રાજા રઘુવંશી હત્યા કેસમાં પત્ની સોનમનું આત્મસમર્પણ, મેઘાલયના મુખ્યમંત્રીએ આપી માહિતી

શિલોંગથી કથિત રીતે ગુમ થયેલી ઇન્દોરની સોનમ રઘુવંશીએ પોલીસ સમક્ષ આત્મસમર્પણ કર્યું છે. મેઘાલયના મુખ્યમંત્રી કોનરાડ સંગમાએ એક્સ-પોસ્ટ પર આ માહિતી આપી હતી. તેમણે જણાવ્યું હતું કે, એક મહિલાએ આત્મસમર્પણ કર્યું છે. તેની સાથે ત્રણ હુમલાખોરો પણ પકડાયા છે, જ્યારે એકની શોધ ચાલુ છે.

સંગમાએ એક્સ-પોસ્ટ પર મેઘાલય પોલીસની પ્રશંસા કરી અને લખ્યું કે, રાજા હત્યા કેસમાં 7 દિવસમાં મેઘાલય પોલીસને મોટી સફળતા મળી છે. મધ્યપ્રદેશના 3 હુમલાખોરોની ધરપકડ કરવામાં આવી છે, સોનમએ આત્મસમર્પણ કર્યું છે અને બીજા હુમલાખોરને પકડવાનું ઓપરેશન હજુ પણ ચાલુ છે.

તમને જણાવી દઈએ કે, આ કેસને લઈને મેઘાલય પોલીસ પર ઘણું દબાણ હતું. ઇન્દોરના રાજા અને સોનમ રઘુવંશીએ 11 મેના રોજ લગ્ન કર્યા હતા. 20 મેના રોજ હનીમૂન માટે આસામમાં મા કામાખ્યાના દર્શન કર્યા પછી આ દંપતી 23 મેના રોજ મેઘાલયના શિલોંગ જવા રવાના થયા હતા. શરૂઆતમાં, પરિવાર બંને સાથે વાત કરતો રહ્યો, પરંતુ પછી સંપર્ક તૂટી ગયો.

24 મેના રોજ બંનેના મોબાઇલ બંધ થઈ ગયા, જેના કારણે પરિવાર ચિંતિત હતો. ઘણા પ્રયાસો પછી પણ જ્યારે કોઈ સંપર્ક સ્થાપિત થઈ શક્યો નહીં, ત્યારે સોનમનો ભાઈ ગોવિંદ અને રાજાનો ભાઈ વિપિન ઇમરજન્સી ફ્લાઇટ દ્વારા શિલોંગ પહોંચ્યા.

જ્યારે બંને ગુમ થઈ ગયા, ત્યારે NDRF અને પોલીસે મોટા પાયે શોધખોળ શરૂ કરી, જેના પછી 8 દિવસ પછી રાજા રઘુવંશીનો મૃતદેહ ઊંડા ખાડામાંથી મળી આવ્યો. સોનમ રઘુવંશીની શોધ ચાલુ હતી. આ મામલે દેશભરમાં ભારે હોબાળો મચી ગયો હતો, ત્યારબાદ બંનેના પરિવારો અને મધ્યપ્રદેશના CM મોહન યાદવે પણ CBI તપાસની માંગ કરી હતી.