દેશભરમાં પોતાની કથા અને ભજનોથી લોકપ્રિય બનેલા 28 વર્ષીય યુવા કથાવાચક ઇન્દ્રેશ ઉપાધ્યાય હરિયાણાના યમુનાનગરની શિપ્રા શર્મા સાથે વિવાહ બંધનથી જોડાઈ ગયા છે. 5 ડિસેમ્બર, 2025ના રોજ જયપુરની પ્રતિષ્ઠિત ફાઇવ-સ્ટાર હોટલ તાજ આમેરમાં આ ભવ્ય વિવાહ સમારોહનું આયોજન કરવામાં આવ્યું હતું. આ સમારોહ માત્ર તેની ભવ્યતાને કારણે જ નહિ, પરંતુ સંપૂર્ણપણે વૈદિક વિધિ અને અનેક દિગ્ગજ હસ્તીઓની હાજરીને કારણે પણ ચર્ચામાં રહ્યો હતો.
દેશના ખૂણે-ખૂણેથી 100થી વધુ પંડિતોને બોલાવ્યા
ઈન્દ્રેશ ઉપાધ્યાયના આ વિવાહમાં મુખ્ય વૈદિક વિધિઓ પૂરી કરવા માટે દેશના ખૂણે-ખૂણેથી 100થી વધુ પંડિતોને બોલાવવામાં આવ્યા હતા, જેમણે લગભગ 3 કલાક સુધી મંત્રોચ્ચાર અને ધાર્મિક વિધિઓ સંપન્ન કરાવી હતી. વિવાહ મંડપને પણ તિરુપતિ બાલાજી મંદિરની તર્જ પર શણગારવામાં આવ્યો હતો. આ વિવાહ સમારોહમાં હાજર રહેલા મહેમાનોમાં દેશની અનેક નામાંકિત હસ્તીઓનો સમાવેશ થાય છે.
પંડિત ધીરેન્દ્ર કૃષ્ણ શાસ્ત્રી આકર્ષણનું કેન્દ્ર
સૌથી વધુ ધ્યાન ખેંચ્યું હતું બાગેશ્વર ધામના પીઠાધીશ્વર પંડિત ધીરેન્દ્ર કૃષ્ણ શાસ્ત્રી એ, જેઓ આખા વિવાહ દરમિયાન વરરાજા ઈન્દ્રેશ ઉપાધ્યાયની પાછળ બેઠેલા જોવા મળ્યા હતા. તેમની હાજરીએ આ વિવાહને વધુ વિશેષ બનાવી દીધો હતો. આ ઉપરાંત, પ્રસિદ્ધ કવિ, લેખક અને રામકથા વાચક ડૉ. કુમાર વિશ્વાસ પણ નવદંપતીને આશીર્વાદ આપવા માટે જયપુર પહોંચ્યા હતા. રાજસ્થાન*ના નાયબ મુખ્યમંત્રી ડૉ. પ્રેમચંદ બૈરવાએ પણ ઈન્દ્રેશ ઉપાધ્યાયના વૈવાહિક કાર્યક્રમમાં હાજરી આપીને શુભેચ્છાઓ પાઠવી હતી. સંત રાજેન્દ્ર દાસ, દેવકીનંદન ઠાકુર, *પુણ્ડરીક ગોસ્વામી, અને જાણીતા ગાયક બી પ્રાક પણ આ સમારોહમાં સામેલ થયા હતા.
વૃંદાવનમાં વહુના સ્વાગતની ભવ્ય તૈયારી
ઈન્દ્રેશ ઉપાધ્યાયની પત્ની શિપ્રા શર્માની તસવીરો સોશિયલ મીડિયા પર ખૂબ વાયરલ થઈ રહી છે. ગોલ્ડન સાડીમાં સજેલા શિપ્રા ખૂબ જ સુંદર અને આકર્ષક દેખાતા હતા, જેના ઉપર તેમણે લાલ રંગની ચુંદડી ઓઢી હતી. અલંકારોથી સજેલા શિપ્રા કોઈ અપ્સરાથી ઓછા નહોતા લાગતા. રસપ્રદ વાત એ છે કે, ઈન્દ્રેશ ઉપાધ્યાય પોતે પણ લગ્નના મંડપમાં માઈક સંભાળીને મધુર ભક્તિગીત અને 'રાધે-રાધે' ભજન ગાઈને સમગ્ર માહોલને ભક્તિ અને આનંદથી ભરી દીધો હતો. દિવસ દરમિયાન વૈદિક વિધિથી વિવાહ સંપન્ન થયા બાદ, રાત્રે આશીર્વાદ સમારોહ અને પ્રીતિભોજનું આયોજન થયું હતું. 6 ડિસેમ્બરે નવદંપતી શિપ્રાને લઈને વૃંદાવન સ્થિત તેમના ઘરે પરત ફરશે, જ્યાં વૃંદાવનમાં પણ વહુના સ્વાગતની ભવ્ય તૈયારીઓ ચાલી રહી છે.

ઈન્દ્રેશ ઉપાધ્ય અને શિપ્રા

પ્રસિદ્ધ યુવા કથાવાચક ઇન્દ્રેશ ઉપાધ્યાય હરિયાણાના શિપ્રા શર્મા સાથે વિવાહ બંધનમાં જોડાયા

December 6, 2025 | 21:10 IST