Phone addiction: તમારાં બાળકને મોબાઈલની લત આ રીતે છોડાવો!

બાળકો માટે કલાકો સુધી મોબાઈલ જોવું સામાન્ય થઈ ગયું છે. મોબાઈલ જોવાનો શોખ ક્યારે વ્યસનમાં ફેરવાઈ જાય છે તે ખબર પડતી નથી. સમય જતાં, બાળકોની આ આદત માતાપિતા માટે મુશ્કેલીનું કારણ બની જાય છે. મોબાઈલ જોવાનું વ્યસન બાળકોને માત્ર શારીરિક રીતે નુકસાન પહોંચાડતું નથી, પરંતુ તેમના માનસિક વિકાસમાં પણ અવરોધ ઉભો કરે છે. અનેક એવી રીતો છે જેના કારણે તમારૂં બાળક આપોઆપ મોબાઇલ જોવાનું ધીમે ધીમે છોડી દેશે.

માતાપિતાએ ફોનનો ઉપયોગ ઓછો કરવો જોઈએ

બાળક નાનું હોય ત્યારે તે આસપાસના લોકોને જોઈને શીખે છે. આવી સ્થિતિમાં, જો માતાપિતા આખો દિવસ ફોન પર વ્યસ્ત રહે છે, તો બાળકની જિજ્ઞાસા પણ વધે છે અને તેને ફોનનો ઉપયોગ કરવાનું મન પણ થાય છે.

બાળકને સમજાવો

જો તમે બાળકની ફોનની આદતથી છૂટકારો મેળવવા માંગતા હો, તો તેમને પ્રેમથી સમજાવો કે ફોનનો ઉપયોગ તેમના માટે હાનિકારક હોઈ શકે છે. કારણ કે જો તમે બાળકને ઠપકો આપીને કે માર મારીને કંઈક કરવાની મનાઈ કરો છો, તો તે જીદ્દી બની જાય છે અને વારંવાર એ જ કામ કરે છે. આથી પ્રેમથી સમજાવવું જરૂરી છે. 

તેમને પ્રવૃત્તિઓ કરાવો

બાળકો જ્યારે માંગે ત્યારે ફોન આપવાને બદલે, તેમની સાથે રમો. તેમને નવી પ્રવૃત્તિઓમાં વ્યસ્ત રાખો. જેમ કે પેન્ટિંગ, ડાન્સ, મ્યુઝિક, યોગ, રમતો. જેના કારણે બાળકની મોબાઇલની લતતો છૂટી જશે સાથે સાથે બાળકનો  શારીરિક અને માનસિક વિકાસ પણ થશે. 

ટાઇમ ટેબલ બનાવો

જાગવા અને સૂવા વચ્ચે બાળક દિવસભર શું કરશે તેનો સમય નક્કી કરો. આનાથી બાળકને આખા દિવસનો ઉપયોગ કેવી રીતે કરવો તે જાણવામાં પણ મદદ મળશે. આ ટાઇમ ટેબલમાં, તેમના સૂવા, ખાવા, રમવા અને અભ્યાસ કરવાનો સમય નક્કી કરો. આ પછી, તેમને દિવસમાં ફક્ત 20 મિનિટથી 30 મિનિટ માટે ફોન આપો.

બાળકની નજરથી ફોન દૂર રાખો 

બાળકો પાસે ફોન ન રાખો. ફોનને તેની નજરથી દૂર રાખો. જેથી તે ફોનનો ઉપયોગ કરવા માટે ઓછા લલચાય. રાત્રે, ખાસ ધ્યાન રાખો કે ફોન બાળકોની નજીક ન રાખવામાં આવે. ખાતરી કરો કે તે ફોનનો ઉપયોગ તમારી દેખરેખથી દૂર ન કરી રહ્યા હોય.