રાહુલને કાર્યકરનો ઉકળાટ, સાચા લડાયક કાર્યકરને...

લોકસભાના વિપક્ષના નેતા રાહુલ ગાંધી આજે ગુજરાતની મુલાકાતે આવ્યા છે. આણંદમાં યોજાયેલા વિવિધ કાર્યક્રમોમાં હાજરી આપવા માટે રાહુલ ગાંધી વડોદરા એરપોર્ટ પર ઉતર્યા હતા જ્યાં પ્રદેશ કોંગ્રેસના નેતાઓ અને વડોદરા કોંગ્રેસના નેતાઓ તથા કાર્યકરોએ તેમનું ઉષ્માભર્યુ સ્વાગત કર્યું હતું. અહીં થોડી મિનીટો તેમણે કેટલાક કાર્યકરો સાથે પણ વાતચીત કરી હતી. કોંગ્રેસના કાર્યકર મિતેશ પરમારે રાહુલ ગાંધી સાથે વાતચીત કરી હતી. રજૂઆત માટે પોલીસે મિતેશને રાહુલ ગાંધીને મળવા ન દેતા આખરે  મિતેશ રાહુલ ગાંધીના કાફલા આગળ ઊભો થઇ ગયો હતો જેથી રાહુલ ગાંધીએ તેમને ગાડીમાં બેઠા બેઠા જ બોલાવ્યો હતો અને તેની સાથે વાત કરી હતી

વડોદરા કોંગ્રેસના કાર્યકર મિતેશ પરમારે મીડિયાને જણાવ્યું હતું કે અગાઉ યોજાયેલી દાંડી કૂચમાં હું રાહુલ ગાંધી સાથે 2 કલાક બેઠો હતો અને ત્યારબાદ પણ ત્રણથી ચાર વાર હું તેમને વિવિધ કાર્યક્રમોમાં મળ્યો હતો. મે તેમને આજે કહ્યું કે અમારા જેવા કોંગ્રેસના સાચા કાર્યકરો લડે છે અને સરકાર અને પોલીસ અમને ડરાવી રહી છે એટલે રાહુલ ગાંધીએ મને કહ્યું કે તારે કોઇથી ડરવાની જરુર નથી

 

કોંગ્રેસ કાર્યકર મિતેશ પરમારે જણાવ્યું કે થોડી મિનીટો માટે મારે રાહુલ ગાંધી સાથે વાત થઇ ત્યારે મે તેમને કહ્યું કે હવે લડાયક કાર્યકરોને આગળ લાવો.. સાચા માણસને આગળ લાવશો તો કોંગ્રેસની સરકાર બનશે. કોંગ્રેસે હવે તમામ આંદોલન કરવા પડશે. બધા ઘણા મુદ્દા છે. મારા જેવા ઘણા લડાયક છોકરા છે તેમને આગળ આવવા દેતા નથી. પૈસા વાળા આગળ આવી ગયા છે એટલે કોંગ્રેસ હારી રહી છે. અમારા જેવા લોકોને આગળ લાવે તો સરકાર બનશે. ભાજપ સાથે મળેલાને કાઢવાની વાત છે. તે તો રાહુલ ગાંધી જ તપાસ કરીને કહેશે

 

ઉલ્લેખનિય છે કે રાહુલ ગાંધી આણંદના અંધારીયા ચકલા નજીક આવેલ નિજાનંદ રિસોર્ટમાં આયોજિત પ્રશિક્ષણ શિબિરનું ઉદ્ઘાટન કરશે. તેઓ ચાર કલાક જેટલો સમય નવનિયુક્ત જિલ્લા પ્રમુખો સાથે વિતાવી તેમને માર્ગદર્શન આપશે. આ પ્રશિક્ષણ શિબિરમાં સંગઠન મહામંત્રી કે.સી. વેણુગોપાલ, મહામંત્રી અને ગુજરાત સંગઠન પ્રભારી મુકુલ વાસનીક, ગુજરાત કોંગ્રેસના પ્રમુખ અમિત ચાવડા સહિત પ્રદેશ કોંગ્રેસ અને આણંદ કોંગ્રેસના હોદ્દેદારો ઉપસ્થિત રહેશે.

આ પણ વાંચો---

કોંગ્રેસની નજર લાગી એટલે અમદાવાદના રોડ તૂટી ગયા!