એર ઈન્ડિયાની ફ્લાઇટમાં તકનિકી ખામી, સાન ફ્રાન્સિસ્કોથી મુંબઈ જતી ફ્લાઈટને કોલકાતામાં ઉતારવી પડી

અમદાવાદમાં થયેલી વિમાન દુર્ઘટનાના થોડા દિવસ બાદ એર ઈન્ડિયાની બીજી એક ફ્લાઈટમાં ટેક્નિકલ ખામીનો મામલો સામે આવ્યો છે. મંગળવારે સાન ફ્રાન્સિસ્કોથી મુંબઈ જતી ફ્લાઈટ નંબર AI180ને કોલકાતા એરપોર્ટ પર રોકવી પડી અને મુસાફરોને ઉતારવામાં આવ્યા.

આ ફ્લાઇટ સાન ફ્રાન્સિસ્કોથી કોલકાતા થકી મુંબઈ જતી હતી, પરંતુ કોલકાતા એરપોર્ટ પર ટેક ઓફ સમયે પાઈલટને ખ્યાલ આવ્યો કે, બાજુના એક એન્જિનમાં તકનિકી ખામી છે. ફ્લાઇટ મંગળવારે રાત્રે આશરે 12:45 વાગ્યે કોલકાત્તા પહોંચી હતી. પાઈલટે સુરક્ષા દૃષ્ટિએ પગલું લેતાં સવારે 5:20 વાગ્યે મુસાફરોને વિમાનમાંથી ઉતારવાની જાહેરાત કરી.

વિમાનનાં પાઇલટે કહ્યું કે, આ નિર્ણય મુસાફરોની સુરક્ષા માટે લેવામાં આવ્યો છે. આ ઘટના પહેલા, સોમવારે એર ઈન્ડિયાના બોઈંગ 787-8 ડ્રીમલાઈનર ફ્લાઈટ AI315માં પણ તકનિકી ખામી જોવા મળી હતી. એ ફ્લાઈટે દિલ્હીની દિશામાં ઉડાન ભરી હતી, પણ ટેક્નિકલ ઈશ્યૂના કારણે હાંગકાંગમાંથી જ પાછી વાળવી પડી હતી.

એર ઈન્ડિયાના પ્રવક્તાએ જણાવ્યું કે, “AI315 સુરક્ષિત રીતે લેન્ડ થઈ ગઈ છે અને તમામ મુસાફરોને મદદ પુરી પાડી રહી છે. પાઈલટે શક્ય ખામીનો અંદાજ ઉડાન દરમિયાન લગાવ્યો હતો, જેથી સુરક્ષાને ધ્યાનમાં રાખીને વિમાન પાછું વાળવામાં આવ્યું હતું.”

12 જૂનના રોજ અમદાવાદ એરપોર્ટ પરથી ઉડાન ભરતી એર ઈન્ડિયાની એક ફ્લાઇટ દુર્ઘટનાગ્રસ્ત થઈ હતી. વિમાન એક હોસ્પિટલની હોસ્ટેલ સાથે અથડાઈ ગયું અને તેમાં આગ લાગી ગઈ હતી. આ ભયાનક ઘટનામાં 242માંથી 241 લોકોના મૃત્યુ થયા હતા. ગુજરાતના ભૂતપૂર્વ મુખ્યમંત્રી વિજય રૂપાણી પણ આ વિમાનમાં મુસાફરી કરી રહ્યા હતા અને તેઓનો પણ મૃત્યુ થયું હતું.