IPLના શેડ્યુલમાં મોટા ફેરફારની તૈયારી

BCCI Considering Changing IPL Window: ઇન્ડિયન પ્રીમિયર લીગ (IPL)ની 19મી સીઝન હવે તેના અંતિમ ચરણમાં છે અને ટૂંક સમયમાં જ ક્રિકેટ જગતને આ વર્ષનું નવું ચેમ્પિયન મળી જશે. એકતરફ ભારતીય ક્રિકેટ કંટ્રોલ બોર્ડ (BCCI) ચાલુ સીઝનના સફળ સમાપન તરફ આગળ વધી રહ્યું છે, તો બીજી તરફ બોર્ડનું ધ્યાન હવે આગામી સીઝન અને લીગમાં થનારા મોટા ફેરફારો પર કેન્દ્રિત થયું છે. આ અંતર્ગત IPLના શેડ્યુલ અને તેની વિન્ડોને માર્ચ-મે મહિનાથી હટાવીને સપ્ટેમ્બર-ઓક્ટોબરમાં શિફ્ટ કરવા અંગે ગંભીર વિચારણા શરૂ થઈ ગઈ છે. IPLના ચેરમેન અરુણ ધુમલે તાજેતરમાં જ એક ઈન્ટરવ્યુમાં આ આયોજન અંગે મોટો ખુલાસો કર્યો છે.

વધતા તાપમાન અને ખેલાડીઓની ફિટનેસના કારણે લેવાશે નિર્ણય
IPL 2026ની આ સીઝન 28 માર્ચે શરૂ થઈ હતી અને 31 મેના રોજ 74 મેચોના લાંબા રોડમેપ બાદ ફાઇનલ સાથે સમાપ્ત થશે. પરંતુ, આ સીઝન દરમિયાન ખાસ કરીને ઉત્તર અને પશ્ચિમ ભારતના રાજ્યોમાં મે મહિનામાં નોંધાયેલી અસહ્ય ગરમી અને હીટવેવ તંત્ર માટે ચિંતાનો વિષય બન્યા છે. બપોરની મેચો દરમિયાન સ્ટેડિયમમાં દર્શકોની હાજરી પર તેની સીધી નકારાત્મક અસર પડી છે. આ ઉપરાંત, આકરી ગરમીમાં સતત રમવાના કારણે ખેલાડીઓની ફિટનેસ અને સ્વાસ્થ્ય સામે પણ સવાલો ઊભા થયા છે. આ તમામ બાબતોને ધ્યાનમાં રાખીને બીસીસીઆઈ હવે ટૂર્નામેન્ટની વિન્ડો બદલવા માટે મજબૂર બન્યું છે.

દિવાળી કનેક્શન અને બ્રોડકાસ્ટર્સ સાથે ચર્ચા
એક મુલાકાતમાં સ્ટેડિયમમાં ઘટતા દર્શકો અંગે પૂછવામાં આવેલા પ્રશ્નના જવાબમાં ચેરમેન અરુણ ધુમલે જણાવ્યું કે, "આપણે બ્રોડકાસ્ટર્સ સાથે બેસીને ચર્ચા કરવાની જરૂર છે કે શું ટૂર્નામેન્ટને કોઈ અન્ય વિન્ડોમાં ખસેડી શકાય. સપ્ટેમ્બર-ઓક્ટોબરની વિન્ડો એક ઉત્તમ વિકલ્પ છે, કારણ કે આ સમયગાળો ભારતમાં તહેવારો અને દિવાળીની સિઝન સાથે મેળ ખાય છે. જાહેરાતકર્તાઓ (Advertisers) માટે પણ આ બિઝનેસનો સૌથી શ્રેષ્ઠ સમય ગણાય છે. આગામી દ્વિપક્ષીય શ્રેણીના ટેન્ડર દરમિયાન આ વિન્ડોની ઉપલબ્ધતા ચકાસવામાં આવશે."

બે ભાગમાં યોજાઈ શકે છે IPL
વર્ષ 2008માં આઈપીએલની શરૂઆત થઈ ત્યારથી (કોવિડ સમયના અપવાદ સિવાય) આ ટૂર્નામેન્ટ હંમેશા માર્ચથી મે મહિનાના ઉનાળાના વેકેશન દરમિયાન જ રમાતી આવી છે. આ આંતરરાષ્ટ્રીય શેડ્યુલમાં ફેરફાર કરવો એટલો સરળ નથી. આથી બીસીસીઆઈ માત્ર વિન્ડો બદલવા ઉપરાંત આખી ટૂર્નામેન્ટને વર્ષમાં બે ભાગમાં (Split Season) વિભાજીત કરવાનો નવો વિકલ્પ પણ વિચારી રહ્યું છે. આ યોજના હેઠળ અડધી ટૂર્નામેન્ટ ફેબ્રુઆરીથી એપ્રિલ વચ્ચે અને બાકીની મેચો સપ્ટેમ્બર-ઓક્ટોબરમાં યોજી શકાય. જોકે, આ માટે વિદેશી ખેલાડીઓની ઉપલબ્ધતા સુનિશ્ચિત કરવા માટે અન્ય દેશોના ક્રિકેટ બોર્ડ સાથે પણ વ્યાપક પરામર્શ કરવામાં આવશે.