અમદાવાદમાં ક્રિકેટ ફીવર વચ્ચે ટિકિટોની કાળાબજારી

IPL 2026 Final In Ahmedabad: વિશ્વના સૌથી મોટા ક્રિકેટ સ્ટેડિયમ, નરેન્દ્ર મોદી સ્ટેડિયમ ખાતે 31 મે, 2026ના રોજ ગુજરાત ટાઇટન્સ અને રોયલ ચેલેન્જર્સ બેંગ્લોર વચ્ચે IPL 2026ની પ્રતિષ્ઠિત ફાઇનલ મેચ રમાવા જઈ રહી છે. આ મેગા મુકાબલાને પગલે સમગ્ર અમદાવાદ શહેરમાં ભારે ઉત્સાહનો માહોલ છે. જો કે, આ ભવ્ય ક્રેઝનો ગેરફાયદો ઉઠાવીને ટિકિટોનું કાળાબજાર (બ્લેક માર્કેટિંગ) પણ જોરશોરથી શરૂ થઈ ગયું છે. સામાન્ય રીતે 3 હજાર રૂપિયાની કિંમત ધરાવતી ટિકિટો સોશિયલ મીડિયાના માધ્યમથી 10 થી 15 હજાર રૂપિયામાં વેચાઈ રહી છે, જ્યારે લક્ઝુરિયસ પ્રેસિડેન્ટ ગેલેરીની ટિકિટોના ભાવ 1 લાખ રૂપિયા સુધી બોલાઈ રહ્યા છે. મેચનો સમય નજીક આવતા આ ભાવો હજુ વધવાની આશંકા છે, જેના કારણે સામાન્ય ચાહકો ભારે નિરાશ થયા છે.

એડવાન્સ પેમેન્ટના નામે છેતરપિંડી અને ડુપ્લિકેટ ટિકિટનો આતંક
કાળાબજારી કરનારા એજન્ટો અત્યારે સોશિયલ મીડિયા પ્લેટફોર્મ જેવા કે ઇન્સ્ટાગ્રામ અને વોટ્સએપ પર ટિકિટના ફોટા મૂકીને ગ્રાહકો શોધી રહ્યા છે. ટોકન એમાઉન્ટ કે એડવાન્સ પેમેન્ટ લીધા બાદ ઘણીવાર ગ્રાહકોના આઇડી અને નંબર બ્લોક કરી દેવામાં આવે છે. આ સિવાય એક મોટું સ્કેમ ઓરિજિનલ ટિકિટની હાઇ-ક્વોલિટી કલર ઝેરોક્ષ વેચવાનું સામે આવ્યું છે. ક્રિકેટપ્રેમીઓ હજારો રૂપિયા ખર્ચીને આ ટિકિટ ખરીદે છે, પરંતુ જ્યારે સ્ટેડિયમના ગેટ પર બારકોડ સ્કેન થાય છે ત્યારે ટિકિટ નકલી હોવાનું બહાર આવે છે અને ચાહકોને મેચ જોયા વગર જ પરત ફરવું પડે છે.

ટિકિટોની કાળાબજારી કરતા 7 આરોપીઓની ધરપકડ
ટિકિટના ગેરકાયદેસર વેચાણને અટકાવવા માટે અમદાવાદ પોલીસ અને ક્રાઈમ બ્રાન્ચ એક્શન મોડમાં આવી ગઈ છે. પોલીસે અલગ-અલગ ત્રણ દરોડા પાડીને કુલ 7 શખ્સોની ધરપકડ કરી છે:
ક્રાઈમ બ્રાન્ચની કાર્યવાહી: સિંધુભવન રોડ પરથી મન પટેલ અને સફીક ઉર્ફે બન્ની અંસારીને ફાઇનલની 4 ટિકિટો અને મોબાઇલ સાથે ઝડપી લેવાયા હતા.
ચાંદખેડા પોલીસનો પ્રથમ કેસ: મંથન જૈન અને મિત હરવાણીને 5 ટિકિટો સાથે ઝડપ્યા, જેઓ 3 હજારની ટિકિટ 10 હજારમાં વેચતા હતા.
ચાંદખેડા પોલીસનો બીજો કેસ: ઈશાન ભટ્ટ, નિર્મલ જૈન અને ઋષભચંદ્ર જૈન નામના 3 આરોપીઓની ધરપકડ કરાઈ, જેઓ 3500 વાળી ટિકિટ 15 હજારમાં વેચવાનો પ્રયાસ કરતા હતા.

સ્ટેડિયમ માટે પાર્કિંગ વ્યવસ્થા અને ફ્રી શટલ સર્વિસ
મેચ દરમિયાન સ્ટેડિયમમાં 1 લાખથી વધુ પ્રેક્ષકો આવવાની સંભાવનાને પગલે ટ્રાફિક વ્યવસ્થા જાળવવા માટે 'Show My Parking' એપ અને વેબસાઇટ (https://events.showmyparking.com) દ્વારા એડવાન્સ પાર્કિંગ સ્લોટ બુકિંગની સુવિધા શરૂ કરાઈ છે. આ અંતર્ગત ટૂ-વ્હીલર માટે 120 રૂપિયા અને ફોર-વ્હીલર માટે 500 રૂપિયા ચાર્જ નક્કી કરાયો છે. પાર્કિંગ માટે 9 જનરલ અને 2 VIP પ્લોટ ફાળવાયા છે. પ્રેક્ષકોની સુવિધા માટે ONGC સર્કલ (AMC ફ્રી પ્લોટ-1) અને રેલવે ગ્રાઉન્ડ જેવા દૂરના પાર્કિંગ પ્લોટ્સથી સ્ટેડિયમના ગેટ સુધી લાવવા-લઈ જવા માટે ફ્રી શટલ સર્વિસ પૂરી પાડવામાં આવશે. આ ઉપરાંત, ભીડથી બચવા માટે બેકઅપ તરીકે ઇન્ડિયન પેટ્રોલ પંપ નજીક અને માતૃશ્રી પાર્ટી પ્લોટ પાસે વધારાના પેઇડ પાર્કિંગ રાખવામાં આવ્યા છે. ટ્રાફિક અને સુરક્ષા તપાસની કતારોથી બચવા માટે પ્રેક્ષકોને મેટ્રો અને BRTS જેવા જાહેર પરિવહનનો ઉપયોગ કરવા તથા સ્ટેડિયમ પર વહેલા પહોંચવા અપીલ કરાઈ છે.

હોટલ ઉદ્યોગને 200 કરોડનો ફાયદો, ફ્લાઇટ અને રૂમના ભાડા આસમાને
અગાઉ આ ફાઇનલ મેચ બેંગલુરુમાં યોજાવાની હતી, પરંતુ BCCI દ્વારા તેને અમદાવાદ શિફ્ટ કરાતા જ અહીંની હોટલ, ટ્રાવેલ અને ટુરિઝમ ઇન્ડસ્ટ્રીમાં ભારે તેજી આવી ગઈ છે. મે મહિનાના અંતમાં સામાન્ય રીતે હોટલ ઉદ્યોગ માટે ઓફ-સિઝન હોય છે, પરંતુ 30 અને 31 મે દરમિયાન અમદાવાદની તમામ પ્રીમિયમ હોટલો (અંદાજે 20,000 રૂમ) હાઉસફુલ થઈ ગઈ છે. હોટલ એન્ડ રેસ્ટોરન્ટ એસોસિએશનના પ્રમુખ નરેન્દ્ર સોમાણીના જણાવ્યા મુજબ, વેકેશનના માહોલ વચ્ચે આ સ્પોર્ટ્સ ઇકોનોમીના કારણે હોટલ ઉદ્યોગને માત્ર બે દિવસમાં 200 કરોડ રૂપિયાથી વધુનો સીધો નફો થવાનો અંદાજ છે. ડિમાન્ડ વધવાના કારણે ફ્લાઇટની ટિકિટના ભાવ રૂ. 35,000 અને હોટલમાં વન-નાઇટ સ્ટેનો ચાર્જ રૂ. 36,000 સુધી પહોંચી ગયો છે. આગામી સમયમાં અમદાવાદમાં ઓલિમ્પિક અને કોમનવેલ્થ ગેમ્સની તૈયારીઓ ચાલી રહી હોવાથી હોટલ ક્ષમતા આગામી દિવસોમાં બમણી થવાની પણ શક્યતા છે.