ઉન્નાવ કાંડ: કુલદીપ સેંગરના જામીન સામે ભારે વિરોધ

ઉન્નાવ બળાત્કાર કેસના મુખ્ય દોષિત કુલદીપ સેંગરની સજા સ્થગિત કરવાના અને તેને શરતી જામીન આપવાના દિલ્હી હાઈકોર્ટના નિર્ણય બાદ વિવાદ વકર્યો છે. આ ચુકાદાના વિરોધમાં શુક્રવારે મોટી સંખ્યામાં પ્રદર્શનકારીઓએ હાઈકોર્ટની બહાર એકઠાં થઈને સૂત્રોચ્ચાર કર્યા હતા. મહિલા અધિકાર કાર્યકરો અને પીડિતાના પરિવારે આ નિર્ણયને ન્યાયતંત્ર પરના વિશ્વાસનો ભંગ ગણાવ્યો છે.

પરિવાર અને કાર્યકરોમાં ભારે રોષ : 

પીડિતાની માતા અને મહિલા સંગઠનોના સભ્યોએ હાથમાં પ્લેકાર્ડ લઈને પ્રદર્શન કર્યું હતું. પીડિતાના પરિવારે આશંકા વ્યક્ત કરી છે કે આરોપી એક શક્તિશાળી વ્યક્તિ હોવાથી તેના બહાર આવવાથી તેમની સુરક્ષા જોખમાઈ શકે છે. અગાઉના અકસ્માતની ઘટનાઓને યાદ કરતા પરિવારે જણાવ્યું હતું કે તેઓ આ નિર્ણય સામે સુપ્રીમ કોર્ટના દ્વાર ખખડાવશે અને ન્યાય માંગશે. 

હાઈકોર્ટનો આદેશ અને શરતો : 

દિલ્હી હાઈકોર્ટે તાજેતરમાં સેંગરની આજીવન કેદની સજાને અપીલની સુનાવણી પૂરી ન થાય ત્યાં સુધી સ્થગિત કરી છે. કોર્ટે નોંધ્યું હતું કે પૂર્વ ભાજપ નેતાએ પોક્સો એક્ટ હેઠળની મહત્તમ સજા કરતા વધુ સમય જેલમાં વિતાવ્યો છે. જોકે, પીડિતાના પિતાના કસ્ટોડિયલ ડેથ કેસમાં તેને હજુ જામીન મળ્યા નથી, તેથી તે હાલમાં જેલમુક્ત થઈ શકશે નહીં. કોર્ટે જામીન માટે કેટલીક કડક શરતો પણ મૂકી છે, જેમાં પીડિતાના ઘરની આસપાસ ન આવવા અને સાક્ષીઓને ન ધમકાવવા જેવી બાબતો સામેલ છે.

સુરક્ષા અંગે ચિંતા : 

પીડિતા અને તેના પરિવારે પોતાની સુરક્ષાને લઈને ગંભીર સવાલો ઉઠાવ્યા છે. હાલમાં પીડિતાને કેન્દ્રીય સુરક્ષા બળો (CRPF) નું રક્ષણ મળેલું છે, પરંતુ પરિવારનો દાવો છે કે કેટલાક સભ્યોની સુરક્ષા પાછી ખેંચી લેવામાં આવી છે. વિરોધ પ્રદર્શન દરમિયાન પોલીસે સ્થિતિ પર નિયંત્રણ મેળવવા માટે પ્રદર્શનકારીઓને વિખેરાઈ જવા અપીલ કરી હતી