યુએસ ફેડે સતત બીજીવાર મુક્યો વ્યાજદરમાં કાપ

યુએસ ફેડ દ્વારા વ્યાજ દરમાં ઘટાડો કરતા ભારત જેવા ઉભરતા દેશના બજારો માટે સકારાત્મક માનવામાં આવે છે. બજાર નિષ્ણાતોએ શુક્રવારે જણાવ્યું હતું કે યુએસ ફેડ દ્વારા આ વર્ષે સતત બીજી વખત વ્યાજ દરમાં 25 બેસિસ પોઈન્ટનો ઘટાડો કરવામાં આવ્યો છે. યુએસ ફેડ દ્વારા વ્યાજ દરોમાં ઘટાડો કર્યા પછી, હાલ તેણે તેને વ્યાજ દર 4.75 ટકા રાખ્યો છે. અમેરિકન મેક્રો ઈન્ડિકેટર્સને જોતા પહેલાથી જ અપેક્ષા હતી કે આ વખતે પણ યુએસ ફેડ દ્વારા વ્યાજ દરોમાં ઘટાડો કરવામાં આવશે. માર્કેટ સાથે જોડાયેલી એક કંપનીના જણાવ્યા મુજબ, "ભારત ખાદ્યપદાર્થોના ફુગાવા અને નીચી વૃદ્ધિની સંભાવનાનો સામનો કરી રહ્યું છે. આરબીઆઈ પણ વૃદ્ધિ, ફુગાવો અને ચલણની હિલચાલ વચ્ચેની દ્વિધાનો સામનો કરી રહી છે. "ઘરેલું વ્યાજદરમાં ઘટાડો કરવાથી મદદ મળશે."

આરબીઆઈના ગવર્નર શક્તિકાંત દાસે આ અઠવાડિયે જણાવ્યું હતું કે જો કે મધ્યસ્થ બેંક વૃદ્ધિને વેગ આપવા માટે નરમ તટસ્થ નાણાકીય નીતિ તરફ આગળ વધી છે, તો તેનો અર્થ એ નથી કે વ્યાજ દરમાં ઘટાડો તરત જ થશે. તેમણે જણાવ્યું હતું કે વલણમાં ફેરફારનો અર્થ એ નથી કે આગામી નાણાકીય નીતિની બેઠકમાં દરમાં ઘટાડો કરવામાં આવશે. તેમણે વધુમાં જણાવ્યું હતું કે ફુગાવા માટે હજુ પણ કેટલાક જોખમો છે અને આ સ્તરે દરોમાં ઘટાડો કરવો ખૂબ જોખમી હશે છે.

આરબીઆઈએ તેની તાજેતરની નાણાકીય નીતિ સમીક્ષા માટેની યોજાયેલી 10 મી બેઠકમાં  વ્યાજ દરો યથાવત રાખ્યા હતા પરંતુ તેની નાણાકીય નીતિના વલણને તટસ્થ રાખ્યું હતું. તો આ તરફ અમેરિકામાં ડોનાલ્ડ ટ્રમ્પની ચૂંટણીમાં જીત અને બેન્ક ઓફ ઈંગ્લેન્ડ દ્વારા દરમાં કાપ જેવી મોટી ઘટનાઓ પછી આ વર્ષે ફેડ દ્વારા 25 બેસિસ પોઈન્ટનો આ સતત બીજો કટ છે. સેમકો સિક્યોરિટીઝના માર્કેટ પરિપ્રેક્ષ્ય અને સંશોધનના વડા અપૂર્વ શેઠે જણાવ્યું હતું કે ફેડ ચીફને અપેક્ષા છે કે ફુગાવો ટૂંક સમયમાં 2 ટકાના લક્ષ્યાંક પર પાછો ફરશે, તેથી નિયંત્રણો સંબંધિત નીતિની જરૂર નથી.