બ્રિક્સે પેહલગામ આતંકી હુમલાની કરી કડક નિંદા, આતંકવાદ સામે મજબૂત સંકલ્પ

બ્રાઝિલના રિયો ડી જાનેરોમાં ચાલી રહેલા બ્રિક્સ સમિટના પહેલા દિવસે રવિવારે સભ્ય દેશોએ આતંકવાદ સામે કડક વલણ અપનાવ્યું અને આ વર્ષે એપ્રિલમાં જમ્મુ અને કાશ્મીરના પહેલગામમાં થયેલા આતંકવાદી હુમલાની નિંદા કરી.

બ્રિક્સ સમિટમાં પ્રથમ દિવસની કાર્યવાહી પછી અપનાવવામાં આવેલા 'રિયો ડી જાનેરો ઘોષણા'માં કોઈપણ આતંકવાદી કૃત્યની સખત નિંદા કરવામાં આવી, તેને "ગુનાહિત" અને "અન્યાયી" ગણાવવામાં આવ્યું, તેનો હેતુ ગમે તે હોય, ગમે ત્યારે, ગમે ત્યાં અને ગમે તે વ્યક્તિ દ્વારા કરવામાં આવે.

રિયો ઘોષણાના ફકરા 34માં લખ્યું કે, "અમે 22 એપ્રિલ 2025ના રોજ જમ્મુ અને કાશ્મીરમાં થયેલા આતંકવાદી હુમલાની સખત નિંદા કરીએ છીએ, જેમાં ઓછામાં ઓછા 26 લોકો માર્યા ગયા હતા અને ઘણા લોકો ઈજાગ્રસ્ત થયા હતા. અમે આતંકવાદીઓની સરહદ પારની હિલચાલ, આતંકવાદને ભંડોળ પૂરું પાડવા અને સુરક્ષિત આશ્રયસ્થાનો સહિત તેના તમામ સ્વરૂપો અને અભિવ્યક્તિઓમાં આતંકવાદ સામે લડવાની અમારી પ્રતિબદ્ધતાની પુષ્ટિ કરીએ છીએ."

બ્રિક્સ નેતાઓએ સંયુક્ત રીતે કહ્યું કે, "અમે પુનરોચ્ચાર કરીએ છીએ કે, આતંકવાદને કોઈપણ ધર્મ, રાષ્ટ્રીયતા, સભ્યતા અથવા વંશીય જૂથ સાથે જોડવું જોઈએ નહિ, અને આતંકવાદી પ્રવૃત્તિઓ અને તેમના સમર્થનમાં સામેલ તમામ લોકોને જવાબદાર ઠેરવવા જોઈએ અને સંબંધિત રાષ્ટ્રીય અને આંતરરાષ્ટ્રીય કાયદા અનુસાર ન્યાયના કઠેડામાં લાવવા જોઈએ."

અમે આતંકવાદ માટે શૂન્ય સહિષ્ણુતા સુનિશ્ચિત કરવા અને આતંકવાદ સામે લડવામાં બેવડા ધોરણોને નકારવા વિનંતી કરીએ છીએ, એમ તેમણે કહ્યું. અમે આતંકવાદ સામે લડવામાં રાજ્યોની પ્રાથમિક જવાબદારી પર ભાર મૂકીએ છીએ અને આતંકવાદી જોખમોને રોકવા અને તેનો સામનો કરવા માટેના વૈશ્વિક પ્રયાસોએ આંતરરાષ્ટ્રીય કાયદા હેઠળ તેમની જવાબદારીઓનું સંપૂર્ણ પાલન કરવું જોઈએ, જેમાં સંયુક્ત રાષ્ટ્રના ચાર્ટર, ખાસ કરીને તેના હેતુઓ અને સિદ્ધાંતો અને સંબંધિત આંતરરાષ્ટ્રીય સંમેલનો અને પ્રોટોકોલ, ખાસ કરીને આંતરરાષ્ટ્રીય માનવાધિકાર કાયદો, આંતરરાષ્ટ્રીય શરણાર્થી કાયદો અને આંતરરાષ્ટ્રીય માનવતાવાદી કાયદો, લાગુ પડે તે રીતે સમાવેશ છે.

આ અગાઉ, શાંતિ અને સુરક્ષા પરના શિખર સંમેલનને સંબોધતા, વડાપ્રધાન નરેન્દ્ર મોદીએ કહ્યું હતું કે, વૈશ્વિક શાંતિ અને સુરક્ષા ફક્ત એક આદર્શ નથી, તે આપણા બધાના સામાન્ય હિતો અને ભવિષ્યનો પાયો છે. માનવતાનો વિકાસ ફક્ત શાંતિપૂર્ણ અને સુરક્ષિત વાતાવરણમાં જ શક્ય છે. આ ઉદ્દેશ્યને પૂર્ણ કરવામાં બ્રિક્સની ખૂબ જ મહત્વપૂર્ણ ભૂમિકા છે. આપણા સામાન્ય પડકારોનો સામનો કરવા માટે, આપણે એક થવું પડશે અને સામૂહિક પ્રયાસો કરવા પડશે અને સાથે મળીને આગળ વધવું પડશે.

તેમણે કહ્યું કે, આતંકવાદ આજે માનવતા માટે સૌથી ગંભીર પડકાર બની ગયો છે. તાજેતરમાં ભારતે એક અમાનવીય અને કાયર આતંકવાદી હુમલોનો સામનો કરવો પડ્યો. 22 એપ્રિલે પહેલગામમાં થયેલો આતંકવાદી હુમલો ભારતની આત્મા, ઓળખ અને ગૌરવ પર સીધો હુમલો હતો. આ હુમલો માત્ર ભારત માટે જ નહિ, પરંતુ સમગ્ર માનવતા માટે એક ફટકો હતો. હું દુ:ખની આ ઘડીમાં આપણી સાથે ઉભા રહેલા મિત્ર દેશોનો હૃદયપૂર્વક આભાર માનું છું, જેમણે સમર્થન અને સંવેદના વ્યક્ત કરી છે.

પીએમ મોદીએ કહ્યું કે, આતંકવાદની નિંદા એ આપણો 'સિદ્ધાંત' હોવો જોઈએ, ફક્ત 'સુવિધા' જ નહીં. જો આપણે પહેલા જોઈએ કે હુમલો કયા દેશમાં થયો છે, કોની સામે થયો છે, તો તે માનવતાની સામે વિશ્વાસઘાત હશે.

તેમણે કહ્યું કે, આતંકવાદીઓ પર પ્રતિબંધો લાદવામાં કોઈ સંકોચ ન હોવો જોઈએ. આતંકવાદના પીડિતો અને સમર્થકોને એક જ માપદંડ પર તોલી શકાય નહિ. વ્યક્તિગત કે રાજકીય લાભ માટે આતંકવાદને મૌન સંમતિ આપવી, આતંકવાદ કે આતંકવાદીઓને ટેકો આપવો, કોઈપણ સંજોગોમાં સ્વીકાર્ય ન હોવો જોઈએ. આતંકવાદ અંગે શબ્દો અને કાર્યોમાં કોઈ તફાવત ન હોવો જોઈએ. જો આપણે આ કરી શકતા નથી, તો સ્વાભાવિક રીતે જ પ્રશ્ન ઉભો થાય છે કે, શું આપણે આતંકવાદ સામેની લડાઈ પ્રત્યે ગંભીર છીએ કે નહિ?

વડાપ્રધાને કહ્યું કે, આજે પશ્ચિમ એશિયાથી લઈને યુરોપ સુધી દુનિયા વિવાદો અને તણાવોથી ઘેરાયેલી છે. ગાઝામાં માનવતાવાદી પરિસ્થિતિ ખૂબ જ ચિંતાનો વિષય છે. ભારત દ્રઢપણે માને છે કે પરિસ્થિતિઓ ગમે તેટલી મુશ્કેલ હોય, માનવતાના કલ્યાણ માટે શાંતિનો માર્ગ જ એકમાત્ર વિકલ્પ છે.

તેમણે કહ્યું કે, ભારત ભગવાન બુદ્ધ અને મહાત્મા ગાંધીની ભૂમિ છે. આમારા માટે યુદ્ધ અને હિંસા માટે કોઈ સ્થાન નથી. ભારત એવા દરેક પ્રયાસને સમર્થન આપે છે જે વિશ્વને વિભાજન અને સંઘર્ષમાંથી બહાર કાઢે છે અને તેને સંવાદ, સહયોગ અને સંકલન તરફ દોરી જાય છે, એકતા અને વિશ્વાસ વધારે છે. આ દિશામાં, અમે બધા મિત્ર દેશો સાથે સહયોગ અને ભાગીદારી માટે પ્રતિબદ્ધ છીએ.

પીએમ મોદીએ આખરે આવતા વર્ષે ભારતની અધ્યક્ષતામાં યોજાનારી બ્રિક્સ સમિટમાં તમામ સભ્ય દેશોને આમંત્રણ આપ્યું.