અખિલેશે કહ્યું ‘3 નહીં, 403’... રાજ્યસભાની ત્રીજી સીટ પર SPએ કેમ બદલી રણનીતિ?

UP Rajya Sabha Elections: ઉત્તર પ્રદેશના રાજકારણમાં રાજ્યસભા ચૂંટણી વચ્ચે સમાજવાદી પાર્ટી (SP)ના વડા અખિલેશ યાદવની એક પોસ્ટે રાજકીય ચર્ચા તેજ કરી છે. અખિલેશ યાદવે સોશિયલ મીડિયા પ્લેટફોર્મ X પર લખ્યું, “હવે અમારું ધ્યાન ત્રણ પર નહીં, પરંતુ ચારસો ત્રણ પર છે.” તેમની આ પોસ્ટને 2027ની ઉત્તર પ્રદેશ વિધાનસભા ચૂંટણી સાથે જોડીને જોવામાં આવી રહી છે. સંકેત એવો છે કે SP હવે રાજ્યસભાની ત્રીજી બેઠક કરતાં ઉત્તર પ્રદેશની 403 વિધાનસભા બેઠકો પર વધુ ધ્યાન કેન્દ્રિત કરી શકે છે.

 

अब हमारी निगाह तीन पर नहीं, चार सौ तीन पर है।

— Akhilesh Yadav (@yadavakhilesh) October 6, 2026

 

રાજ્યસભાની ત્રીજી બેઠક પર SPનો નિર્ણય?
ઉત્તર પ્રદેશમાં રાજ્યસભાની 10 બેઠકો માટે ચૂંટણીનું રાજકીય ગણિત રસપ્રદ બન્યું હતું. SP પાસે બે બેઠકો જીતવા માટે જરૂરી સંખ્યાબળ હોવાનું માનવામાં આવે છે. એક રાજ્યસભા બેઠક માટે 37 પ્રથમ પસંદગીના મતો જરૂરી છે. એટલે બે બેઠકો માટે 74 મત જરૂરી બને છે. SP પાસે હાલમાં 98 ધારાસભ્યો છે. જેલમાં બંધ રમાકાંત યાદવને મતદાનની મંજૂરી ન મળે તો આ સંખ્યા ઘટીને 97 થઈ શકે છે. કોંગ્રેસના બે ધારાસભ્યોનું સમર્થન મળે તો SPનું સંખ્યાબળ 99 સુધી પહોંચી શકે છે. ત્રીજી બેઠક માટે 111 પ્રથમ પસંદગીના મતોની જરૂર પડતી. બે બેઠકો જીત્યા બાદ SP પાસે વધારાના મતો બચત, પરંતુ ત્રીજી બેઠક માટે વધુ ધારાસભ્યોના સમર્થનની જરૂરિયાત રહેતી. આ માટે SP અન્ય વિપક્ષી અને બિન-BJP ધારાસભ્યોના સમર્થન પર નજર રાખી રહી હોવાની ચર્ચા હતી.

અખિલેશની એક પોસ્ટથી બદલાયું રાજકીય ગણિત
SP તરફથી અગાઉ ત્રીજો રાજ્યસભા ઉમેદવાર ઉતારવાનો સંકેત આપવામાં આવ્યો હતો. પાર્ટીના નેતા રવિદાસ મેહરોત્રાએ પણ ત્રીજા ઉમેદવારનું નામાંકન 6 ઓક્ટોબરે ભરવાની વાત કરી હતી. જોકે, હવે અખિલેશ યાદવની “ત્રણ નહીં, 403” પોસ્ટ બાદ પાર્ટીની રણનીતિ બદલાઈ હોવાની અટકળો તેજ થઈ છે. જો SP ત્રીજો ઉમેદવાર મેદાનમાં નહીં ઉતારે તો BJPના આઠ અને SPના બે ઉમેદવારો વચ્ચે સીધી ચૂંટણીની સ્થિતિ નહીં રહે. પરિણામે તમામ 10 ઉમેદવારો બિનહરીફ ચૂંટાઈ શકે છે.

SPના બે ઉમેદવાર, BJPના આઠ ઉમેદવાર
SPએ રાજ્યસભા ચૂંટણી માટે પ્રોફેસર રામગોપાલ યાદવ અને ધનરાજ પરિમલ નથવાણીના નામ જાહેર કર્યા છે. બંને ઉમેદવારોએ 30 સપ્ટેમ્બરે ઉમેદવારી નોંધાવી હતી. બીજી તરફ BJPએ ઉત્તર પ્રદેશની 10 રાજ્યસભા બેઠકો માટે આઠ ઉમેદવારો જાહેર કર્યા છે. BJPની યાદીમાં ધરમપાલ સિંહ, રાધાકાંત ઓઝા, પ્રકાશ પાલ, વિદ્યાસાગર સોનકર, ગોપી કૃષ્ણ પાંડે, પ્રિયંકા સિંહ રાવત, રામ પ્રતાપ સિંહ ચૌહાણ અને શ્રુતિ ગંગવારનો સમાવેશ થાય છે.

હવે નજર 2027ની UP વિધાનસભા ચૂંટણી પર
અખિલેશ યાદવની “403” પોસ્ટનો સીધો સંદર્ભ ઉત્તર પ્રદેશ વિધાનસભાની કુલ 403 બેઠકો તરફ માનવામાં આવી રહ્યો છે. રાજ્યસભાની ત્રીજી બેઠક માટે વધારાના ધારાસભ્યોનું સમર્થન મેળવવાની રાજનીતિ કરતાં SP હવે 2027ની વિધાનસભા ચૂંટણી માટે સંગઠન, ગઠબંધન અને સામાજિક સમીકરણ પર ધ્યાન કેન્દ્રિત કરે છે કે નહીં, તે આગામી દિવસોમાં સ્પષ્ટ થશે. દરમિયાન, અખિલેશ યાદવે ચૂંટણી પંચ અને BJP પર પણ આકરા આક્ષેપો કર્યા છે. તેમણે ચૂંટણી પંચની નિષ્પક્ષતા પર સવાલ ઉઠાવતા ચૂંટણી પ્રક્રિયા અંગે પોતાની ચિંતા વ્યક્ત કરી છે. આ રીતે ઉત્તર પ્રદેશમાં રાજ્યસભાની ચૂંટણીનું ગણિત હવે 10 બેઠકો પૂરતું રહ્યું નથી. અખિલેશ યાદવની “ત્રણ નહીં, 403” પોસ્ટે રાજકીય ચર્ચાનું કેન્દ્ર 2027ની ઉત્તર પ્રદેશ વિધાનસભા ચૂંટણી તરફ ખસેડી દીધું છે.