વર્લ્ડ બોક્સિંગમાં ભારતનો પહેલો ગોલ્ડ મેડલ!

ભારતીય બોક્સિંગ માટે શનિવાર, 13 સપ્ટેમ્બર, 2025નો દિવસ ઐતિહાસિક રહ્યો. 24 વર્ષની યુવા બોક્સર જૈસ્મિન લંબોરિયાએ વર્લ્ડ બોક્સિંગ ચેમ્પિયનશિપ 2025માં ભારતને પહેલો ગોલ્ડ મેડલ અપાવ્યો. આ જીત માત્ર એક મેડલ નથી, પરંતુ ભારતીય મહિલા બોક્સિંગના ભવિષ્યનો એક ઉજ્જવળ સંકેત છે.

પેરિસ ઓલિમ્પિક્સની સિલ્વર મેડલિસ્ટને હરાવી

57 કિલોગ્રામ વજન વર્ગની ફાઇનલમાં જૈસ્મિને પોલેન્ડની અનુભવી બોક્સર જુલિયા સ્ઝેરેમેટાને 4-1ના સ્પ્લિટ નિર્ણયથી હરાવી. જુલિયાએ પેરિસ ઓલિમ્પિક્સ 2024માં સિલ્વર મેડલ જીત્યો હતો, તેથી જૈસ્મિનની આ જીતનું મહત્ત્વ અનેકગણું વધી જાય છે.

પોતાની જીત બાદ જૈસ્મિને કહ્યું, "આ લાગણી શબ્દોમાં વ્યક્ત કરી શકાતી નથી. વર્લ્ડ ચેમ્પિયન બનીને હું ખૂબ ખુશ છું. પેરિસ ઓલિમ્પિક્સમાં વહેલા બહાર નીકળ્યા પછી મેં મારી ટેકનિક પર શારીરિક અને માનસિક રીતે કામ કર્યું. આ એક વર્ષની સતત મહેનતનું પરિણામ છે."

જૈસ્મિનની બોક્સિંગ સફર

હરિયાણાના ભિવાનીમાં 30 ઓગસ્ટ, 2001ના રોજ જન્મેલી જૈસ્મિન રમતગમતના પરિવારમાંથી આવે છે. તેના પરદાદા હવા સિંહ એક જાણીતા હેવીવેઇટ બોક્સર હતા અને બે વખત એશિયન ગેમ્સમાં ગોલ્ડ મેડલ જીત્યા હતા. તેના દાદા ચંદર ભાન લંબોરિયા એક કુસ્તીબાજ હતા. તેના કાકાઓ, સંદીપ સિંહ અને પરવિન્દર સિંહ પણ રાષ્ટ્રીય કક્ષાના બોક્સિંગ ચેમ્પિયન હતા અને તેમણે જ જૈસ્મિનને તાલીમ આપી હતી.

જૈસ્મિનને ધોરણ 10માં બોક્સિંગમાં રસ પડ્યો અને તેણે આ રમતને કારકિર્દી તરીકે અપનાવી. 2022ની કોમનવેલ્થ ગેમ્સમાં તેણે બોક્સિંગ લાઇટવેઇટ કેટેગરીમાં બ્રોન્ઝ મેડલ જીત્યો હતો. જોકે, પેરિસ ઓલિમ્પિક્સમાં તે વહેલી બહાર નીકળી ગઈ હતી, પરંતુ આ નિષ્ફળતાએ તેને હિંમત હારવાને બદલે વધુ મજબૂત બનાવી. 

જૈસ્મિનની આ જીત દેશના યુવા ખેલાડીઓ માટે પ્રેરણા સમાન છે. તેની મહેનત અને સમર્પણ દર્શાવે છે કે યોગ્ય તાલીમ અને સખત પરિશ્રમથી કોઈપણ લક્ષ્ય પ્રાપ્ત કરી શકાય છે.