'ઓપરેશન સિંદૂર': સ્વામી અવિમુક્તેશ્વરાનંદે પાકિસ્તાનને 100 વર્ષ પાછળ ધકેલવાની માંગ કરી

ભારતીય સેના દ્વારા પાકિસ્તાનમાં આતંકવાદીઓ વિરુદ્ધ સફળ 'ઓપરેશન સિંદૂર' બાદ જ્યોતિષપીઠના આચાર્ય સ્વામી અવિમુક્તેશ્વરાનંદ સરસ્વતીનું તીવ્ર નિવેદન સામે આવ્યું છે. તેમણે પાકિસ્તાનમાં છુપાયેલા આતંકવાદીઓ પર ભારતીય સેનાની કાર્યવાહીનું ઉગ્ર સમર્થન કર્યું છે અને સરકાર પાસે વધુ કડક પગલાં લેવાની માંગ કરી છે.

સ્વામી અવિમુક્તેશ્વરાનંદે કહ્યું કે, "ભારતીય સરકાર પાસેથી હજુ વધુ કાર્યવાહીની અપેક્ષા છે. કાર્યવાહી એવી હોવી જોઈએ કે પાકિસ્તાન 100 વર્ષ પાછળ ધકેલાઈ જાય. આતંકવાદીઓને આશ્રય આપનારું પાકિસ્તાન એટલું જ ગુનેગાર છે જેટલા આતંક ફેલાવનારા આતંકવાદીઓ."

ઓપરેશનના નામ 'સિંદૂર' વિશે વાત કરતાં તેમણે કહ્યું કે, "સમજી વિચારીને ઓપરેશનને 'સિંદૂર' નામ આપવામાં આવ્યું છે. માંગનું સિંદૂર ઉજાડનારાઓની ખોપડી પર સિંદૂર ચઢશે. દેશ લાંબા સમયથી આવી કાર્યવાહીની રાહ જોઈ રહ્યો હતો. પહલગામ આતંકવાદી હુમલાના 15માં દિવસે ભારતે પાકિસ્તાન પર 'ઓપરેશન સિંદૂર' હેઠળ એર સ્ટ્રાઈક કરી તે યોગ્ય પગલું છે."

નોંધનીય છે કે, પહલગામ હુમલા બાદ ભારતે પાકિસ્તાન અધિકૃત કાશ્મીર (PoK)માં મોટી કાર્યવાહી કરી છે. જેમાં 9 આતંકવાદી ઠેકાણાઓ પર મિસાઇલ સ્ટ્રાઈક કરવામાં આવી છે, જેને 'ઓપરેશન સિંદૂર' નામ આપવામાં આવ્યું હતું. ભારતીય સેના, વાયુસેના અને નૌસેનાએ સંયુક્ત રીતે આ ઓપરેશનને સફળ બનાવ્યું હતું. આ ઓપરેશનની સફળતા બાદ વિદેશ સચિવ વિક્રમ મિસ્ત્રી સાથે કર્નલ સોફિયા કુરૈશી અને વિંગ કમાન્ડર વ્યોમિકા સિંહે પ્રેસ કોન્ફરન્સ યોજીને 'ઓપરેશન સિંદૂર' વિશે માહિતી આપી હતી.