ટેસ્ટનો પહેલો દિવસ: ભારતીય યુવા બેટ્સમેનોનો દબદબો, પંતનો ઐતિહાસિક રેકોર્ડ

ઈંગ્લેન્ડ સામેની ટેસ્ટ મેચના પહેલા દિવસે ભારતીય યુવા બેટ્સમેનોએ વિસ્ફોટક પ્રદર્શનથી બધાને પ્રભાવિત કર્યા. વિરાટ કોહલી અને રોહિત શર્મા જેવા દિગ્ગજોના સંન્યાસ બાદ નવા કેપ્ટન શુભમન ગિલના નેતૃત્વમાં ટીમ ઈન્ડિયાએ શાનદાર શરૂઆત કરી. પ્રથમ બેટિંગ કરવા ઉતરેલી ભારતીય ટીમે પહેલા દિવસે જ અનેક રેકોર્ડ્સ તોડ્યા, જેમાં રિષભ પંતે ખાસ સિદ્ધિ હાંસલ કરી.   રિષભ પંતનો ધમાકો
ટીમનો વાઈસ કેપ્ટન રિષભ પંતે પોતાની આક્રમક બેટિંગથી ઈંગ્લેન્ડના બોલરોને હંફાવ્યા. ઈનિંગની શરૂઆતમાં જ તેણે પહેલા બોલે ચોગ્ગો ફટકારી દબદબો જમાવ્યો. આ શોટથી ઈંગ્લેન્ડનો કેપ્ટન બેન સ્ટોક્સ પણ સ્તબ્ધ થઈ ગયો. પંતે દિવસના અંત સુધીમાં 102 બોલમાં 65 રન ફટકાર્યા, અને તેની લય જોતા સદીની પૂરી આશા છે.   આ પણ વાંચો : INd-ENG TEST: ગિલ અને જયસ્વાલની સદી, ભારતનો સ્કોર 359/3   ભારતની મજબૂત શરૂઆત
  ઈંગ્લેન્ડના કેપ્ટન બેન સ્ટોક્સે ટોસ જીતીને બોલિંગ પસંદ કરી, પરંતુ ભારતે પ્રથમ 20 ઓવરમાં એકપણ વિકેટ ગુમાવ્યા વિના તેનો નિર્ણય ખોટો સાબિત કર્યો. ઈંગ્લેન્ડે બે વિકેટ ઝડપી હતી, પરંતુ ગિલ અને યશસ્વી જયસ્વાલે સદીની ભાગીદારી કરીને ટીમને સંભાળી. યશસ્વીએ શાનદાર સદી ફટકારી, પરંતુ આઉટ થયો. ગિલે કેપ્ટનશીપ ઈનિંગ રમી અને પંતની સાથે મળીને દિવસના અંતે ટીમનો સ્કોર 3 વિકેટે 359 રન સુધી પહોંચાડ્યો.   પંતનો ઐતિહાસિક રેકોર્ડ
  રિષભ પંતે આ મેચમાં ટેસ્ટ ક્રિકેટમાં 3,000 રન પૂરા કર્યા. માત્ર 76 ઈનિંગ્સમાં આ સિદ્ધિ હાંસલ કરનાર તે પ્રથમ એશિયન વિકેટકીપર બેટ્સમેન બન્યો. એમએસ ધોની કે કુમાર સંગાકારા પણ આ રેકોર્ડ નથી બનાવી શક્યા. વિશ્વમાં ફક્ત એડમ ગિલક્રિસ્ટે 63 ઈનિંગ્સમાં આ સિદ્ધિ મેળવી હતી.   આ દિવસે ભારતીય ટીમે યુવા ખેલાડીઓના જોરે મેચમાં પોતાનું વર્ચસ્વ સ્થાપિત કર્યું, અને ચાહકોને આગામી દિવસોમાં વધુ રોમાંચની આશા છે.