશા એક સમયે ત્રીજા સ્થાને પહોંચી ગઈ હતી, પરંતુ દબાણ વચ્ચે શાનદાર કમબેક કર્યું. મેડલ માટેની રેસ એટલી નજીક હતી કે બ્રોન્ઝ અને સિલ્વરનો નિર્ણય શૂટ-ઓફથી થયો, જ્યારે ગોલ્ડ મેડલ માટે પણ ટાઇ-બ્રેકર યોજાયો હતો.

ઈશા સિંહે શૂટ-ઓફમાં કિમ હ્યોન સુકને હરાવી
25 મીટર પિસ્તોલ ફાઇનલમાં 40 શોટ બાદ ઈશા સિંહ અને ઉત્તર કોરિયાની કિમ હ્યોન સુક 34-34 પોઈન્ટ પર બરાબરીમાં હતી. ત્રીજા સ્થાનનો નિર્ણય કરવા માટે શૂટ-ઓફ યોજાયો. પ્રથમ શૂટ-ઓફમાં બંનેએ 5માંથી 3 નિશાન સાધ્યાં. બીજા શૂટ-ઓફમાં પણ બંનેનો સ્કોર 3-3 રહ્યો. ત્રીજા શૂટ-ઓફમાં ઈશાએ 3 નિશાન સાધ્યાં, જ્યારે કિમ હ્યોન સુક 2 નિશાન સુધી પહોંચી. ઈશાએ 3-2થી શૂટ-ઓફ જીતીને સિલ્વર મેડલ નિશ્ચિત કર્યો, જ્યારે કિમને બ્રોન્ઝ મેડલ મળ્યો.

ગોલ્ડ મેડલ માટે ચીનની જિયારુઇક્સુઆન ઝિયાઓ સામે મુકાબલો
સિલ્વર મેડલ નિશ્ચિત થયા બાદ ઈશા સિંહનો મુકાબલો ગોલ્ડ મેડલ માટે ચીનની જિયારુઇક્સુઆન ઝિયાઓ સામે થયો. અંતિમ સ્કોર 38-38 રહેતા ગોલ્ડ મેડલનો નિર્ણય પણ શૂટ-ઓફથી થયો. પ્રથમ ગોલ્ડ શૂટ-ઓફમાં બંને શૂટર્સે 5માંથી 4 નિશાન સાધ્યાં. બીજા શૂટ-ઓફમાં ઝિયાઓએ 3 નિશાન સાધ્યાં, જ્યારે ઈશાએ 2 નિશાન સાધ્યાં. પરિણામે ઝિયારુઇક્સુઆન ઝિયાઓએ ગોલ્ડ મેડલ જીત્યો અને ઈશા સિંહે સિલ્વર મેડલ મેળવ્યો.

શરૂઆતમાં ત્રીજા સ્થાને સરકી હતી ઈશા
ફાઇનલની શરૂઆત ઈશા માટે મજબૂત રહી હતી. પ્રથમ 10 શોટ બાદ તે 9 પોઈન્ટ સાથે આગળ હતી. 25 શોટ બાદ તેનો સ્કોર 20 પોઈન્ટ હતો અને 30 શોટ બાદ 23 પોઈન્ટ સાથે તે ત્રીજા સ્થાને પહોંચી હતી. 40 શોટ બાદ ઈશા 31 પોઈન્ટ સાથે મેડલની રેસમાં રહી હતી. અંતિમ તબક્કામાં ઈશાએ દબાણ વચ્ચે પોતાની સ્થિતિ જાળવી અને શૂટ-ઓફમાં શાનદાર પ્રદર્શન કરીને સિલ્વર મેડલ જીત્યો.

ઈશા સિંહના નામે વર્લ્ડ રેકોર્ડ પણ
ઈશા સિંહે 26 મે 2026ના રોજ જર્મનીના મ્યુનિકમાં 25 મીટર પિસ્તોલની વ્યક્તિગત ફાઇનલમાં 43 પોઈન્ટના સ્કોર સાથે વર્લ્ડ રેકોર્ડ બનાવ્યો હતો. Asian Games 2026માં સિલ્વર મેડલ સાથે ઈશાએ આંતરરાષ્ટ્રીય શૂટિંગમાં પોતાની ઓળખ વધુ મજબૂત કરી છે.

ભારતીય મહિલા ટીમ પાંચમા સ્થાને
મહિલાઓની ટીમ ઇવેન્ટમાં ભારત પાંચમા સ્થાને રહ્યું હતું. મનુ ભાકર, ઈશા સિંહ અને રાહી સરનોબતેની ભારતીય ટીમે કુલ 1727-56xનો સ્કોર કર્યો હતો. વ્યક્તિગત 25 મીટર પિસ્તોલ ઇવેન્ટમાં ભારતમાંથી માત્ર ઈશા જ ફાઇનલ માટે ક્વોલિફાય થઈ હતી. તેણે ક્વોલિફિકેશનમાં 580 પોઈન્ટ સાથે આઠમું સ્થાન મેળવ્યું અને 22 ઇનર-10 નોંધાવ્યા. સમાન 580 પોઈન્ટ ધરાવતી ચાઇનીઝ તાઇપેઈની યેન-ચિંગ ચેંગ કરતાં ઈશાના ઇનર-10 વધુ હોવાથી તેને ફાઇનલમાં સ્થાન મળ્યું. Asian Games 2026માં ઈશા સિંહનો સિલ્વર મેડલ ભારતીય શૂટિંગ માટે નોંધપાત્ર પરિણામ રહ્યું છે.