Austria : ગ્રાઝ શહેરની બોર્ગ ડ્રેયર્શચુટ્ઝેનગાસ હાઈસ્કૂલમાં ગોળીબાર, 5 થી વધુના મોત...

ઑસ્ટ્રિયાના બીજા સૌથી મોટા શહેર ગ્રાઝની બોર્ગ ડ્રેયર્શચુટ્ઝેનગાસ હાઈસ્કૂલ આજે લોહીયાળ બની છે. સવારે 10 વાગ્યે (સ્થાનિક સમય) ગોળીબારના અવાજોથી ધણધણી ઉઠેલી આ શાળામાં ભયાનક ઘટના બની છે, જેમાં "ઘણી મોત" થઈ હોવાનું ઑસ્ટ્રિયાના ગૃહ મંત્રાલયે જણાવ્યું છે. જોકે, મૃત્યુ પામેલા વિદ્યાર્થીઓ અને શિક્ષકોની ચોક્કસ સંખ્યા કે ઘાયલો અંગે તાત્કાલિક કોઈ સત્તાવાર પુષ્ટિ કરવામાં આવી નથી, પરંતુ સ્થાનિક સમાચાર ચેનલો ઓછામાં ઓછા આઠ લોકો માર્યા ગયા હોવાનો દાવો કરી રહી છે.

હુમલાખોરની આત્મહત્યાની આશંકા, શાળા ખાલી કરાવાઈ...

ગોળીબારના અવાજો સાંભળીને પોલીસને ફોન કરાયા બાદ ત્વરિત કાર્યવાહી કરવામાં આવી હતી. ગ્રાઝ પોલીસે X (અગાઉ ટ્વિટર) પર જણાવ્યું હતું કે શાળાને તાત્કાલિક ખાલી કરાવી દેવામાં આવી હતી અને તમામ વિદ્યાર્થીઓ તથા કર્મચારીઓને સુરક્ષિત સ્થળે ખસેડવામાં આવ્યા હતા. પોલીસે એ પણ પુષ્ટિ કરી છે કે, સ્થળ પર હવે કોઈ ખતરો નથી અને સમગ્ર વિસ્તારને સુરક્ષિત જાહેર કરવામાં આવ્યો છે. આ હુમલાખોરે આત્મહત્યા કરી લીધી હોવાના પણ દાવાઓ કરવામાં આવી રહ્યા છે, પરંતુ સત્તાવાર રીતે તેની પુષ્ટિ થઈ નથી.

આ પણ વાંચો : કેનેડામાં બે ભારતીય યુવકોના મોતઃ એકને ગોળી મારી, બીજાનું તળાવમાં ડૂબી જતાં મોત

યુરોપમાં શાળા હિંસાનો ભયાવહ પડછાયો...

આ ઘટના યુરોપમાં શાળા હિંસાના ભયાવહ પડછાયાને ફરી એકવાર ઉજાગર કરે છે. નિર્દોષ વિદ્યાર્થીઓ અને શિક્ષકોને નિશાન બનાવતી આવી ઘટનાઓ સમાજમાં ભય અને અશાંતિ ફેલાવે છે. 3,00,000 થી વધુ વસ્તી ધરાવતું ગ્રાઝ, જે રાજધાની વિયેનાથી લગભગ 200 કિલોમીટર દક્ષિણ-પશ્ચિમમાં આવેલું છે, ત્યાં બનેલી આ ઘટનાએ સમગ્ર ઑસ્ટ્રિયાને હચમચાવી દીધું છે.

આ પણ વાંચો : US માં ભારતીય વિદ્યાર્થી સાથે બર્બરતા, નેવાર્ક એરપોર્ટ પર ઘાતકી વર્તનનો Video Viral

આ દુર્ઘટના પાછળનું સાચું કારણ શું હતું, હુમલાખોર કોણ હતો અને તેના ઈરાદા શું હતા, તે અંગેની વિગતો પોલીસ તપાસ બાદ જ સામે આવશે. આ ઘટના ફરી એકવાર શાળાઓમાં સુરક્ષા વ્યવસ્થા અને માનસિક સ્વાસ્થ્યના મુદ્દાઓ પર ગંભીર ચિંતન કરવાની આવશ્યકતા પર ભાર મૂકે છે.

આ પણ વાંચો : ઓસ્ટ્રેલિયામાં ગુમ થયેલા જયદીપસિંહનું મૃતદેહ મળતાં શોકની લહેર