India Squad Vs Afghanistan: ઇન્ડિયન પ્રીમિયર લીગ (IPL) 2026ના રોમાંચક અંત પછી ભારતીય ક્રિકેટ ટીમનો આંતરરાષ્ટ્રીય પ્રવાસ ફરી એકવાર શરૂ થવા જઈ રહ્યો છે. આ વર્ષે આઈપીએલ પછી ભારત પોતાની પ્રથમ આંતરરાષ્ટ્રીય સીરિઝ અફઘાનિસ્તાન સામે રમશે. અફઘાનિસ્તાનની ટીમ 1 ટેસ્ટ અને 3 વનડે મેચોની શ્રેણી માટે ભારતનો પ્રવાસ ખેડવાની છે, જેનો પ્રારંભ આગામી 6 જૂનથી થશે. આ હાઈપ્રોફાઈલ શ્રેણી માટે ટૂંક સમયમાં જ ગુવાહાટી ખાતે ભારતીય પસંદગીકારોની એક મહત્વપૂર્ણ બેઠક મળવાની છે, જેમાં ટેસ્ટ અને વનડે બંને ફોર્મેટ માટે ટીમની સત્તાવાર જાહેરાત કરવામાં આવશે. આ બેઠકમાં કેટલાક મોટા અને ચોંકાવનારા નિર્ણયો લેવાય તેવી પ્રબળ શક્યતા છે.
હાર્દિક વનડેમાંથી બહાર, બુમરાહને ટેસ્ટમાં આરામ સૂત્રો પાસેથી મળતી માહિતી મુજબ, સ્ટાર ઓલરાઉન્ડર હાર્દિક પંડ્યાની ફિટનેસ હાલમાં ચિંતાનો વિષય બનેલી છે. કમરની ઈજાના કારણે હાર્દિક આઈપીએલ 2026મા મુંબઈ ઈન્ડિયન્સ તરફથી ઘણી મેચો રમી શક્યો ન હતો. જોકે, તે ઈડન ગાર્ડન્સ ખાતે કોલકાતા નાઈટ રાઈડર્સ સામેની અંતિમ ગ્રુપ મેચમાં વાપસી કરે તેવી આશા છે, પરંતુ વર્કલોડ મેનેજમેન્ટ હેઠળ તેને અફઘાનિસ્તાન સામેની વનડે શ્રેણીમાંથી બહાર રાખવામાં આવી શકે છે. બીજી તરફ, ટીમ ઈન્ડિયાના મુખ્ય ફાસ્ટ બોલર જસપ્રીત બુમરાહને સતત ક્રિકેટ રમ્યા બાદ આરામ આપવામાં આવી શકે છે. બુમરાહની ગેરહાજરીમાં મોહમ્મદ શમીને ફરી એકવાર ભારતની ટેસ્ટ ટીમમાં શાનદાર વાપસી કરવાની તક મળી શકે છે.
દેવદત્ત પડિકલની વાપસી, સાઈ સુદર્શન બહાર ટેસ્ટ ટીમની બેટિંગ લાઇન-અપની વાત કરીએ તો, પસંદગીકારો યુવા બેટ્સમેન સાઈ સુદર્શનને ટીમમાંથી પડતો મૂકી શકે છે. સુદર્શનના સ્થાને કર્ણાટકના ડાબોડી બેટ્સમેન દેવદત્ત પડિકલને ટીમમાં સામેલ કરવામાં આવે તેવી પૂરેપૂરી સંભાવના છે. પડિકલે ચાલુ સીઝનમાં ઘરેલું રેડ-બોલ ક્રિકેટ (રણજી ટ્રોફી) માં રનનો અંબાર લગાવ્યો હોવાથી તેને આ ઈનામ મળી શકે છે. આ ઉપરાંત, વનડે ટીમમાંથી વિકેટકીપર બેટ્સમેન ઋષભ પંતની બાદબાકી લગભગ નક્કી માનવામાં આવી રહી છે. મર્યાદિત ઓવરોના ફોર્મેટમાં પંતનું બેટ લાંબા સમયથી શાંત હોવાથી પસંદગીકારો કેએલ રાહુલને પ્રથમ વિકેટકીપર તરીકે પસંદ કરશે, જ્યારે બીજા વિકેટકીપરના બેકઅપ તરીકે શાનદાર ફોર્મમાં ચાલી રહેલા સંજુ સેમસન અથવા ઇશાન કિશનના નામ પર મહોર લાગી શકે છે.
આઈપીએલ સ્ટાર પ્રિન્સ યાદવને મળી શકે છે તક અફઘાનિસ્તાન સામેની વનડે શ્રેણીમાં જે સૌથી મોટો અને રસપ્રદ નિર્ણય લેવાઈ શકે છે, તે છે યુવા ફાસ્ટ બોલર પ્રિન્સ યાદવની ટીમમાં એન્ટ્રી. આઈપીએલ 2026 દરમિયાન પ્રિન્સ યાદવે પોતાની ધારદાર ગતિ, સચોટ લાઈન-લેન્થ અને બોલિંગની વિવિધતાથી પસંદગીકારોને ખૂબ જ પ્રભાવિત કર્યા છે. જો પસંદગીકારો ભવિષ્યની યોજનાઓને ધ્યાનમાં રાખશે, તો પ્રિન્સ યાદવને અફઘાનિસ્તાન સામેની આ વનડે શ્રેણી દ્વારા ભારતીય ટીમની બ્લુ જર્સી પહેરવાની સુવર્ણ તક મળી શકે છે.

અફઘાનિસ્તાન સામેની શ્રેણી માટે ટીમ ઈન્ડિયાની પસંદગીમાં આ 5 મોટા ફેરફારની શક્યતા

May 19, 2026 | 14:20 IST