'12 વર્ષમાં લોકશાહીને મોટું નુકસાન!' સોનિયા ગાંધીએ મોદી સરકાર પર કર્યા આકરા પ્રહાર, ચૂંટણી પંચ અને મીડિયા પર પણ ઉઠાવ્યા સવાલ

Sonia Gandhi Attacks On Modi Government: કોંગ્રેસના પૂર્વ અધ્યક્ષ સોનિયા ગાંધીએ કેન્દ્રની નરેન્દ્ર મોદી સરકાર પર આકરા પ્રહારો કર્યા છે. તેમણે આરોપ લગાવ્યો છે કે છેલ્લા 12 વર્ષમાં દેશના લોકશાહી માળખા, સંસ્થાઓ અને સામાજિક વ્યવસ્થાને મોટું નુકસાન પહોંચ્યું છે. સોનિયા ગાંધીના મતે, હવે દેશના લોકો આ નુકસાનને સમજવા લાગ્યા છે અને વર્તમાન રાજકીય પરિસ્થિતિ અંગે તેમની ચિંતા વધી રહી છે. તેમણે આશા વ્યક્ત કરી કે સરકાર બદલાયા બાદ દેશમાં સુશાસન પાછું આવશે, જોકે લોકશાહી સંસ્થાઓને ફરી મજબૂત બનાવવામાં લાંબો સમય લાગી શકે છે. સોનિયા ગાંધીએ અંગ્રેજી અખબાર 'ધ હિન્દુ'ને આપેલી મુલાકાતમાં આ વાતો કહી છે. આ મુલાકાત તેમના આગામી પુસ્તક 'Belonging: A Journey of Love'ના પ્રકાશન પહેલાં સામે આવી છે. હાર્પરકોલિન્સ ઇન્ડિયા દ્વારા 10 નવેમ્બરે પ્રકાશિત થનારા આ પુસ્તકમાં તેમણે પોતાના અંગત જીવન, ભારત સાથેના જોડાણ, રાજકીય સફર અને દેશની વર્તમાન રાજકીય સ્થિતિ અંગે વિચારો રજૂ કર્યા છે.

ચૂંટણી પંચ અને મીડિયા પર સરકારના નિયંત્રણનો આરોપ
સોનિયા ગાંધીએ આરોપ લગાવ્યો કે કેન્દ્રમાં ભાજપ સરકાર આવ્યા બાદ વિપક્ષને ચૂંટણી લડવા માટે સમાન તકો મળી રહી નથી. તેમના દાવા મુજબ, સરકારનું વિવિધ સંસ્થાઓ પર, ખાસ કરીને ચૂંટણી પંચ પર નિયંત્રણ છે. તેમણે મુખ્ય પ્રવાહના મીડિયા પર પણ સરકારના પ્રભાવનો આરોપ લગાવ્યો હતો. આ ઉપરાંત, ચૂંટણીમાં નાણાં અને ધર્મના ઉપયોગથી રાજકીય સ્પર્ધાનું સ્વરૂપ પ્રભાવિત થતું હોવાની વાત પણ તેમણે કરી હતી. તેમણે કહ્યું કે આ પડકારો છતાં કોંગ્રેસના કાર્યકરો અને નેતાઓ સંઘર્ષ કરી રહ્યા છે. ગામડાંથી લઈને જિલ્લા સ્તર સુધી પાર્ટીના કાર્યકરો બંધારણીય મૂલ્યોના રક્ષણ માટે કામ કરી રહ્યા છે. સોનિયા ગાંધીએ ચૂંટણીમાં ગેરરીતિ અને 'વોટ ચોરી'ના મુદ્દે સામે આવેલા અહેવાલોનો ઉલ્લેખ કરતાં કહ્યું કે તેના કારણે લોકોમાં જાગૃતિ વધી છે.

વિપક્ષી એકતા અંગે સોનિયા ગાંધીનો મોટો સંકેત
વિપક્ષી ગઠબંધન અંગે સોનિયા ગાંધીએ જણાવ્યું કે કોંગ્રેસ સમાન વિચારધારા ધરાવતા પક્ષો સાથે નજીકથી કામ કરી રહી છે. તેમના મતે, પાર્ટીની રાજકીય સંભાવનાઓ દિવસેને દિવસે સુધરી રહી છે. તેમણે સ્પષ્ટ કર્યું કે કોંગ્રેસ ભાજપ અને રાષ્ટ્રીય સ્વયંસેવક સંઘ (RSS) સાથે ક્યારેય સમાધાન કરશે નહીં. સોનિયાના મતે, કોંગ્રેસનું સત્તાવાર વલણ ધર્મનિરપેક્ષતા અને તમામ નાગરિકોના ધાર્મિક અધિકારોના રક્ષણ પર આધારિત છે.

મનમોહન સિંહ સાથેની ભૂમિકા અંગે શું કહ્યું?
2004માં કોંગ્રેસની જીત બાદ વડાપ્રધાન પદ સ્વીકાર્યું ન હોવાનો તેમને ક્યારેય અફસોસ થયો નથી તેમ સોનિયા ગાંધીએ જણાવ્યું હતું. તેમણે કહ્યું કે તે સમયે ડૉ. મનમોહન સિંહ સરકારનું નેતૃત્વ કરતા હતા, જ્યારે તેઓ પાર્ટીનું સંચાલન કરતા હતા. બંનેએ અલગ-અલગ જવાબદારીઓ સાથે એક ટીમ તરીકે કામ કર્યું હતું અને તેમનો અનુભવ સકારાત્મક રહ્યો હતો.

ઇન્દિરા અને રાજીવ ગાંધી પાસેથી શીખેલા મૂલ્યો
સોનિયા ગાંધીએ ઇન્દિરા ગાંધી અને રાજીવ ગાંધી પાસેથી મળેલી પ્રેરણાનો પણ ઉલ્લેખ કર્યો હતો. તેમના મતે, બંનેની હિંમત, સંવેદનશીલતા, ધર્મનિરપેક્ષ અને લોકશાહી ભારત પ્રત્યેની પ્રતિબદ્ધતા તથા ફરજની ભાવનાએ તેમના જીવનને પ્રભાવિત કર્યું છે. આ મુલાકાતમાં તેમણે 1975ની કટોકટીને સ્વતંત્ર ભારતના ઇતિહાસનો કાળો અધ્યાય ગણાવ્યો હતો. તે સમય દરમિયાન લોકશાહી અધિકારો પર નિયંત્રણ મૂકાયું હોવાનું તેમણે જણાવ્યું. સાથે જ માર્ચ 1977માં ચૂંટણી યોજવાનો ઇન્દિરા ગાંધીનો નિર્ણય અને કટોકટી દરમિયાન થયેલી ભૂલો બદલ માફી માંગવાના પ્રસંગનો પણ ઉલ્લેખ કર્યો હતો. સોનિયા ગાંધીના આ નિવેદનોથી ફરી એકવાર કેન્દ્ર સરકાર, લોકશાહી સંસ્થાઓ અને વિપક્ષી એકતાને લઈને રાષ્ટ્રીય રાજકારણમાં ચર્ચા તેજ થવાની શક્યતા છે.