ફ્લાઇટમાં પહેલા બોલાચાલી, પછી મુક્કા-લાત! લંડનથી ઢાકા જતી ફ્લાઇટમાં આખરે કેમ મચ્યો હંગામો?

London-Dhaka Flight Passengers Fight: લંડનથી ઢાકા જતી બાંગ્લાદેશ એરલાઇન્સની ફ્લાઇટમાં બે મુસાફરો વચ્ચે મારામારીની ઘટના સામે આવી છે. ફ્લાઇટમાં બંને મુસાફરો વચ્ચે પહેલા બોલાચાલી થઈ હતી અને ત્યારબાદ વિવાદ શારીરિક ઝઘડામાં ફેરવાઈ ગયો હતો. ઘટનાનો વીડિયો સોશિયલ મીડિયા પર વાયરલ થઈ રહ્યો છે. વીડિયોમાં બંને મુસાફરો એકબીજા સાથે મારામારી કરતા જોવા મળે છે, જ્યારે અન્ય મુસાફરો તેમને રોકવાનો પ્રયાસ કરતા નજરે પડે છે.

 

📹A video showing two passengers fighting mid-air aboard a #Biman_Bangladesh_Airlines flight has gone viral on social media.

▪️The flight was travelling from #London to #Dhaka when the two passengers reportedly got into a heated argument that escalated into a physical… pic.twitter.com/U9Ld4M8Pnd

— ⚡️🌎 World News 🌐⚡️ (@ferozwala) September 18, 2026

 

લંડન-ઢાકા ફ્લાઇટમાં પહેલા થઈ બોલાચાલી
ઢાકા ટ્રિબ્યુનના અહેવાલ અનુસાર, બાંગ્લાદેશ એરલાઇન્સની લંડનથી ઢાકા જતી ફ્લાઇટમાં બે મુસાફરો વચ્ચે કોઈ મુદ્દે દલીલ શરૂ થઈ હતી. શરૂઆતમાં બંને વચ્ચે બોલાચાલી ચાલી હતી, પરંતુ થોડા સમય બાદ મામલો એટલો વધી ગયો કે બંને એકબીજા સાથે મારામારી કરવા લાગ્યા. વાયરલ વીડિયોમાં બંને મુસાફરો એકબીજાને મુક્કા અને લાત મારતા જોવા મળે છે. આ દરમિયાન આસપાસ બેઠેલા મુસાફરોએ બંનેને અલગ કરવાનો પ્રયાસ કર્યો હતો.

મારામારીથી ફ્લાઇટમાં સર્જાયો તણાવ
બે મુસાફરો વચ્ચે થયેલી લડાઈને કારણે ફ્લાઇટમાં હાજર અન્ય મુસાફરોમાં ચિંતા ફેલાઈ હતી. વીડિયોમાં એક મુસાફરની ટી-શર્ટ ફાટેલી જોવા મળે છે. મુસાફરોએ બંનેને રોકવા માટે અનેક પ્રયાસો કર્યા હતા. અંતે બંનેને કાબૂમાં લેવામાં આવ્યા હતા અને સ્થિતિને વધુ વણસતી અટકાવવામાં આવી હતી. જોકે, આ ઝઘડો કયા કારણોસર શરૂ થયો હતો તેની ચોક્કસ માહિતી હજુ સામે આવી નથી.

પાઇલટે પણ કરી દરમિયાનગીરી
રિપોર્ટ અનુસાર, ફ્લાઇટમાં થયેલા વિવાદની જાણ થતાં પાઇલટે પણ ઘટનામાં દરમિયાનગીરી કરી હતી. પાઇલટ મુસાફરો તરફ પહોંચ્યા અને પરિસ્થિતિને નિયંત્રણમાં લાવવાનો પ્રયાસ કર્યો હતો. મુસાફરો અને ફ્લાઇટ સ્ટાફની દરમિયાનગીરી બાદ પરિસ્થિતિ શાંત થઈ હતી. આ સમગ્ર ઘટનાનો વીડિયો સામે આવ્યા બાદ લંડનથી ઢાકા જતી ફ્લાઇટમાં થયેલી મારામારી અંગે સોશિયલ મીડિયા પર ચર્ચા શરૂ થઈ છે.

બાંગ્લાદેશ એરલાઇન્સે શું કહ્યું?
અહેવાલ મુજબ, એરલાઇનના જનરલ મેનેજર મહબુબુદ્દીન અહેમદે કહ્યું હતું કે તેમને આ ઘટનાની માહિતી નથી, પરંતુ તેઓ તેના વિશે ટૂંક સમયમાં જાણકારી મેળવશે. એરલાઇને આ મામલે હાલમાં વધુ વિગતવાર નિવેદન આપ્યું નથી. બંને મુસાફરો વચ્ચે ઝઘડો શા માટે થયો અને તેમની સામે કોઈ સત્તાવાર કાર્યવાહી કરવામાં આવી છે કે નહીં તે અંગે પણ સ્પષ્ટ માહિતી ઉપલબ્ધ નથી.

ફ્લાઇટમાં મુસાફરોની સુરક્ષા અંગે ચર્ચા
લંડનથી ઢાકા જતી ફ્લાઇટમાં બનેલી આ ઘટના બાદ વિમાનમાં મુસાફરોની સુરક્ષા અને શિસ્ત અંગે ફરી ચર્ચા શરૂ થઈ છે. ફ્લાઇટ દરમિયાન મુસાફરો વચ્ચે વિવાદ શારીરિક ઝઘડામાં ફેરવાય ત્યારે અન્ય મુસાફરો અને ક્રૂ માટે પરિસ્થિતિ સંભાળવી પડકારરૂપ બની શકે છે. હાલમાં વાયરલ વીડિયોમાં દેખાતી ઘટનાને લઈને વધુ સત્તાવાર વિગતોની રાહ જોવાઈ રહી છે. બંને મુસાફરો સામે કઈ કાર્યવાહી થઈ છે તે અંગે પણ એરલાઇન અથવા સંબંધિત સત્તાવાળાઓ તરફથી વધુ માહિતી સામે આવવાની બાકી છે.