ભારતના દક્ષિણ રાજ્યો કર્ણાટક અને તામિલનાડુમાં બુધવારે રાત્રે બે ભયાનક માર્ગ અકસ્માતો સર્જાયા છે, જેમાં કુલ 20થી વધુ લોકોએ પોતાના જીવ ગુમાવ્યા છે.
ચિત્રદુર્ગમાં સ્લીપર બસમાં ભીષણ આગ :&nbsp;
કર્ણાટકના ચિત્રદુર્ગ જિલ્લામાં નેશનલ હાઈવે-48 પર હિરિયૂર પાસે મોડી રાત્રે એક ખાનગી સ્લીપર બસ અને ટ્રક વચ્ચે ગંભીર ટક્કર થઈ હતી. બેંગલુરુથી ગોકર્ણ જઈ રહેલી આ બસ સાથે ટ્રક અથડાતા જ ડિઝલ ટેન્કમાં બ્લાસ્ટ થયો અને જોતજોતામાં આખી બસ આગની લપેટમાં આવી ગઈ હતી. અકસ્માત સમયે મુસાફરો ગાઢ નિદ્રામાં હોવાથી તેમને બચવાની તક મળી નહોતી. પ્રાથમિક અહેવાલો મુજબ 10 થી 17 મુસાફરો જીવતા ભૂંજાયા હોવાની આશંકા છે. મૃતદેહો એટલી હદે બળી ગયા છે કે ઓળખ માટે DNA ટેસ્ટની મદદ લેવામાં આવશે. પીએમ મોદીએ આ ઘટના પર દુઃખ વ્યક્ત કરીને મૃતકોના પરિજનોને 2 લાખ અને ઘાયલોને 50 હજાર રૂપિયાની સહાય જાહેર કરી છે.
તામિલનાડુના કડલૂરમાં ટાયર ફાટતા અકસ્માત :&nbsp;
બીજી તરફ તામિલનાડુના કડલૂર જિલ્લામાં પણ એક કરુણ અકસ્માત સર્જાયો હતો. તિરુચિરાપલ્લીથી ચેન્નઈ જઈ રહેલી સરકારી બસનું ટાયર ફાટવાને કારણે તે અનિયંત્રિત થઈ ડિવાઈડર કુદી સામેની લેનમાં આવી ગઈ હતી. બસે સામેથી આવતી બે કારને અડફેટે લેતા 9 લોકોના મોત થયા છે, જેમાં પાંચ પુરુષ અને ચાર મહિલાઓનો સમાવેશ થાય છે. આ ઘટનામાં ગંભીર રીતે ઘાયલ થયેલા લોકોને હોસ્પિટલમાં ખસેડવામાં આવ્યા છે. તામિલનાડુના મુખ્યમંત્રી એમ.કે. સ્ટાલિને મૃતકોના પરિવારજનોને 3-3 લાખ રૂપિયાની રાહત રકમ આપવાની જાહેરાત કરી છે.

કર્ણાટક તામિલનાડુ માર્ગ અકસ્માત

કર્ણાટકમાં સ્લીપર બસમાં આગ, 10થી વધુ મોત; તામિલનાડુમાં બસ-કાર અકસ્માતે 9નાં મોત

December 25, 2025 | 15:41 IST