ઓપરેશન સિંદૂર વચ્ચે કર્તવ્યનિષ્ઠાનું ઉદાહરણ | નવપરિણીત સૈનિક બે દિવસમાં જ ફરજ પર રવાના!

પાકિસ્તાનમાં છુપાયેલા આતંકવાદીઓ સામે 'ઓપરેશન સિંદૂર' હેઠળ ભારતીય સેનાની કાર્યવાહી ચાલી રહી છે. બંને દેશો વચ્ચે તંગદિલી વધી રહી હોવાથી, સેનાએ સાવચેતીના ભાગરૂપે રજા પર ગયેલા જવાનોને તાત્કાલિક ફરજ પર પાછા ફરવાનો આદેશ આપ્યો છે, જેથી કોઈપણ સ્થિતિનો સામનો કરવા માટે સૈનિકો ઉપલબ્ધ રહે.

આવી પરિસ્થિતિમાં, મહારાષ્ટ્રના વાશિમ જિલ્લાના એક યુવાન સૈનિકે દેશ પ્રત્યેની પોતાની ફરજને સર્વોપરી ગણીને એક પ્રેરણાદાયી કાર્ય કર્યું છે. જૌલકા ગામના રહેવાસી કૃષ્ણ રાજુ અંભોરે થોડા દિવસો પહેલાં જ લગ્ન કર્યા હતા અને તેઓ રજા પર પોતાના ઘરે આવ્યા હતા. પરંતુ, લગ્નના માત્ર બે દિવસ બાદ જ તેમને સેના તરફથી તાત્કાલિક ફરજ પર પાછા ફરવાનો આદેશ મળ્યો.

કૃષ્ણે કોઈપણ ક્ષણનો વિલંબ કર્યા વિના પોતાની જવાબદારી નિભાવવાનો નિર્ણય લીધો. તેમણે પોતાની નવી દુલ્હન અને પરિવારને છોડીને દેશની રક્ષા માટે રવાના થવાનો નિર્ણય કર્યો. તેમની પત્નીએ ભારે હૃદયે તેમને વિદાય આપી, જ્યારે ગામના લોકો તેમને રેલ્વે સ્ટેશન સુધી વળાવવા આવ્યા અને પાકિસ્તાન સામે મક્કમતાથી લડવા માટે શુભકામનાઓ પાઠવી. કૃષ્ણની આ કર્તવ્યનિષ્ઠા અને દેશ માટેના સમર્પણની ભાવના ખરેખર સરાહનીય છે.