Delhi : 26/11 ના ભયાનક રાતનો સાક્ષી, આરોપી તહવ્વુર રાણાની કસ્ટડી NIA કોર્ટે વધારી

દિલ્હીની પટિયાલા હાઉસ કોર્ટમાં રાષ્ટ્રીય તપાસ એજન્સી (NIA)એ 26/11 ના મુંબઈ આતંકી હુમલાના આરોપી તહવ્વુર રાણાની કસ્ટડી વધુ 12 દિવસ માટે મેળવી છે. રાણાને અગાઉની 18 દિવસની કસ્ટડી પૂરી થતાં કોર્ટમાં રજૂ કરવામાં આવ્યો હતો. NIA એ વધુ પૂછપરછ માટે તેની કસ્ટડી વધારવાની માંગણી કરી હતી, જેને કોર્ટે મંજૂર રાખી છે.

પાકિસ્તાની મૂળનો કેનેડિયન નાગરિક રાણા આ હુમલાના મુખ્ય કાવતરાખોર ડેવિડ કોલમેન હેડલીનો બાળપણનો મિત્ર છે. હેડલીની જુબાની મુજબ, રાણાએ મુંબઈમાં હુમલા માટે રેકી કરવા માટે તેને મદદ કરી હતી. અમેરિકામાં લશ્કર-એ-તૈયબાને સમર્થન આપવા બદલ રાણાને અગાઉ દોષિત ઠેરવવામાં આવ્યો હતો અને લાંબી કાનૂની લડાઈ બાદ તેને ભારત પ્રત્યાર્પણ કરવામાં આવ્યો છે.

NIA હવે રાણાની પૂછપરછ કરીને હુમલાના કાવતરાના ઊંડાણ સુધી પહોંચવા અને પાકિસ્તાનની ભૂમિકાને ઉજાગર કરવાનો પ્રયાસ કરશે. તેની કસ્ટડી વધારવાનો નિર્ણય પીડિતો માટે ન્યાયની દિશામાં એક મહત્વપૂર્ણ પગલું માનવામાં આવે છે. કોર્ટ પરિસરમાં ચુસ્ત સુરક્ષા વ્યવસ્થા ગોઠવવામાં આવી હતી.