ભારત સરકારના નાગરિક ઉડ્ડયન મંત્રાલયે એક મહત્વપૂર્ણ નિર્ણય લેતા ડોમેસ્ટિક એટલે કે આંતરિક ફ્લાઇટ્સના ભાડા પર લાદવામાં આવેલી મર્યાદા (ફેર કેપ) હટાવી દીધી છે. આ નવા આદેશ મુજબ, હવે એરલાઇન કંપનીઓ સીટોની માગ અને બજારની સ્થિતિને આધારે ટિકિટના ભાવ નક્કી કરી શકશે. આ ફેરફાર આગામી 23 માર્ચ, 2026થી સમગ્ર દેશમાં અમલી બનશે.
શા માટે લાદવામાં આવી હતી ભાડાની મર્યાદા ?
ગયા વર્ષે ડિસેમ્બર મહિનામાં ઇન્ડિગો જેવી મોટી એરલાઇન્સમાં તકનીકી અને સ્ટાફ સંબંધિત સમસ્યાઓ સર્જાતા અનેક ફ્લાઇટ્સ રદ કરવી પડી હતી. મુસાફરોની મજબૂરીનો લાભ ઉઠાવી એરલાઇન્સ મનફાવે તેમ ભાડા ન વસૂલે તે માટે સરકારે હસ્તક્ષેપ કર્યો હતો. તે સમયે સરકારે મહત્તમ ભાડાની મર્યાદા 18,000 રૂપિયા નક્કી કરી હતી, જેથી કટોકટીના સમયે પણ મુસાફરો પર આર્થિક બોજ ન વધે.
પાયલોટના નિયમોમાં ફેરફાર અને સ્ટાફની અછત :&nbsp;
નવેમ્બર માસમાં ડીજીસીએ દ્વારા ફ્લાઇટ ડ્યુટી ટાઇમ લિમિટેશન (FDTL) ના નવા નિયમો અમલી બનાવવામાં આવ્યા હતા. આ નિયમોનો હેતુ પાઇલટ્સ અને ક્રૂ મેમ્બર્સના કામના કલાકો પર નિયંત્રણ લાવી તેમની સુરક્ષા સુનિશ્ચિત કરવાનો હતો. જોકે, આના કારણે ઇન્ડિગો જેવી કંપનીઓમાં અચાનક સ્ટાફની તંગી ઊભી થઈ અને હજારો ફ્લાઇટ્સ કેન્સલ થતા ટિકિટના ભાવ જે તે સમયે 50,000 રૂપિયા સુધી પહોંચી ગયા હતા.
મંત્રાલયની ચાંપતી નજર અને મુસાફરોના હિત :&nbsp;
ભાડા પરથી પ્રતિબંધ હટાવવાની સાથે મંત્રાલયે એરલાઇન્સને શિસ્ત જાળવવાની કડક સૂચના આપી છે. મંત્રાલયનું કહેવું છે કે એરલાઇન્સે પારદર્શક રીતે ભાવ નક્કી કરવા પડશે. જો કોઈ કંપની અયોગ્ય રીતે કે અતિશય ભાવ વધારો કરશે, તો તેની સામે ગંભીરતાથી પગલાં લેવામાં આવશે. સરકાર અત્યારે રીઅલ ટાઇમ ડેટા દ્વારા ભાડાના વલણોનું સતત નિરીક્ષણ કરી રહી છે.
ઇંધણના ભાવ અને વૈશ્વિક સ્થિતિની અસર :&nbsp;
કેન્દ્રીય નાગરિક ઉડ્ડયન મંત્રી રામ મોહન નાયડુએ સ્પષ્ટતા કરી છે કે હાલની વૈશ્વિક યુદ્ધની સ્થિતિને કારણે એવિએશન ટર્બાઇન ફ્યુઅલ (ATF) ના ભાવમાં વધારો થઈ શકે છે. એરલાઇન્સના કુલ ખર્ચમાં ઇંધણનો હિસ્સો 35 થી 45 ટકા જેટલો હોય છે. જો ક્રૂડ ઓઇલ મોંઘું થશે તો તેની સીધી અસર ટિકિટના ભાવ પર પડી શકે છે. 1 એપ્રિલથી ઇંધણના નવા દરો નક્કી થવાના હોવાથી એપ્રિલ મહિનાથી મુસાફરી વધુ મોંઘી થવાની શક્યતા સેવાઈ રહી છે.&nbsp;

ડોમેસ્ટિક ફ્લાઇટ ભાડાના નિયમો

કેન્દ્ર સરકારે ડોમેસ્ટિક ફ્લાઈટ્સના ભાડા પરનો પ્રતિબંધ હટાવ્યો

March 22, 2026 | 12:35 IST