<h1 dir="ltr" data-pm-slice="1 1 []"><span style="font-size: 12pt;">અમિત શાહનો ગુજરાત પ્રવાસ: આજે અને આવતીકાલે વિવિધ કાર્યક્રમોમાં ભાગ લેશે</span></h1>
<p dir="ltr">કેન્દ્રીય ગૃહ અને સહકાર મંત્રી અમિત શાહ આજે, 30 ઓગસ્ટથી બે દિવસના ગુજરાત પ્રવાસે છે. 30 અને 31 ઓગસ્ટ દરમિયાન તેઓ વિવિધ કાર્યક્રમોમાં ભાગ લેશે. આ મુલાકાત દરમિયાન તેઓ ગણેશ મહોત્સવની મુલાકાત, હેલ્થ સેન્ટરનું લોકાર્પણ, વૃક્ષારોપણ કાર્યક્રમ, જનરક્ષક પ્રોજેક્ટ સહિતના વિકાસ કાર્યોનું ઉદ્ઘાટન કરશે અને ધાર્મિક કાર્યક્રમોમાં હાજરી આપશે.</p>
<h2 dir="ltr">30 ઓગસ્ટનો કાર્યક્રમ</h2>
<p dir="ltr">અમિત શાહ આજે, 30 ઓગસ્ટના રોજ ગણેશ મહોત્સવના બે મુખ્ય કાર્યક્રમોમાં ઉપસ્થિત રહેશે. તેઓ સાંજે 7:45 વાગ્યે ગજાનંદ યુવક મંડળ દ્વારા આયોજિત 'શ્યામલ કા રાજા' ગણેશ મહોત્સવમાં મૌર્યાંશ એલાન્ઝા, શ્યામલ ચાર રસ્તા, જોધપુર, અમદાવાદ ખાતે દર્શન કરશે. ત્યારબાદ, રાત્રે 8:15 વાગ્યે સરદાર પટેલ સેવાદળ દ્વારા આયોજિત 40માં 'વસ્ત્રાપુરના મહાગણપતિ' ગણેશ મહોત્સવમાં સરદાર પટેલ ચોક, નહેરુ પાર્ક પાસે, વસ્ત્રાપુર, અમદાવાદ ખાતે દર્શન કરશે. આ બંને કાર્યક્રમોમાં તેમની ઉપસ્થિતિથી કાર્યકરોમાં ઉત્સાહનો માહોલ જોવા મળી રહ્યો છે.</p>
<h2 dir="ltr">31 ઓગસ્ટનો કાર્યક્રમ</h2>
<p dir="ltr">31 ઓગસ્ટના રોજ અમિત શાહ અમદાવાદમાં વિવિધ વિકાસ કાર્યોનું લોકાર્પણ કરશે. સવારે 10:15 વાગ્યે ગોતા વોર્ડ ખાતે નવનિર્મિત ઓગણજ અર્બન હેલ્થ સેન્ટરનું લોકાર્પણ થશે. ત્યારબાદ, સવારે 10:35 વાગ્યે ચાંદલોડિયા વોર્ડમાં નવનિર્મિત વંદે માતરમ અર્બન હેલ્થ સેન્ટરનું ઉદ્ઘાટન થશે. સવારે 10:45 વાગ્યે રાણીપ વોર્ડમાં વૃક્ષારોપણ કાર્યક્રમ યોજાશે. આ ઉપરાંત, એએમસી દ્વારા સ્ટેડિયમ વોર્ડમાં તૈયાર થઈ રહેલ અર્બન ફોરેસ્ટ ખાતે પણ વૃક્ષારોપણ કાર્યક્રમ યોજાશે.</p>
<h3 dir="ltr">ભદ્રકાળી મંદિરે દર્શન અને સરદાર બાગનું લોકાર્પણ</h3>
<p dir="ltr">અમદાવાદ શહેરના કુળદેવી શ્રી ભદ્રકાળી માતાજીના પૌરાણિક મંદિરે અમિત શાહ સવારે 11:30 વાગ્યે દર્શન કરશે. ત્યારબાદ, ટોરેન્ટ ગ્રુપ-યુએનએમ ફાઉન્ડેશન દ્વારા પુનઃવિકસિત કરવામાં આવેલ સરદાર બાગનું લોકાર્પણ સવારે 11:40 વાગ્યે કરશે. ઘાટલોડિયા વોર્ડ ખાતે વિવિધ સોસાયટીઓના ચેરમેન-સેક્રેટરીઓ સાથે વૃક્ષારોપણ કાર્યક્રમ બપોરે 12:15 વાગ્યે યોજાશે. DIAL 112 અંતર્ગત શરૂ થઈ રહેલ 'જનરક્ષક પ્રોજેક્ટ'ના લોકાર્પણ પ્રસંગે સાંજે 4:30 વાગ્યે રામકથા ગ્રાઉન્ડ, હોટલ ડવેલીની સામે, સેક્ટર-11, ગાંધીનગર ખાતે જાહેર કાર્યક્રમ યોજાશે.</p>

વિવિધ ગણેશ મહોત્સવમાં હાજરી આપશે

August 30, 2025 | 14:56 IST