ગુજરાતના પ્રચલિત ‘મણિયારા રાસ નૃત્ય’ ટેબ્લોએ ત્રીજો નંબર મેળવ્યો

નવી દિલ્લી ખાતે 76 માં પ્રજાસત્તાક દિવસની ઉજવણી થશે. જેમાં તમામ રાજ્યો દ્વારા અલગ અલગ થીમ આધારિત ટેબ્લો રજૂ કરવામાં આવશે. આ ટેબ્લોમાં રજૂ થનાર સાંસ્કૃતિક કાર્યક્રમોની 21 જાન્યુઆરીએ દિલ્હી ખાતે સ્પર્ધા યોજાઈ હતી. જેમાં ગુજરાતના કલાકારો દ્વારા રજૂ કરવામાં આવેલા સાંસ્કૃતિક પરફોર્મન્સનો ટેબ્લો ત્રીજા ક્રમે વિજેતા બન્યો હતો.

કેન્દ્ર સરકાર દ્વારા 26 જાન્યુઆરીના રોજ ગણતંત્ર દિવસની ઉજવણીમાં વિવિધ રાજ્યો દ્વારા દર વર્ષે ટેબ્લો રજૂ કરવામાં આવે છે. તમામ રાજ્યોના સાંસ્કૃતિક દ્રષ્ટિએ પ્રતિનિધિત્વ કરતા કલાકારોએ રાષ્ટ્રીય રંગશાળા શિબિર દિલ્હી કેન્ટોન્મેન્ટના “ઝંકાર હોલ” ખાતે સાંસ્કૃતિક સ્પર્ધા યોજાઈ હતી. આ સ્પર્ધામાં ઉત્તરાખંડના ટેબ્લોએ પ્રથમ, ગોવા બીજા અને ગુજરાત ત્રીજા ક્રમે વિજેતા બન્યું હતું. જ્યારે પ્રોત્સાહક ઇનામ પશ્ચિમ બંગાળને મળ્યું હતું.

મહત્વપૂર્ણ છે કે, કેન્દ્ર સરકારના સંરક્ષણ મંત્રાલય દ્વારા યોજાયેલી આ સ્પર્ધામાં દેશના વિવિધ રાજ્યો અને કેન્દ્ર સરકારના વિભાગોએ રંગારંગ સાંસ્કૃતિક કાર્યક્રમો અને પારંપારિક નૃત્યો રજૂ કર્યા હતા. જેમાં ચાર ઇનામોની જાહેરાત કરાઈ હતી. જેમાં ગુજરાતના પ્રચલિત ‘મણિયારા રાસ નૃત્ય’ને ત્રીજો ક્રમ મળ્યો હતો. કાર્યક્રમના અંતે રાજ્ય સરકાર વતી સાંસ્કૃતિક ગૃપના કલાકારોએ ટ્રોફી સ્વીકારી હતી.