Tim David Middle Finger Gesture: IPL 2026ની સીઝનમાં રવિવારે રાયપુરના મેદાન પર રમાયેલી હાઈ-વોલ્ટેજ મેચમાં રોયલ ચેલેન્જર્સ બેંગ્લોર (RCB) એ મુંબઈ ઇન્ડિયન્સ (MI) ને 2 વિકેટથી પરાજય આપ્યો હતો. શહીદ વીર નારાયણ સિંહ ઇન્ટરનેશનલ સ્ટેડિયમ ખાતે રમાયેલી આ મેચ છેલ્લા બોલ સુધી રોમાંચક રહી હતી, પરંતુ મેચ પૂરી થયા બાદ મેદાનની બહાર એક નવો વિવાદ છેડાઈ ગયો છે. RCBના બેટ્સમેન ટિમ ડેવિડનો એક કથિત વીડિયો સોશિયલ મીડિયા પર વાયરલ થઈ રહ્યો છે, જેના કારણે સોશિયલ મીડિયા પર ચાહકો વચ્ચે શાબ્દિક યુદ્ધ શરૂ થયું છે.
શું છે સમગ્ર વિવાદ? RCBએ મુંબઈ સામે છેલ્લા બોલે મેળવેલા વિજય બાદ ઓનલાઈન પ્લેટફોર્મ્સ પર એક વીડિયો ઝડપથી ફેલાઈ રહ્યો છે. આ વીડિયોમાં ટિમ ડેવિડ RCBના ડગઆઉટમાં ઊભો રહીને જીતની ઉજવણી કરતો જોવા મળે છે, પરંતુ આરોપ છે કે તેણે આ દરમિયાન પોતાના બંને હાથની મધ્યમ આંગળી (Middle Finger) ઊંચી કરીને અશોભનીય સંકેત આપ્યો હતો. આ વીડિયો સામે આવ્યા બાદ મુંબઈ ઇન્ડિયન્સના ચાહકો રોષે ભરાયા છે અને ડેવિડ વિરુદ્ધ કડક શિસ્તભંગની કાર્યવાહીની માંગ કરી રહ્યા છે. જોકે, આ વીડિયોની સત્યતા અંગે હજુ સુધી કોઈ સત્તાવાર પુષ્ટિ કરવામાં આવી નથી અને મીડિયા હાઉસ પણ આ વાયરલ ફૂટેજની પુષ્ટિ કરતું નથી.
&nbsp;
<blockquote class="twitter-tweet" data-media-max-width="560">
All were busy with Virat Kohli&rsquo;s celebration, see how Tim David celebrated 😂🔥 <a href="https://t.co/0ApBaRNKNJ">pic.twitter.com/0ApBaRNKNJ</a>
&mdash; Middle Stump Cricket (@MiddleCricket) <a href="https://twitter.com/MiddleCricket/status/2053692552990331120?ref_src=twsrc%5Etfw">May 11, 2026</a></blockquote>
<script src="https://platform.twitter.com/widgets.js" async="" charset="utf-8"></script>
&nbsp;
ટિમ ડેવિડ અને મુંબઈ ઇન્ડિયન્સનો ઈતિહાસ નોંધનીય છે કે ઓસ્ટ્રેલિયન ઓલરાઉન્ડર ટિમ ડેવિડ આઈપીએલની છેલ્લી ત્રણ સીઝન સુધી મુંબઈ ઇન્ડિયન્સનો અભિન્ન હિસ્સો રહ્યો હતો. આઈપીએલ 2025ની મેગા ઓક્શનમાં RCBએ તેને ખરીદ્યો હતો. પોતાની જૂની ટીમ સામે રમી રહેલા ડેવિડ પર સૌની નજર હતી, પરંતુ આ મેચમાં તે બેટિંગમાં સંપૂર્ણ નિષ્ફળ રહ્યો હતો અને ગોલ્ડન ડક (પહેલા જ બોલે આઉટ) પર પેવેલિયન ભેગો થયો હતો. આમ છતાં, ટીમના વિજય બાદ તેના કથિત વર્તને તેને ફરી ચર્ચામાં લાવી દીધો છે.
મેચનો રોમાંચ: છેલ્લા બોલે RCBની જીત મેચની વાત કરીએ તો, મુંબઈ ઇન્ડિયન્સે RCBને જીતવા માટે 167 રનનો પડકાર આપ્યો હતો. લક્ષ્યનો પીછો કરવા ઉતરેલી RCBની શરૂઆત નબળી રહી હતી, પરંતુ ઓલરાઉન્ડર કૃણાલ પંડ્યાએ બાજી સંભાળી હતી. કૃણાલે 46 બોલમાં 73 રનની શાનદાર ઇનિંગ રમીને જીતનો મજબૂત પાયો નાખ્યો હતો. અંતિમ ઓવરમાં RCBને જીતવા માટે 15 રનની જરૂર હતી. રોમારિયો શેફર્ડ આઉટ થતા જ મુંબઈનો પક્ષ મજબૂત જણાતો હતો. જોકે, મેદાન પર હાજર ભુવનેશ્વર કુમારે ચોથા બોલ પર ગગનચુંબી સિક્સર ફટકારીને આખી મેચ પલટી નાખી હતી. ત્યારબાદ પાંચમા બોલ પર સિંગલ લેતા છેલ્લા બોલે જીતવા માટે 2 રનની જરૂર હતી. રસિક સલામ દારે છેલ્લા બોલે બે રન દોડીને ટીમને રોમાંચક વિજય અપાવ્યો હતો.
BCCIની મૌન પ્રતિક્રિયા અને આગામી પગલાં હાલમાં આ વાયરલ વીડિયો મામલે RCB મેનેજમેન્ટ કે ભારતીય ક્રિકેટ કંટ્રોલ બોર્ડ (BCCI) તરફથી કોઈ સત્તાવાર પ્રતિક્રિયા આપવામાં આવી નથી. આઈપીએલના આચારસંહિતા મુજબ, જો કોઈ ખેલાડી મેદાન પર કે ડગઆઉટમાં અભદ્ર સંકેતો અથવા ગેરવર્તણૂક કરે છે, તો તેના પર દંડ અથવા મેચ પ્રતિબંધ લાદવામાં આવી શકે છે. હવે જોવાનું એ રહેશે કે શું મેચ રેફરી આ મામલાની સ્વતઃ સંજ્ઞાન (Suo Moto) લે છે કે પછી આ વિવાદ સોશિયલ મીડિયા પૂરતો જ મર્યાદિત રહે છે. પરંતુ એક વાત ચોક્કસ છે કે મુંબઈ અને RCB વચ્ચેની આ મેદાનની દુશ્મનાવટ હવે ખેલાડીઓના વર્તનને લઈને નવા વિવાદોમાં ઘેરાઈ ગઈ છે.

ડગઆઉટમાં અશોભનીય ઈશારાનો વીડિયો વાયરલ થતા ખતરો!

May 11, 2026 | 14:26 IST