ઉજ્જૈનમાં પુત્રના સસરા સાથે જ માતા ભાગી ગઈ

મધ્યપ્રદેશના ઉજ્જૈન જિલ્લાના બડનગર વિસ્તારમાં એક ચોંકાવનારો કિસ્સો સામે આવ્યો છે, જ્યાં પ્રેમ અને સંબંધોની સીમાઓ તૂટી ગઈ છે. અહીં એક 45 વર્ષીય મહિલા તેના પતિ અને 2 બાળકોને છોડીને ભાગી ગઈ હતી. આ ઘટનામાં જે સત્ય બહાર આવ્યું તે જાણીને સૌ કોઈ સ્તબ્ધ થઈ ગયા, કારણ કે મહિલા જેના પ્રેમમાં પડીને ભાગી ગઈ હતી તે બીજું કોઈ નહિ પણ તેના દીકરાનો થનાર સસરો હતો. 

પતિ અને 2 બાળકોને છોડીને ગઈ

મળતી માહિતી મુજબ, બડનગર પોલીસ સ્ટેશન વિસ્તારના ઉંટવાસા ગામની આ મહિલા 8 દિવસથી ગુમ હતી. પરિવારે તેની ઘણી શોધખોળ કરી પણ કોઈ ભાળ ન મળતાં તેમણે અંતે પોલીસ સ્ટેશનમાં ગુમ થયાની ફરિયાદ નોંધાવી હતી. બડનગર પોલીસે તપાસ શરૂ કરી અને આખરે મહિલાને શોધી કાઢી. પોલીસની તપાસ દરમિયાન, મહિલાએ ખુલાસો કર્યો કે તે સ્વેચ્છાએ તેના પતિ અને 2 બાળકોને છોડીને તેના પ્રેમી સાથે રહેવા ગઈ હતી.

પરિવારજનો પણ આશ્ચર્યચકિત થયા

જ્યારે મહિલાએ તેના પ્રેમી વિશે જણાવ્યું, ત્યારે પોલીસ અને તેના પરિવારજનો પણ આશ્ચર્યચકિત થઈ ગયા, કારણ કે તે પુરુષ મહિલાના દીકરાનો ભાવિ સસરો હતો. મહિલાના દીકરાની સગાઈ તે પુરુષની દીકરી સાથે નક્કી થઈ હતી, પરંતુ સગાઈ થાય તે પહેલાં જ માતા અને ભાવિ સસરા નજીક આવી ગયા અને ભાગી જવાનો નિર્ણય કર્યો.

અશોક પાટીદારની મીડિયા સાથે વાતચીત 

પોલીસે જ્યારે બન્ને વેવાઈ-વેવાણને પોલીસ સ્ટેશન બોલાવ્યા, ત્યારે તેમણે કબૂલ્યું કે, તેઓ પ્રેમમાં હતા અને પોતાની મરજીથી સાથે રહેવા માંગતા હતા. બડનગર પોલીસ સ્ટેશનના ઇન્ચાર્જ અશોક પાટીદારે મીડિયા સાથેની વાતચીતમાં જણાવ્યું કે, લગભગ 45 વર્ષીય મહિલાની ગુમ થયાની ફરિયાદ 8 દિવસ પહેલા દાખલ થઈ હતી.

સામાજિક મૂંઝવણ 

તપાસમાં જાણવા મળ્યું કે, મહિલા લગભગ 50 વર્ષના પુરુષ સાથે ભાગી ગઈ હતી, જે તેના દીકરાનો થનાર સસરો હતો. જોકે, આ મામલો અંગત હોવાથી અને કોઈ કાયદાકીય ગુનો ન બનતો હોવાથી, પોલીસે કોઈ કાર્યવાહી કરી ન હતી અને મહિલાને સુરક્ષિત રીતે તેના પરિવારને સોંપી દીધી હતી. આ ઘટનાએ સાબિત કરી દીધું કે, પ્રેમ ક્યારેક ઉંમર કે સંબંધોની સીમાઓને માનતો નથી, પરંતુ તેનાથી પરિવારમાં ભારે દુઃખ અને સામાજિક મૂંઝવણ સર્જાઈ છે.