જો તમે ઓનલાઈન ફૂડ મંગાવવાના શોખીન છો, તો હવે તમારે તમારા ખિસ્સા વધુ ઢીલા કરવા પડશે. અગ્રણી ફૂડ ડિલિવરી પ્લેટફોર્મ ઝોમેટો, જે હવે 'ઇટર્નલ લિમિટેડ' (Eternal Ltd) હેઠળ કાર્યરત છે, તેણે તેની પ્લેટફોર્મ ફીમાં મોટો વધારો કરવાની જાહેરાત કરી છે. કંપનીએ દરેક ઓર્ડર પર લાગતી ફી ₹12.5થી વધારીને ₹14.9 કરી દીધી છે.
તમારા ઓર્ડરના ચાર્જની ઉપર રેસ્ટોરન્ટ ચાર્જ, ડીલીવરી ચાર્જ અને GSTની સાથે સાથે પ્લેટફોર્મ ફી પણ વસૂલવામાં આવે છે. જેને વૈશ્વિક અસરોના કારણે વધારી દેવામાં આવી છે. આ વધારો ગ્રાહકના ઓર્ડર પર 19%નો વધારો સૂચવે છે.&nbsp;
શા માટે વધારો કરવામાં આવ્યો?
આ વધારો અંદાજે 19.2% જેટલો છે. બજારના નિષ્ણાતો માની રહ્યા છે કે આંતરરાષ્ટ્રીય સ્તરે ક્રૂડ ઓઈલના વધતા ભાવ અને એલપીજી (LPG) સપ્લાયમાં આવી રહેલી અડચણોને કારણે ઓપરેશનલ કોસ્ટમાં વધારો થયો છે.
આ વધારાની અસર સીધી ગ્રાહકો પર નાખવામાં આવી છે. ઉલ્લેખનીય છે કે, ઝોમેટોની હરીફ કંપની સ્વિગી (Swiggy) હાલમાં દરેક ઓર્ડર પર ₹14.99 પ્લેટફોર્મ ફી વસૂલે છે, જેની સરખામણીએ ઝોમેટોએ પણ પોતાના દરોમાં ફેરફાર કર્યો છે.
શેરબજારમાં પોઝિટિવ અસર
પ્લેટફોર્મ ફીમાં વધારાના સમાચાર આવતાની સાથે જ શેરબજારમાં 'ઇટર્નલ લિમિટેડ' ના શેરમાં ઉછાળો જોવા મળ્યો હતો. શુક્રવારે કંપનીના શેર 2% વધીને ₹233 પર બંધ થયા હતા. બ્રોકરેજ ફર્મ જેએમ ફાઇનાન્શિયલ (JM Financial) મુજબ, ગ્લોબલ મેક્રો સ્થિતિ અને મિડલ ઈસ્ટના સંઘર્ષ છતાં ઝોમેટો અને તેની ક્વિક કોમર્સ બ્રાન્ડ 'બ્લિંકિટ' (Blinkit) લાંબાગાળે વધુ મજબૂત બનીને ઉભરશે.
ગેસ સિલિન્ડરની અછત અને મોંઘા ઇંધણને કારણે રેસ્ટોરન્ટ્સ પણ મુશ્કેલીમાં છે. ઘણા રેસ્ટોરન્ટ્સે પહેલેથી જ બિલમાં 'LPG સરચાર્જ' ઉમેરવાનું શરૂ કરી દીધું છે.
હવે ઝોમેટોના આ નિર્ણયથી ગ્રાહકો માટે બહારથી ખાવાનું મંગાવવું વધુ ખર્ચાળ બનશે. અગાઉ સપ્ટેમ્બર 2025 માં ઝોમેટોએ ફીમાં વધારો કર્યો હતો, અને હવે માત્ર 6 મહિનામાં ફરી ભાવ વધારો ઝીંકાયો છે.

ઝોમેટોએ વધારી પ્લેટફોર્મ ફી

ક્રૂડ ઓઈલ અને ગેસના વધતા ભાવની અસર; ઝોમેટોની પ્લેટફોર્મ ફી ગ્રાહકોના ખિસ્સા પર વધશે બોજ

March 20, 2026 | 17:15 IST