ભારતીય બજારમાં સોનાના ભાવમાં સતત ત્રીજા સપ્તાહે નરમાઈ જોવા મળી છે. મજબૂત ડોલર, US ફેડરલ રિઝર્વના કડક વલણ અને સ્થાનિક માંગમાં ઘટાડાને કારણે સોનાની ચમક ધીમી પડી છે. ઇન્ડિયા બુલિયન એન્ડ જ્વેલર્સ એસોસિએશન (IBJA)ના તાજા આંકડા મુજબ, 24 કેરેટ સોનાનો 10 ગ્રામનો ભાવ ₹670 ઘટીને ₹1,20,100 પર બંધ રહ્યો છે, જે પાછલા સપ્તાહના ₹1,20,770 કરતા ઓછો છે.
ચાંદીના ભાવમાં પણ સમાન દબાણ જોવા મળ્યું. એક કિલોગ્રામ ચાંદી ₹850 ઘટીને ₹1,48,275 પર પહોંચી છે.
ફેડના નિવેદન અને મજબૂત ડોલરથી દબાણ
આંતરરાષ્ટ્રીય બુલિયન બજાર $4,000 પ્રતિ ઔંસની આસપાસ ટકી રહ્યું છે, પરંતુ ફેડ ચેર જેરોમ પોવેલના કડક નિવેદન બાદ ડિસેમ્બરમાં વધુ વ્યાજદર કટની અપેક્ષા 90%થી ઘટીને લગભગ 60% સુધી આવી ગઈ છે. આથી ડોલર ઈન્ડેક્સ 100ની નજીક પહોંચ્યો અને રૂપિયો પણ 89 સુધી નબળો પડ્યો. પરિણામે સોનાની માંગમાં ઘટાડો નોંધાયો છે.
વૈશ્વિક પરિબળો અને માગમાં ફેરફાર
વિશ્લેષકોના મતે, USમાં ચાલી રહેલા લાંબા ગાળાના શટડાઉનને કારણે ખાનગી સર્વેક્ષણોએ ઉદ્યોગમાં મંદી દર્શાવી છે. આ સાથે જ, યુએસ પ્રમુખ ડોનાલ્ડ ટ્રમ્પ અને ચીનના પ્રમુખ શી જિનપિંગ વચ્ચે વેપાર તણાવ હળવો થતાં &lsquo;સેફ હેવન&rsquo; રૂપે સોનાની માંગ ઘટી છે.
ચીને શાંઘાઈ ગોલ્ડ એક્સચેન્જ દ્વારા સોનાના રિટેલરો માટેના VAT લાભોમાં ઘટાડો કર્યો છે, જેના કારણે વિશ્વના સૌથી મોટા સોનાના ગ્રાહક દેશમાં ફિઝિકલ માંગ ઘટી શકે છે.
ભાવ ઘટાડા પાછળના મુખ્ય પરિબળો
દિવાળી બાદ મોસમી માંગમાં ઘટાડો થતાં સ્થાનિક સ્તરે સોનાની ખરીદી ધીમી પડી છે. બીજી તરફ, યુએસ-ચીન સંબંધોમાં સુધારાથી વૈશ્વિક તણાવ ઘટ્યો છે, જેના કારણે રોકાણકારોનો રુઝાન અન્ય ક્ષેત્રોમાં વધ્યો છે. યુએસ ફેડની કડક નીતિ અને વધતા ડોલર ઈન્ડેક્સને કારણે સોનાના ભાવ પર દબાણ સર્જાયું છે. ટેકનિકલ ઈન્ડિકેટર્સ &lsquo;ઓવરબોટ&rsquo; ઝોનમાં હોવાને કારણે અનેક રોકાણકારોએ પ્રોફિટ બુકિંગ શરૂ કરી છે, જેના પરિણામે બજારમાં સોનાના ભાવમાં વધુ નરમાઈ જોવા મળી છે.
આગળ શું?
ટ્રેડર્સના મતે, જો ડોલર ઈન્ડેક્સ 100થી ઉપર સ્થિર રહેશે અને ફેડની નીતિ વધુ કડક બનશે, તો સોનાના ભાવમાં આવનારા અઠવાડિયામાં વધુ નરમાઈ જોવા મળી શકે છે. બીજી તરફ, જો વૈશ્વિક અનિશ્ચિતતા વધશે, તો રોકાણકારો ફરીથી સેફ-હેવન તરીકે સોનાની તરફ વળશે.

સતત ત્રીજા સપ્તાહે સોનામાં નરમાઈ

ફેડની કડક નીતિ અને માગમાં ઘટાડાથી બુલિયન બજારમાં દબાણ, ડોલર મજબુત થતા ભાવ લથડ્યા..

November 8, 2025 | 15:28 IST