એક તરફ વંદે માતરમનો મુદ્દો, બીજી તરફ સુકાયેલા પાક સાથે વિરોધ… ગુજરાત વિધાનસભામાં પહેલા જ દિવસે શું થયું?

Gujarat Assembly Monsoon Session Begins: ગાંધીનગરમાં ગુજરાત વિધાનસભાના ચોમાસુ સત્રની શરૂઆત સાથે જ રાજકીય ગરમાવો જોવા મળ્યો છે. સત્રના પ્રથમ દિવસે વંદે માતરમ દરમિયાન કોંગ્રેસના ધારાસભ્ય ઇમરાન ખેડાવાલા બેઠા હોવાના મુદ્દે ભાજપે વાંધો ઉઠાવ્યો છે. બીજી તરફ કોંગ્રેસે ખેડૂતો, પાક નુકસાન અને મોંઘવારીના મુદ્દે ગાંધીનગરમાં વિરોધ કર્યો છે, જ્યારે આમ આદમી પાર્ટી (AAP)એ દુષ્કાળ જાહેર કરવાની માંગ સાથે સુકાયેલા પાક અને ઘાસના પૂડા લઈને વિધાનસભા તરફ કૂચ કરવાનો પ્રયાસ કર્યો હતો.

વંદે માતરમ દરમિયાન ઇમરાન ખેડાવાલા બેઠા હોવાનો દાવો
ગુજરાત વિધાનસભામાં સત્રની શરૂઆત દરમિયાન વંદે માતરમ ગાવામાં આવ્યું હતું. આ દરમિયાન ઇમરાન ખેડાવાલા બેઠા હોવાનો દાવો કરવામાં આવ્યો છે. આ મુદ્દે મંત્રી પ્રવિણ માળીએ વાંધો ઉઠાવતા કહ્યું હતું કે ઇમરાન ખેડાવાલા જાણીજોઈને બેઠા હતા કે ભૂલથી થયું હતું તેની સ્પષ્ટતા કરવી જોઈએ. જો આ ઘટના ભૂલથી થઈ હોય તો માફી માંગવી જોઈએ તેવી પણ તેમણે માંગ કરી હતી. ભાજપના ધારાસભ્ય મહેશ કસવાલાએ પણ આ ઘટનાને દુઃખદ ગણાવી હતી. તેમણે કહ્યું કે વિધાનસભા લોકશાહીમાં આસ્થાનું પ્રતીક છે. ભાજપના ધારાસભ્યો આ મુદ્દે વિધાનસભા અધ્યક્ષને રજૂઆત કરશે અને કોંગ્રેસનું વલણ સ્પષ્ટ કરવાની માંગ કરશે.

કોંગ્રેસનો ખેડૂતો અને મોંઘવારી મુદ્દે વિરોધ
ચોમાસુ સત્ર શરૂ થાય તે પહેલાં કોંગ્રેસના નેતાઓ અને કાર્યકરોએ ગાંધીનગરની સત્યાગ્રહ છાવણી ખાતે ધરણાં કર્યા હતા. ખેડૂતોના પ્રશ્નો, પાક નુકસાન અને મોંઘવારી સહિતના મુદ્દે સરકાર સામે વિરોધ નોંધાવવામાં આવ્યો હતો. મોટી સંખ્યામાં કોંગ્રેસ કાર્યકરો બેનરો સાથે વિરોધમાં જોડાયા હતા.

AAPએ દુષ્કાળ જાહેર કરવાની માંગ કરી
AAP પ્રદેશ પ્રમુખ ઈસુદાન ગઢવી અને ધારાસભ્ય ગોપાલ ઈટાલિયા સહિતના નેતાઓ સુકાયેલા અને સડેલા પાક તથા ઘાસના પૂડા સાથે વિધાનસભા તરફ આગળ વધ્યા હતા. પોલીસે તેમને વિધાનસભા પરિસરમાં પ્રવેશતા અટકાવ્યા હતા. AAP દ્વારા વરસાદની અછત અને ખેડૂતોના પાક નુકસાનને ધ્યાનમાં રાખીને રાજ્યમાં દુષ્કાળ જાહેર કરવાની માંગ કરવામાં આવી છે.

ખેડૂતોને હવે 8 નહીં, 10 કલાક વીજળી
વરસાદ ખેંચાતા ખેતી માટે વીજળીની માંગ વધતાં રાજ્ય સરકારે ખેડૂતો માટે મહત્વનો નિર્ણય લીધો છે. ઉર્જા મંત્રી ઋષિકેશ પટેલે જણાવ્યું કે કૃષિ વીજળીનો પુરવઠો 8 કલાકથી વધારીને 10 કલાક કરવામાં આવ્યો છે. ખેડૂતો તરફથી વધતી વીજળીની માંગને ધ્યાનમાં રાખીને વધારાનો પુરવઠો આપવાનો નિર્ણય લેવાઈ રહ્યો હોવાનું તેમણે જણાવ્યું. મુખ્યમંત્રી ભૂપેન્દ્ર પટેલે જણાવ્યું કે ત્રણ દિવસના ગુજરાત વિધાનસભા ચોમાસુ સત્રમાં સરકારી બિલો ઉપરાંત પ્રજાના પ્રશ્નો પર પણ ચર્ચા કરવામાં આવશે. ધારાસભ્યો દ્વારા ઉઠાવવામાં આવતા પ્રશ્નોના જવાબ આપવા સરકાર તૈયાર હોવાનું તેમણે કહ્યું.

વંદે માતરમ વિવાદ, કોંગ્રેસ અને AAPનો વિરોધ તથા ખેડૂતો માટે 10 કલાક વીજળીના નિર્ણયને કારણે ગુજરાત વિધાનસભા ચોમાસુ સત્રનો પ્રથમ દિવસ રાજકીય રીતે મહત્વપૂર્ણ રહ્યો છે. હવે આગામી દિવસોમાં ગૃહની કાર્યવાહી દરમિયાન ખેડૂતો, વરસાદની અછત અને અન્ય જનહિતના મુદ્દાઓ પર ચર્ચા વધુ ઉગ્ર બનવાની શક્યતા છે.